Ny Tenin’ilay Fanjakana — Ny Fahatakarana ny Heviny
1 Ao amin’ilay fanoharany ny amin’ny mpamafy, i Jesosy dia nilaza fa ilay voa latsaka teny amin’ny “tany tsara” dia nampiseho “izay mandre ny teny ka mahatakatra ny heviny”. (Matio 13:23, NW). Rehefa avy nandre momba ilay Fanjakana isika, ‘takatsika ve ny heviny’? Hatraiza no manan-kery eo amin’ny fiainantsika izany? Moa ve isika mametraka ny tombontsoan’ilay Fanjakana eo amin’ny toerana voalohany, ka mampiharihary araka izany fa tena takatsika tokoa ny hevitr’ilay hafatra?
2 Mitaky fianarana manokana ny fahatakarana marina ny hafatra momba ilay Fanjakana. Mila maka fotoana mba hisaintsainana ny sakafo ara-panahy omena isika. Ny famakiana maimaika Ny Tilikambo Fiambenana dia mitovy amin’ny fanaovana teli-moka sakafo iray matsiro sy mahavelona. Moa ve ianao maka fotoana mba handraisana sakafo ara-panahy ao anatin’ny fandinihana lalina? Mba handraisan-tsoa faran’izay betsaka, dia tsy maintsy misy faharisihana sy fahazotoan-komana tsara ara-panahy. Raha tsy eo ireo, ny fanaovan-javatra hafa dia afaka mampihena ho faran’izay kely ireo soa avy amin’ny fianarana manokana na mandany ny fotoana ilaintsika ho amin’izany. Tsy mora ny mifikitra amin’ny fandaharam-pianarana tsara iray. Na dia mitaky fandanjalanjana amim-pitandremana ny amin’izay omena ny laharam-pahamehana aza izany, ireo harena ara-panahy azo dia tsy hay tombanana. — Ohab. 3:13-18; Kol. 1:27.
3 Ny bokikely Fandinihana ny Soratra Masina Isan’andro dia manampy antsika isan’andro hihazona eritreritra manorina sy mampandroso momba ilay Fanjakana. Ireo izay “mahatsapa fa mila zavatra ara-panahy” dia mandamina ny haka minitra vitsivitsy isan’andro mba hamakiana ny teny natao hovakina isan’andro mbamin’ireo famoaboasana azy. (Matio 5:3, NW). Maro amin’ireo teny natao hovakina isan’andro no manazava lafiny samihafa amin’ilay Fanjakana. Ohatra, ny teny natao hovakina nasongadina tamin’ny 22 Novambra 1994, dia ny Matio 13:4. Ny famoaboasana azy dia nandinika ny fanantenana momba ilay fanjakana sy nampahatsiahy antsika ireo loza entin’ny fifaneraserana tsy mahasoa amin’ireo havana sy mpiara-monina. Any amin’ny trano Betela manerana izao tontolo izao, dia misy 15 minitra fandinihana ny teny natao hovakina isan’andro isaky ny andro fiasana tsirairay isa-maraina. Izany dia manantitrantitra ireo soa sy ny maha-zava-dehibe ny handinihana miaraka ny teny natao hovakina isan’andro. Moa ve ny fianakavianao mampiditra ny fandinihana tahaka izany eo amin’ ireo fanao mahazatra anareo isan’andro?
4 Rehefa mitombo ny fankasitrahanao an’ilay Fanjakana, dia hisy faharisihana lehibe kokoa hizara ny hafatra momba ilay Fanjakana amin’ny hafa. Ny Tilikambo Fiambenana sy ny Mifohaza! dia manome izay azo ampitahaina amin’ny solika ara-tsaina izay mamelona ny saintsika amin’ny fanazavana mamelombelona sy azo farany. Izy ireo dia manampy antsika hihazona fahafantarana mazava tsara fa hoe tena mila ny Fanjakan’Andriamanitra izao tontolo izao. Izy ireo dia manampy antsika mba ho olona araka ny fanahy, izay “manana ny sain’i Kristy”. (1 Kor. 2:15, 16). Izany rehetra izany dia afaka manatanjaka ny fanantenantsika sy mampitombo ny zotom-pontsika hizara ny fanantenana momba ilay Fanjakana amin’ny hafa. — 1 Pet. 3: 15.
5 Zava-dehibe ny hahatakarantsika ny hevitry ny hafatra momba ilay Fanjakana. Ilay Fanjakana no fitaovana hampiasain’Andriamanitra hanohanany ny fiandrianany, hamaranana ny faharatsiana, sy hitondrany tontolo vaovao iray — ny paradisa. Nandidy antsika i Jesosy mba hametraka azy io eo amin’ny toerana voalohany eo amin’ny fiainantsika. Tsy maintsy ho olom-pehezina toy ny ondry isika raha tiantsika ny hiaina eo ambanin’ny fanapahany. (Matio 6:10, 33, NW). Koa hararaoty amin’ny fomba feno ny fahafahanao hahazo ireo fitahiany.