Aza Mitsahatra Mitory!
1 Mety hihevitra isika indraindray fa efa voasa matetika ny faritanintsika sady efa vita tsara, nefa vitsy no mandray. Mbola tokony hitory ihany anefa isika, ary misy antony lehibe mahatonga izany.—Matio 28:19, 20.
2 Ho vavolombelona: Nilaza i Jesosy fa lafiny lehibe amin’ny famantarana “ny fifaranan’ny rafitr’ity tontolo ity” ny fitoriana ilay Fanjakana, sady “ho vavolombelona amin’ny firenena rehetra.” (Matio 24:3, 14) Na ny fahitana antsika mandray anjara amin’ilay asa fotsiny aza, dia efa fitoriana tena mandaitra. Na tsy mihaino aza ny olona, dia mety hisy aminy hiresaka momba ilay fitsidihantsika, mandritra ny ora maro na andro maro aorian’izay. Haneho fikirizana isika, raha mahatakatra ny antony tokony hitoriantsika. Mampifaly an’i Jehovah isika, rehefa mitory ny vaovao tsara sy milaza hafatra fampitandremana, ka mandray anjara amin’ny fahatanterahan’ny faminanian’ny Baiboly.—2 Tes. 1:6-9.
3 Ilaina ny fikirizana: Mitaky fikirizana avy amintsika ny hahatonga ny olona ho liana bebe kokoa. Betsaka mantsy ny zavatra manelingelina azy sy maka ny fotoanany. Notsidihina isan-kerinandro nandritra ny herintaona, ohatra, ny vehivavy iray vao nanasa ny Vavolombelona hiditra tao an-tranony mba hiara-midinika ny Baiboly. Tena tiany ny zavatra reny, ka nianatra Baiboly sy nivory izy, ary tsy ela dia naniry hatao batisa.
4 Miova haingana ny zava-misy eran-tany, ary miova koa ny olona. Maro amin’ireo tsy nety notsidihina no mety ho vonona hihaino ny hafatra entintsika momba ilay fanantenana mamelombelona. Na olona iray monja aza no mandray ilay hafatra, dia efa misy dikany ny fikirizantsika.
5 Mihamaro ny olona eran-tany no “misento sy mitaraina” noho ny zavatra maharikoriko mitranga. (Ezek. 9:4) Hita amin’ny vokatry ny fitoriantsika fa mandray ny hafatra momba ilay Fanjakana ireo tia ny fahamarinana. (Isaia 2:2, 3) Aoka àry isika tsy hitsahatra hitory, fa hampiseho fitiavana ka ‘hitondra teny soa mahafaly’ foana.—Isaia 52:7; Asa. 5:42.