Fianarana Ny Faminanian’i Daniela
1 Manomboka amin’ny herinandron’ny 17 Aprily, dia hianatra ny boky Diniho ny Faminanian’i Daniela! isika, any amin’ny Fianarana ny Bokin’ny Kongregasiona. Maro no efa namaky io boky mitana mafy ny saina io, nefa izao isika dia manana fahafahana handray ireo soa avy amin’ny fandinihana azy io miaraka amin’ny hafa. Ny mpitory sy ny olona liana ary ny ankizy rehetra dia asaina, eny, ampirisihina hanatrika isan-kerinandro an’io fianarana lalina ny bokin’i Daniela ao amin’ny Baiboly io. — Deot. 31:12, 13.
2 Fandaharam-pianarana sy toromarika: Ny fandaharam-potoana manontolo amin’ilay fianarana ny boky Faminanian’i Daniela dia nosoritana ato amin’ity Ny Fanompoantsika Ilay Fanjakana ity. Hazòny ao anaty boky fianaranao foana izy io. Ilay fandaharana dia mampiseho ny toko sy ny fehintsoratra avy ao amin’ilay boky, ary koa ireo andinin-teny avy ao amin’ny Daniela, izay hodinihina amin’ny fotoam-pivoriana isan-kerinandro. Manazava ny fomba sy ny fotoana handinihana ny sasany amin’ireo fanazavana ao amin’ilay boky ireo fanamarihana ambany pejy. Amin’ny fiafaran’ny fianarana isan-kerinandro tsirairay, dia ampirisihina ilay mpitarika mba hiara-midinika amin’ny mpanatrika, ireo andinin-teny voafaritra tsara avy ao amin’ny Daniela, izay voalaza ao amin’ilay fandaharana. Raha mamela ny fotoana, dia azo vakina sy hazavaina ireo andinin-teny. Hodinihina indray amin’ny herinandro manaraka ny andinin-teny sasany, satria mitohy ny fandinihana ny fampiharana azy.
3 Miomàna ho amin’ny fianarana lalina iray: Nisy ezaka natao mba ho ampy tsara ny fotoana handinihana amim-pilaminana an’ilay zavatra natao hianarana isan-kerinandro. Fohifohy ihany ny efatra amin’ireo lesona hianarana. Noho izany, amin’ny faran’ny fianarana ho an’ny herinandron’ny 5 Jona, ilay mpitarika dia afaka manao famerenana ny Daniela 2:1-40. Ny herinandron’ny 26 Jona, dia afaka mandinika indray ny Daniela 3:1-30 izy. Ny herinandron’ny 4 Septambra, dia tokony hisy famoaboasana amin’ny fomba feno ireo sary sy andinin-teny ao amin’ny pejy faha-139. Ilay tabilao ao amin’ny pejy faha-188 sy faha-189 dia tokony hodinihina mandritra ny fianarana amin’ny herinandron’ny 2 Oktobra.
4 Omano tsara ny fianarana isan-kerinandro, ary mahità fifaliana amin’ny fandraisana anjara amin’izany. Ankasitraho ny tombontsoanao miaraka amin’ny fandaminana hita mason’i Jehovah, sy ny tombontsoa mandray soa avy amin’ny fananana fahaiza-mahataka-javatra sy ny fahazoana hevi-javatra omen’ireo voahosony mahatoky. (Dan. 12:3, 4). Ampirisiho amin-katsaram-panahy ny hafa mba hanatrika tsy tapaka ny fianarana ny boky. Enga anie isika rehetra handinika ny teny ara-paminanian’Andriamanitra, aharihary ao amin’ny bokin’i Daniela, izay mahatalanjona. — Heb. 10:23-25; 2 Pet. 1:19.