Fandaharana Vaovaon’ny Andro Fivoriambe Manokana

‘Ataovy Izany Rehetra Izany Noho ny Vaovao Tsara’. Izany no loha hevitry ny fandaharana vaovaon’ny andro fivoriambe manokana manomboka amin’ny Septambra. (1 Kor. 9:23). Ny vaovao tsaran’ilay Fanjakana no vaovao lehibe indrindra re amin’izao andro izao. Ilay fandaharana dia hanampy antsika hankasitraka ny tombontsoantsika tsy manam-paharoa ho mpitondra io vaovao mahatalanjona io. Hanome antsika fahasahiana hanohy hanambara ny vaovao tsara, tsy misy fitsaharana, koa izy io. — Asa. 5:42.

Ilay fandaharana dia hampiseho amintsika ny fomba hampiasana amin’ny fomba feno ny fampiofanana teokratika azontsika, mba hahavitana be indrindra eo amin’ny fanompoana. Handre teny avy amin’ireo izay nanao fanitsiana mba hanitarana ny fanompoany, isika. Ho anisan’izany ny tanora izay manao ny fara heriny mba hampandrosoana ny vaovao tsara. — Ampitahao amin’ny Filipiana 2:22.

Ny lahateny lehibe indrindra dia hataon’ny mpandahateny nasaina iray. Hanantitrantitra ny ilantsika hitoetra ho “mendrika ny hanankinana ny vaovao tsara”, izy io. (1 Tes. 2:4, NW ). Hanampy antsika izy io hahita fa, raha tiantsika ny hihazona ny tombontsoa hizara ny vaovao tsara amin’ny hafa, dia tsy maintsy mahafeno mandrakariva ireo fepetra sy fari-pitsik’Andriamanitra isika, eo amin’ny fisainantsika sy ny fitondran-tenantsika. Hasongadin’izy io koa ireo fitahiana azontsika amin’ny fanaovantsika izany.

Aza hadinoina ny hanatrika io fandaharana tena lehibe io. Ireo vao nanolo-tena ka maniry hatao batisa amin’io andro fivoriambe manokana io, dia tokony hampahafantatra izany avy hatrany amin’ny mpiandraikitra mpitantan-draharaha. Asao ireo rehetra miara-mianatra aminao mba hanatrika azy io. Aoka isika hamela an’i Jehovah hankahery antsika hanao ny zavatra rehetra noho ny vaovao tsara, ka hamita ilay asa lehibe indrindra atao atỳ alohan’ny Haramagedona.