Hanao Azy Io Indray ve Isika? — Antso Hafa Iray mba Hisian’ny Mpisava Lalana Mpanampy
1 Hanao inona indray moa? Hanao ny asan’ny mpisava lalana mpanampy ve isika mandritra ny fotoan’ny Fahatsiarovana? Ny takelaka fanampiny tamin’ny Fanompoantsika Ilay Fanjakana Febroary 1997, dia nanintona ny saintsika ho amin’ilay lohateny feno fahasahiana hoe: “Tadiavina — Mpisava Lalana Mpanampy 600.” Natoky izahay fa hihevitra iny antso iny ho zava-dehibe ianareo. Rehefa nakambana ny tatitra momba ny fanompoana tamin’ny Martsa 1997, dia faly aoka izany izahay nahafantatra fa 1341 no nirotsaka hanao ny fanompoan’ny mpisava lalana mpanampy! Raha ampiantsika ny an’ireo mpisava lalana maharitra 815 sy ny an’ireo mpisava lalana manokana 120 namerina tatitra tamin’io volana io, io isa io, dia hitantsika fa efa ho ny 27 isan-jaton’ny mpitory rehetra no nanao ny fanompoan’ny mpisava lalana. Hanao azy io indray ve isika amin’izao fotoan’ny Fahatsiarovana izao?
2 Midera amim-pitiavana an’ireo rehetra nanao ny ezaka fanampiny mba hampitomboana ny fanompoana teny amin’ny saha tamin’ny Aprily sy May lasa teo izahay. Mazava fa natosiky ny fitiavana tsy misy fitiavan-tena an’i Jehovah Andriamanitra sy ny mpiara-belona aminareo, ianareo rehetra. (Lioka 10:27; 2 Pet. 1:5-8). Mpitory tao anatin’ny tarehin-javatra maro samihafa no nandamina ny raharahany mba hanaovana ny asan’ny mpisava lalana mpanampy. Tena nanao tsara ny ankamaroan’ny kongregasiona. Ohatra, ny kongregasiona iray dia nanana mpisava lalana mpanampy 57, sy mpisava lalana maharitra 20, ary mpitory 98. Tao amin’ny kongregasiona hafa iray, dia mpitory 51 no niara-nanao ny asan’ny mpisava lalana tamin’ny volana iray, anisan’izany ny ankamaroan’ireo loholona, ny reny iray nanan-janaka vavikely herintaona sy telo volana, ny anabavy iray izay niala tamin’ny asany ka nahita asa tapak’andro mba hahafahany hanao ny asan’ny mpisava lalana, ary ny anabavy be taona iray izay mbola tsy nanao ny asan’ny mpisava lalana mihitsy taloha. Nanoratra toy izao ny mpiandraikitra ny fizaran-tany: “Misy ezaka goavana atao ankehitriny eo amin’ny asa fitoriana. (...) Tsy vitan’ny hoe misy vokany eo amin’ny faritany fotsiny izany, fa feno hafanam-po koa ny kongregasiona. Faly mifankahalala tsara kokoa sy mahita vokatra tsara eny amin’ny fanompoana ireo rahalahy.”
3 Tsy nohadinoina koa ireo tanora tamin’ny Aprily sy May lasa teo. Ny mpitory tsy vita batisa iray, 13 taona, dia niandrandra ny fotoana izay hahafahany hanamarika ny fanolorany tena ho an’i Jehovah. Taorian’ny batisany tamin’ny Febroary, dia nanoratra toy izao momba ny faniriany hanao ny asan’ny mpisava lalana mpanampy tamin’ny Martsa izy: “Koa satria tsy misy na inona na inona manakana ahy izao, dia nomeko avy hatrany ny fangatahako. (...) Ireo fanandraman-javatra nahafinaritra maro be hitanay dia tsy ho nisy mihitsy, raha tsy noho ny fanasanareo feno fitiavana hanao ny asan’ny mpisava lalana. Velom-pankasitrahana an’i Jehovah aho nanana io tombontsoa ho anisan’ireo maro be nanoina ilay antso io.” Nametra tanjona ny hanao azy io indray izy.
4 Angamba ianao anisan’ireo 1341 izay nirotsaka tamin’ny asan’ny mpisava lalana mpanampy tamin’ny Martsa lasa teo, na ireo 914 tamin’ny Aprily, na ireo 811 tamin’ny May. Hanao azy io indray ve ianao amin’itỳ taona itỳ? Raha tsy afaka nanao ny asan’ny mpisava lalana ianao tamin’ny Aprily sy May lasa teo, moa ve ianao afaka manao azy io amin’itỳ taona itỳ? Ho afaka ny hihoatra ny 1341 — ny isan’ny mpisava lalana mpanampy be indrindra tao anatin’ny iray volana — ve isika ary hahatratra 1500 mihitsy aza?
