Fandaharana ho An’ny Andro Fivoriambe Manokana
1 Nahoana isika no tokony hanambara ny vaovao tsara, tsy misy fampihenana ny ezaka? Inona avy ireo fepetra takina mba ho mpitory ny vaovao tsara? Ahoana no ahafahan’ny olona, na dia saro-kenatra aza, manao ny dingana voalohany amin’ny fizarana ny vaovao tsara amin’ny hafa? Ireo fanontaniana ireo sy ny hafa mampisaintsaina dia hovaliana amin’ny fandaharan’ny andro fivoriambe manokana manomboka amin’ny Septambra, manana ilay foto-kevitra hoe “Mahafeno Fepetra ho Mpitory ny Vaovao Tsara”. — Ampitahao amin’ny 2 Korintiana 3:5, NW.
2 Amin’ny maha-vahoakan’i Jehovah antsika, dia tsy maintsy malina isika momba ny fitondran-tenantsika. Hisy fanandraman-javatra mampahery homen’ny tanora izay hitantara ny fomba nanoherany ny faneren’ireo mitovy taona aminy. Homena fampaherezana mampiseho fitiavana mikasika ny ilana ny hampiofanana ny zanany ho mpanompon’Andriamanitra, ireo ray aman-dreny. Hampiana isika rehetra hahatakatra ny maha-tena ilaina ny hitoriana sy hankasitraka ny fitahiana izay azontsika sy azon’izay mihaino antsika. — 1 Timoty 4:16.
3 Azo antoka fa ny batisa dia ho zavatra iray hisongadina amin’ilay andro. Alohan’io fisehoan-javatra io, dia hisy lahateny miorina amin’ny Baiboly hatefa indrindra amin’ireo olona nanolo-tena vao haingana. Mazava ho azy fa haniry ny hihaino tsara ny rehetra hanatrika eo raha mbola hodinihina ny foto-kevitra ny amin’ny batisa ary hohazavaina ny heviny. Izay maniry ny hatao batisa amin’ny andro fivoriambe manokana dia tokony hampahafantatra izany aloha be amin’ny mpiandraikitra mpitantan-draharaha, mba hananany fotoana ampy handaminana ny hiarahan’ny loholona hijery indray an’ireo fanontaniana voatondro amin’ireo mpilatsaka hatao batisa.
4 Zavatra hisongadina hafa ny lahateny fototra hataon’ny mpandahateny nasaina iray. Mitondra ny lohateny hoe “Mahafeno Fepetra sy Voaomana ho Mpanompon’Andriamanitra” izy io. Hodinihina ireo fandaharana efatra lehibe izay manomana antsika ho mpitory, ary hahafaoka fanandraman-javatra mampitombo ny finoana ilay lahateny.
5 Manaova planina dieny izao mba hanatrehana ilay fandaharana manontolo. Ataovy azo antoka ny hanasa ireo olona liana sy ampianarina Baiboly, mba hahafahan’izy ireo koa handray soa avy amin’io andron’ny fampianarana teokratika io. Amin’izany fomba izany no ahafahantsika mahazo antoka fa “mahafeno fepetra tsara” ho mpitory ny vaovao tsara isika.