Miderà An’i Jehovah Isan’andro
1 Ny Andriamanitsika, Jehovah, dia Mpamorona mahatalanjona sy be fitiavana, ny Loharanon’ny aina sy ny fahasambarana rehetra. Rehefa heverina ny fahalehibeazany, dia mendrika marina tokoa handray fiderana avy amin’ny zavatra noforoniny rehetra izy. Isam-batan’olona, isika dia maniry hiteny toy ny mpanao salamo hoe: “Hitombo lalandava ny fiderako Anao. Ny vavako hitory ny fahamarinanao sy ny famonjenao [tontolo andro, NW]”. (Sal. 71:14, 15). Mba hanaovana izany, dia tsy maintsy mitady fomba hiderana an’i Jehovah isan’andro isika sy ho voatosika hilaza zavatra tsara momba azy, ny fahamarinany, ary ireo fandaharany ho amin’ny famonjena.
2 Namela ohatra tsara dia tsara ny amin’ny fiderana an’i Jehovah ireo Kristiana tany am-boalohany. Momba ireo olona 3000 natao batisa tamin’ny Pentekosta, dia izao no vakintsika ao amin’ny Asan’ny Apostoly 2:46, 47: “Ary dia niray saina isan-andro izy ka nazoto nankeo an-kianjan’ny tempoly (...) nidera an’Andriamanitra sady nahita fitia tamin’ny vahoaka rehetra. Ary ny olom-bonjena dia nanampin’ny Tompo isan-andro ho isan’ireo.” Nianatra fahamarinana mahatalanjona momba an’i Jehovah sy ny Mesiany izy ireo. Nifindra ny fifaliany ka nampirisika hafa koa mba hihaino sy hianatra ary hidera an’i Jehovah.
3 Misy fahafahana maro isan’andro: Amin’izao andro izao, dia maro no mahita fa afaka midera an’i Jehovah isan’andro izy ireo amin’ny fanaovana fanambarana tsy ara-potoana. Manampy azy ireo mba hahita vokatra kokoa ny fanaovana planina mialoha. Ny anabavy iray tapa-kevitra ny handray anjara amin’ny fanaovana fanambarana tsy ara-potoana dia nahita fa nisy namaky ny varavarankely roa ka nidirana an-keriny tao anaty fiarakodiany. Niantso ny sampan-draharaha mpanao fanamboarana izy ary niomana hanao fanambarana tamin’ilay lehilahy mpanamboatra. Tafiditra tamin’ny fiomanany ny fivavahana mba hahazoana ny fitarihan’i Jehovah. Tamin’ny farany, dia nanao fanambarana tamin’ilay lehilahy nandritra ny adiny iray izy ary nametraka ny boky Hiaina Mandrakizay taminy.
4 Nihaona tsy tapaka tamin’ny mpifanila trano taminy ny anabavy hafa iray rehefa samy nitondra ny alikany nitsangantsangana izy ireo. Nandritra ny fihaonana iray, dia nanao resaka lalina momba ireo zava-manahirana eo amin’ny fiainana izy ireo, ary nitarika ho amin’ny fifampiresahana hafa koa izany. Rehefa nandeha ny fotoana, dia natomboka ny fampianarana Baiboly iray. Mahaliana fa nitsotra ilay mpifanila trano tatỳ aoriana fa tsy ho nihaino ny Vavolombelon’i Jehovah izy raha tonga teo am-baravarany izy ireo, noho izy tsy nino an’Andriamanitra na ny Baiboly.
5 Hitan’ny sasany fa azo atao ny manao fanambarana raha misy mpivaro-mandeha na olon-kafa tonga eo am-baravarany. Nahazo ny fitsidihan’ny lehilahy iray nampirisika ny hanaovana fiantohana aina ny anabavy iray tany Irlande. Nohazavainy fa nanantena ny hahazo fiainana mandrakizay izy. Hevitra vaovao tanteraka izany ho an’io lehilahy nobeazina ho Katolika Romana io. Nandray ny boky Hiaina Mandrakizay izy, nanatrika fivoriana iray ny herinandro nanaraka, ary nanaiky fampianarana Baiboly. Ankehitriny io lehilahy io dia rahalahy vita batisa.
6 Tokony ho mailaka isika rehetra hahita ireo fahafahana hidera an’i Jehovah isan’andro. Manampy ny mihazona gazety na taratasy mivalona vitsivitsy eo amin’izay azo ahitana azy sy azo anolorana azy ireny mora foana amin’ny mpitsidika. Any amin’ny faritra sasany, ny fotoana fohy lany ipetrahana eny amin’ny zaridainam-panjakana dia manome fahafahana maromaro hanao fanambarana amin’ny hafa izay miato mba hialana sasatra minitra vitsivitsy. Tanora Vavolombelona sasany any an-tsekoly no mihazona zavatra vita an-tsoratra ara-baiboly eo ambonin’ny latabany ho fomba hanombohana resaka amin’izay mahamarika izany ka mametraka fanontaniana. Manàna ao an-tsaina andinin-teny iray na roa azonao ampiasaina. Mangataha an’i Jehovah hanampy anao. Hotahina ianao noho ny fanaovana izany. — 1 Jaona 5:14.