5 Mifantoha amin’ny Aprily sy May: Amin’ny asabotsy 11 Aprily ny Fahatsiarovana amin’itỳ taona itỳ, ka izany dia mahatonga ny Aprily ho volana faran’izay tsara hampitomboana ny asa eny amin’ny fanompoana. (2 Kor. 5:14, 15). Mandritra ireo 11 andro voalohany amin’io volana io, dia hifantoka amin’ny fanasana olona liana betsaka araka izay azo atao mba hanatrika ny Fahatsiarovana isika. Raha mikasa hanao ny asan’ny mpisava lalana mpanampy ianao, dia omeo aloha ben’ny daty irinao hanombohana, aza fady, ny fangatahanao. — 1 Kor. 14:40.
6 Koa satria misy faran’ny herinandro dimy feno ny May, ireo mpitory mbola mankany an-tsekoly na ireo miasa tontolon’ny andro, dia mety hahita fa ho mora kokoa ny manao ny asan’ny mpisava lalana mpanampy amin’io volana io. Amin’ny fandaharana adiny folo amin’ny fanompoana isaky ny faran’ireo herinandro dimy, dia adiny folo fanampiny monja ao anatin’ilay volana sisa no hilaina mba hanatratrarana ireo 60 ora takina.
7 Mandritra ny Aprily sy May, dia hanolotra famandrihana amin’ny Tilikambo Fiambenana sy ny Mifohaza! isika. Vao mainka izany tokony hampirisika antsika hiezaka hanao ny asan’ny mpisava lalana. Nahoana isika no milaza izany? Mora atolotra ny gazety ary mahafinaritra ny mampiasa azy eny amin’ny fanompoana. Azo ampiasaina amin’ny lafiny rehetra amin’ny fanompoana izy ireo — fitoriana isan-trano sy isaky ny mpivarotra, fanatonana olona eny amin’ny arabe, eny amin’ny parkings, ary eny amin’ny zaridaina sy ny toerana toy izany hafa. Ny zava-dehibe indrindra dia hoe manohana ny fahamarinan’ilay Fanjakana Ny Tilikambo Fiambenana sy ny Mifohaza! Misarika ny saina ho amin’ny fahatanterahan’ny faminanian’ny Baiboly izy ireo, ka manaporofo fa manapaka ny Fanjakan’Andriamanitra. Misy akony eo amin’ny fiainan’ny mpamaky koa izy ireo, noho izy ireo mamakafaka ireo zavatra tena ilain’ny olona. Raha eritreretintsika ny vokatra nentin’ireo gazety sarobidy ireo teo amin’ny fiainantsika, dia ho voatosika handray anjara amin’ny fizarana azy ireo be indrindra araka izay azo atao isika, amin’ny Aprily sy May.
8 Ho fiomanana ho amin’io asa fizarana gazety nohamafisina io, dia handray soa ianao amin’ny fijerena indray ireto lahatsoratra ireto: “Ny Tilikambo Fiambenana sy ny Mifohaza! — Gazetin’ny Fahamarinana Tonga Amin’ny Ilana Azy Indrindra”, (Ny Tilikambo Fiambenana 1 Janoary 1994), sy “Ampiasao Amin’ny Fomba Tsara Indrindra Ireo Gazetintsika”, (Ny Fanompoantsika Ilay Fanjakana Septambra 1995), ary “Omano ny Fomba Fampisehonao Gazety”, (Ny Fanompoantsika Ilay Fanjakana Oktobra 1996).
9 Mitari-dalana ireo loholona: Mba hanomezana izay ilain’ireo mpitory maro nanao ny asan’ny mpisava lalana tamin’ny Aprily sy May lasa teo, ireo loholona tao amin’ny kongregasiona iray dia nampirisika ny hanaovana ny asabotsy iray tao anatin’ny volana ho andro manokana ho an’ny asa fanompoana ho an’ny kongregasiona manontolo. Natao ny fandaharana mba hisian’ny fivoriana ho amin’ny fanompoana maromaro samy hafa nandritra ny andro. Izany dia nanome ho an’ny rehetra tao amin’ny kongregasiona fahafahana handray anjara tamin’ny endriny maro samihafa amin’ny fitoriana. Tafiditra tamin’izany ny fitoriana tany amin’ny toerana fandraharahana, ny fitoriana teny amin’ny arabe, ny fitsidihana isan-trano, ny fanaovana fiverenana mitsidika, ny fanoratana taratasy, ary ny fitoriana an-telefaonina. Niavaka ny fihetsik’ilay kongregasiona teo anoloan’izany, satria nisy mpitory 117 nandray anjara tamin’ny fanompoana tao anatin’ny andro iray. Nisy 521 ny tontalin’ny ora laniny teny amin’ny fanompoana, ary 617 ny tontalin’ny isan’ny gazety sy ny bokikely ary ny boky voapetrany! Nitohy hatramin’ny alahady ny fientanam-po tamin’io asabotsy io, ka faran’izay betsaka ny isan’ny mpanatrika ny Fivoriana Ampahibemaso sy ny Fianarana Ny Tilikambo Fiambenana.
