Fomba Hanatsarana ny Fitoriantsika Momba Ilay Fanjakana
1 Ilaina maika kokoa noho ny hatramin’izay ny fanaovana ny asa fitoriantsika ankehitriny. Ny hahaveloman’ny olona na hahafatesany dia hiankina amin’ny fihetsiny eo anatrehan’ny vaovao tsara. (1 Pet. 4:5, 6, 17, NW; Apok. 14:6, 7, NW). Noho izany antony izany, isika dia tokony hitady foana fomba hanatsarana ny fitoriantsika momba ilay Fanjakana. Inona avy no fomba sasany hihatsarana?
2 Miomàna tsara: Ampiasao ilay Ny Fanompoantsika Ilay Fanjakana amin’ny volana, ka mifantena fomba fampiseho iray izay heverinao fa hanintona ny ankamaroan’ny olona eo amin’ny faritaninao. Zava-dehibe ny hampifanarahanao ireo teny ataonao amin’ny toe-javatra eo an-toerana. Na koa, mety ho tianao kokoa ny hanomana fomba fampiseho iray ho an’ny tenanao manokana, amin’ny fampiasana hevitra sy andinin-teny izay hitan’ny tenanao fa mandaitra. Hila fampidiran-dresaka manaitra ny fahalianan’ny olona ianao. (Jereo ny boky Fanjohian-kevitra, pejy 9-15.) Angamba ianao mikasa ny hanao fanontaniana iray mahatonga hieritreritra na hangataka ilay tompon-trano hilaza ny heviny momba ny vaovao iray mahaliana eo an-toerana. Rehefa azonao ao an-tsaina tsara ny fomba fampisehonao, dia manaova fanazaran-tena miaraka amin’ny mpianakavinao iray na ny mpitory hafa iray izay afaka manolotra fanipazan-kevitra ho anao mba hihatsaranao.
3 Mifampiresaha amin’ny olona: Ny zava-kendrentsika dia ny hampita hafatra lehibe iray. Izany dia azo atao amin’ny fampandraisana anjara ny mpihaino antsika amin’ny fifampiresahana misy heviny. Raha mampipoitra fanoherana iray na manolotra fomba fihevitra iray ilay tompon-trano, dia henoy amim-pitandremana izay lazainy. Hanampy anao hanome valiny araka ny Soratra Masina momba ny fanantenana ao anatinao ny hevitra lazainy. (1 Pet. 3:15). Raha tsy mifanaraka amin’ny Baiboly ny fomba fiheviny, dia mety hilaza amim-pahaiza-mandanjalanja ianao hoe: “Olona maro no mitovy hevitra aminao. Kanefa, intỳ misy fomba fijery hafa io raharaha io.” Avy eo dia mamakia andinin-teny mifanentana iray, ary asao izy hilaza ny heviny.
4 Manàna fandaharam-potoana azo ovana: Tsy hisy vidiny firy ny fiomanana tsara ataonao raha tsy afaka miresaka amin’ny olona akory ianao. Amin’izao andro izao, dia mahazatra ny tsy mahatratra afa-tsy tompon-trano vitsy monja ao an-tranony rehefa tonga mitsidika isika. Raha izany no izy ao amin’ny faritaninao, dia miezaha hanitsy ny fandaharam-potoananao mba hahafahanao hiasa isan-trano amin’ny fotoana maha-ao an-trano ny olona. Mety ho hitanao fa ny fotoana tsara indrindra handehanana hitsidika azy ireo dia amin’ny faran’ny herinandro; mety ho mora kokoa ny mahatratra ny hafa mandritra ny herinandro saingy eo am-piandohan’ny takariva. Any amin’ny faritra sasany, dia hitan’ireo mpitory fa ahitana tombony kokoa ny manao fanambarana amin’ny andro fetin’izao tontolo izao satria mahita olona maro kokoa ao an-tranony izy ireo. Mazàna ny olona no tony kokoa ary mety ho vonona kokoa ny hiresaka amin’ny fotoana toy izany. Ho tsara ny hampifanarahana ny fampidiran-dresakao amin’ilay toe-javatra ary avy eo dia mampifandray ireo teny ataonao amin’ny loha hevitra iray araka ny Soratra Masina.
5 Fakafakao ny fandairan’ny fomba fampiseho ampiasainao: Rehefa avy mandao ny trano tsirairay ianao, dia manontania tena hoe: ‘Moa ve aho nanohina ny fon’ilay tompon-trano? Moa ve aho nanampy azy haneho ny heviny ary nihaino tamim-pitandremana izay nolazainy? Moa ve aho namaly tamim-pahaiza-mandanjalanja? Rehefa jerena ny tarehin-javatra, moa ve aho nampiasa ny tari-dresaka tsara indrindra?’ Mety hanampy ny fiaraha-miasa amin’ny mpitory za-draharaha iray na ny mpisava lalana iray indraindray sy ny fihainoana amim-pitandremana ireo fomba fampiseho ampiasainy mba hanatsarana ny fahitan’ny tenanao vokatra eo amin’ny fanompoana.
6 Raha mailaka amin’ny raharahanao ianao, dia ho afaka hizara ireo fahamarinana momba ilay Fanjakana izay “hamonjy ny tenanao sy izay mihaino anao”. — 1 Tim. 4:16; Ohab. 22:29.