Miderà An’i Jehovah Mandrakariva
1 Vitsy ireo zavatra lehibe aoka izany ka hoe mendrika ny fiheverantsika mandrakariva. Ampidirintsika ho anisan’izy ireo ny fisakafoana sy ny fisefoana ary ny fatoriana. Tena ilaina ireo raha tiantsika ny hanohana ny tenantsika amin’ny lafiny ara-batana. Ny apostoly Paoly dia nametraka ny fitoriana ny vaovao tsara ho ao amin’ny sokajy mitovy amin’izany, rehefa nampirisika mafy hoe: “Koa aoka isika hanatitra ny fanati-piderana (...) ho an’Andriamanitra mandrakariva”. (Heb. 13:15, izahay no manao sora-mandry.) Koa mendrika ny fiheverantsika tsy an-kijanona koa àry ny fiderana an’i Jehovah. Zavatra tokony hiezahantsika hatao isan’andro izany, dia ny fiderana ilay Raintsika any an-danitra mandrakariva.
2 Rehefa nisy olon-kafa nitady hampivily ny sainy ho amin-javatra hafa, dia namaly toy izao i Jesosy: “Tsy maintsy mitory ny teny soa mahafaly ny amin’ny fanjakan’Andriamanitra (...) Aho”. (Lioka 4:43). Nandritra ny fanompoany naharitra telo taona sy tapany, ny zava-drehetra nataony isan’andro dia nisy nifandraisany nivantana tamin’ny fanomezam-boninahitra an’Andriamanitra. Fantatsika fa nahatsapa toy izany koa i Paoly, rehefa heverina ny hevitra nambarany ao amin’ny 1 Korintiana 9:16, manao hoe: “Lozako, raha tsy mitory ny filazantsara aho!” Nampirisihina ny Kristiana nahatoky hafa mba ho vonona hamaly mandrakariva ny amin’ny fanantenan’izy ireo. (1 Pet. 3:15). Amin’izao andro izao dia mpisava lalana ana hetsiny maro sy mpitorin’ny kongregasiona an-tapitrisany maro no miezaka mafy hanahaka ny ohatra tsara dia tsara toy izany.
3 Rehefa misaintsaina ny amin’ny zotom-po feno fahatsorana nasehon’i Jesosy Kristy, ilay Modelintsika, isika, dia voatosika hanaraka akaiky ny diany. (1 Pet. 2:21, NW). Indraindray dia mety ho kivy isika rehefa voatery miatrika ireo zava-manahirana eo amin’ny fiainana andavanandro. Ahoana no ahafahantsika manararaotra isan’andro ireo fahafahana hidera an’i Jehovah, raha manana asa tsy ara-pivavahana manontolo andro isika? Tsy afaka mamela koa ireo adidintsika ara-pianakaviana izay maka betsaka amin’ny fotoanantsika, isika. Voatanan’ny fianarana tsy maintsy atao isan’andro ny ankamaroan’ny tanora. Mety hihevitra ny sasany fa tsy ho azo atao ny hidera an’i Jehovah ampahibemaso isan’andro. Indraindray, ny sasany dia mety hamela ny volana iray manontolo handalo fotsiny, tsy nisy fomba niresahany momba ny vaovao tsara.
4 I Jeremia dia olona iray izay tsy afaka namela ny tenany tsy hitory ny vaovao tsara. Rehefa tsy nahavita niteny tamin’ny anaran’i Jehovah nandritra ny fotoana kelikely izy, dia nahatsapa afo nirehitra tsy tantiny, tao anatiny. (Jer. 20:9). Teo anoloan’izay toa fahoriana tsy ho zakany, dia nahita fomba hiresahana momba ny hafatr’i Jehovah tamin’ny hafa mandrakariva i Jeremia. Moa ve isika afaka manahaka ny ohatra nomeny raha ny amin’ny herim-po ka mikiry hitady fahafahana hidera an’ilay Mpamorona antsika isan’andro?
5 Ny firesahantsika ny amin’i Jehovah dia tsy tokony ho voafetra ho amin’ny fotoana fanaovana fanambarana ara-potoana sy efa vita kalamina mialoha, miaraka amin’ny mpitory hafa ao amin’ny faritanin’ny kongregasiona. Ny hany ilaintsika dia olona hihaino antsika. Tojo olona hatrany isika isan’andro — tonga ao an-tranontsika izy ireo, miara-miasa amin’izy ireo isika any am-piasana, miara-milahatra amin’izy ireo isika any amin’ny supermarché, na tafara-dia amin’izy ireo eny ambony aotobisy. Ny hany ilaina amin’izany dia fiarahabana feno fisakaizana sy fanontaniana na fanamarihana iray mampisaintsaina mba hanombohana resaka. Maro no nahita fa izany no endriky ny fitoriana nahitany vokatra be indrindra. Rehefa manana fahafahana maro hiresaka amin’ny hafa momba ny vaovao tsara isika, dia tsy ho azo eritreretina ny hoe hamela ny volana iray manontolo handalo fotsiny isika, ka tsy nanao fanambarana momba ilay Fanjakana.
6 Tsy hitsahatra na oviana na oviana ny tombontsoa hidera an’i Jehovah. Araka ny tondroin’ny mpanao salamo, dia tokony samy hidera an’i Jehovah izay rehetra manam-pofonaina, ary azo antoka fa maniry ny ho anisan’izany isika. (Sal. 150:6). Raha manosika antsika hanao toy izany mandrakariva ny fontsika, dia hanararaotra isan’andro ny fahafahana hiresaka momba an’i Jehovah sy ny Teniny isika.