Handinika ny Boky Fahasambaram-pianakaviana Isika
Ho faly ianareo hahafantatra fa manomboka amin’ny herinandron’ny 6 Oktobra 1997, dia handinika any amin’ny Fianarana ny Bokin’ny Kongregasiona ilay boky hoe Ny Tsiambaratelon’ny Fahasambaram-pianakaviana isika. Tsy misy na iza na iza haniry ho very tombontsoa raha ny amin’ny fianarana miaraka an’io boky mpitari-dalana ara-baiboly azo ampiharina mba hahazoana fiainam-pianakaviana sambatra io. Ny fandaharam-pianarana dia hahafahana handinika amin’ny tsipiriany ny fehintsoratra sy andinin-teny rehetra ao amin’ilay boky.
Hodinihina ny herinandro voalohany amin’ny fianarana ny toko voalohany iray manontolo, satria vitsy ny andinin-teny tsy voatonona ao. Noho izany antony izany ihany koa, dia hodinihina amin’ny fotoam-pivoriana iray ny toko faha-15. Kanefa, hozaraina roa ny toko hafa rehetra, ka tokony ho antsasaky ny toko iray no hodinihina isan-kerinandro. Amin’izay, dia ho ampy tsara ny fotoana hamakiana sy hiaraha-mandinika ireo andinin-teny voalaza rehetra ary koa handinihana amim-pitandremana ny fampiharana ireo andinin-teny rehetra voatonona ao amin’ny fehintsoratra tsirairay.
Lafiny lehibe iray amin’ilay fianarana ny fiaraha-mandinika ny filazana ao anatin’ny faritra famerenana, eo amin’ny fifaranan’ny toko tsirairay. Noho izany, dia tokony hisy fotoana ampy tsara handinihana ireo fanontaniana sy ireo andinin-teny voalaza ao anatin’izy io.
Ireo mpitarika ny Fianarana ny Bokin’ny Kongregasiona dia ampirisihina mafy mba hanome fiheverana manokana ny fanomanany ilay fianarana ary mba hampirisika ireo rehetra voatendry ao amin’ny antokon’olona misy azy, anisan’izany ireo vaovao, mba hiomana tsara sy hanatrika tsy tapaka ary handray anjara. — om-MG p. 75-77.