Ampio Ny Hafa Hahazo Ilay Fahalalana Izay Mitarika Ho Amin’ny Fiainana
1 Nanazava ny apostoly Paoly fa ‘ny sitrapon’Andriamanitra dia hoe tokony ho voavonjy ny karazan’olona rehetra ary ho tonga amin’ny fahalalana araka ny marina ny fahamarinana’. (1 Tim. 2:4, NW ). Ahoana no ahafahantsika manampy ny hafa handray izany fahalalana izany? Ny fomba iray dia amin’ny fiverenana mitsidika ireo olona izay notairina tamin’ny alalan’ilay boky hoe Fahalalana Izay Mitarika ho Amin’ny Fiainana Mandrakizay, ny fahalianany.
2 Ho an’ireo izay nampiseho fahalianana tamin’ny Baiboly amin’ny maha-tari-dalana azo ampiharina azy io, dia afaka miverina ianao mba hanolotra fampianarana, angamba amin’ny filazana hoe:
◼ “Fony aho teto teo aloha, isika dia niresaka momba ny antony ahafahantsika mitoky amin’ny Baiboly, amin’ny maha-loharanon-tari-dalana azo ampiharina azy io. Noho izy io ara-tsindrimandrin’Andriamanitra, ny Baiboly koa dia loharanom-pampiononana sy fanantenana azo antoka, araka ny nambaran’ny iray tamin’ireo apostolin’i Kristy. [Vakio ny Romana 15:4.] Teo am-pifaranan’ny resaka nifanaovantsika farany aho dia nanontany hoe: Ahoana no ahafahan’ny tenantsika manokana mandray soa avy amin’ny fahalalana voarakitra ao amin’ny Baiboly?” Vakio ny fehintsoratra faha-18 ao amin’ny pejy faha-11 amin’ny boky Fahalalana. Manolora ny hanao fampisehoana fohy ny amin’ny fomba hitarihana fampianarana iray, amin’ny fampiasana ireo fehintsoratra dimy voalohany eo amin’ny toko voalohany.
3 Raha ny vavaka no foto-kevitra niarahanao noresahina tamin’olona tamin’ny voalohany, dia ho azonao atao ny hanandrana izao tari-dresaka izao mba hanombohana fampianarana:
◼ “Antenaiko fa tianao ilay fanazavana momba ny vavaka izay noresahintsika avy tao amin’ilay boky hoe Fahalalana Izay Mitarika ho Amin’ny Fiainana Mandrakizay. Nampanantena anao aho fa hiverina sy hiaraka handinika aminao ny fomba ahafahan’ireo izay mivavaka amin’Andriamanitra, mihaino azy indray kosa. Mariho izay ambara ao amin’ny pejy faha-158. [Vakio ny fehintsoratra faha-18.] Araka izany, amin’ny fianaran’ny tenantsika manokana ny Baiboly, dia mihaino izay tian’Andriamanitra holazaina amintsika isika. Ny fanaovana izany dia mampanatona antsika akaiky kokoa azy ary manampy antsika hiatrika ireo zava-manahirana eo amin’ny fiainana andavanandro izay resahintsika ao amin’ny vavaka. Ho faly aho hiara-mianatra ny Baiboly aminao.” Raha manaiky ilay olona, dia manomboha eo amin’ny toko voalohany amin’ny boky Fahalalana.
4 Raha nampiasa ilay tari-dresaka mivantana mba hanombohana fampianarana ianao, dia ho azonao atao ny hilaza izao manaraka izao mba hanolokoloana ny fahalianana tamin’ilay resaka tamin’ny voalohany:
◼ “Nanao ezaka manokana mba hitsidihana anao indray aho, satria naniry ny hilaza aminao zavatra bebe kokoa momba ny fandaharam-pampianaranay Baiboly maimaim-poana. Nametraka taminao iray amin’itỳ boky hoe Fahalalana Izay Mitarika ho Amin’ny Fiainana Mandrakizay itỳ aho, dia ilay boky fianarana ampiasainay. Mariho ny fomba ampirisihany antsika handinika ny Tenin’Andriamanitra. [Vakio ny fehintsoratra faha-23 ao amin’ny pejy faha-22.] Raha sitrakao, dia mba alao, aza fady, ilay bokinao, ary angamba afaka manohy ny fianarantsika isika teo amin’ilay nijanonantsika tamin’ny farany.” Raha tsy natomboka ny fampianarana tamin’ilay fitsidihana voalohany, dia ho azonao atao ny hilaza hoe: “Angamba fotoana tsara izao mba hampisehoako ny fomba hianarantsika ny Baiboly.” Rehefa avy nandinika fehintsoratra vitsivitsy ianareo, dia manaova fotoana hentitra hiverenana ho amin’ny fianarana manaraka.
5 Ny fampiasana amin’ny fomba mandaitra ny boky Fahalalana dia hahafahantsika hanely hatraiza hatraiza fahalalana araka ny marina ho fampaherezana ny hafa. (Ohab. 15:7, NW ). Hitondra faharavoravoana ho an’ireo izay manana fo tsara ny fahalalana toy izany, ary ho fandrisihana mahery ho azy ireny mba hiainany mifanaraka amin’ny fahamarinan’i Jehovah, izay hitarika ho amin’ny fiainana mandrakizay amin’ny farany.