10 Isaky ny Fivoriana Momba ny Fanompoana amin’ny Aprily sy May, ny kongregasiona dia tokony hampahatsiahivina ny fotoana sy ny toerana hanaovana ny fivoriana ho amin’ny fanompoana mandritra ny herinandro ho avy, indrindra fa raha misy fandaharana fanampiny hatao ankoatra ireo fandaharana mahazatra. Ampirisihina ireo mpisava lalana maharitra ary koa ireo mpitory tsy manao ny asan’ny mpisava lalana mpanampy, mba hanohana ireny fandaharana miaraka ireny, raha mamela azy ny toe-javatra misy azy.
11 Ny mpiandraikitra ny fanompoana dia hila ny hihaona amin’ilay rahalahy mizara ireo faritany, mba hanao fandaharana hiasana any amin’ireo faritany tsy voasa matetika. Azo omena fiheverana bebe kokoa ireo olona tsy tratra an-trano sy ny fitoriana eny amin’ny arabe sy isam-pivarotana. Afaka manao fandaharana ireo loholona mba hitoriana any ambanivohitra, angamba miaraka amin’ny kongregasiona hafa mila fanohanana. Tokony hanafatra gazety ampy ho an’ny Aprily sy May ny kongregasiona, ho fiandrasana ilay asa hihamitombo.
12 Mpitory maro no afaka mahafeno fepetra: Toy izao ny fehezanteny voalohany eo amin’ny taratasy fangatahana hanao ny fanompoan’ny mpisava lalana mpanampy: “Noho ny fitiavako an’i Jehovah sy ny faniriako hanampy ny hafa hianatra momba azy sy ny fikasany feno fitiavana, dia maniry hampitombo ny fandraisako anjara amin’ny fanompoana eny amin’ny saha aho, amin’ny firotsahana ho mpisava lalana mpanampy.” Ny fitiavana an’i Jehovah sy ny faniriana hanampy ny hafa eo amin’ny ara-panahy no fototry ny fanoloran-tenantsika. (1 Tim. 4:8, 10). Mba hahafenoana ny fepetra hanaovana ny asan’ny mpisava lalana mpanampy, dia tsy maintsy vita batisa sy manana fitondran-tena tsara ary afaka manokana 60 ora eny amin’ny fanompoana mandritra ilay volana, ny olona iray. Rehefa mandinika ny toe-javatra misy antsika isika rehetra, moa ve ny sasany amintsika izay mbola tsy nanao ny asan’ny mpisava lalana mihitsy taloha, ho afaka ny hanao azy io amin’ny Aprily sy May amin’itỳ taona itỳ?
13 Maro ao amin’ny kongregasiona no mety hahatakatra fa ho afaka ny hanao ny asan’ny mpisava lalana koa ny tenany rehefa mahita ny hafa manao izany nefa ao anatin’ny toe-javatra mitovy amin’ny azy. Misy mpianatra, olona be taona, olona miasa manontolo andro, anisan’izany ny loholona sy ny mpanampy amin’ny fanompoana, ary ny hafa koa, nahavita soa aman-tsara ny asan’ny mpisava lalana mpanampy. Ny reny iray mpikarakara tokantrano sady manan-janaka roa sy manana asa tontolon’ny andro, dia nahatratra 60 ora, sy nahapetraka gazety 108, ary nanomboka fampianarana Baiboly 3 tao anatin’ny iray volana nanaovany ny asan’ny mpisava lalana mpanampy. Ahoana no nanaovany izany? Nampiasa ny ora fisakafoany tany am-piasana nitoriana teo amin’ny faritany akaiky izy, nitory tamin’ny alalan’ny fanoratana taratasy, ary nanao fitoriana teny amin’ny parkings sy teny amin’ny arabe. Nampiasa tamin’ny fomba tsara ny andro tsy fiasany isan-kerinandro koa izy, tamin’ny fandraisana anjara tamin’ny fanompoana niaraka tamin’ny kongregasiona. Na dia nihevitra aza izy tamin’ny voalohany fa tanjona tsy azo notratrarina ny asan’ny mpisava lalana mpanampy, dia resy ireo vato misakana noho ny fampirisihan’ny hafa sy ny fandaharam-potoana iray nety.
14 Nanome toky ny mpianany toy izao i Jesosy: “Mora ny ziogako, ary maivana ny entako.” (Matio 11:30). Izany no lohatenin’ny lahatsoratra nampahery iray tao amin’ny Tilikambo Fiambenana 15 Aogositra 1995. Niresaka momba ny anabavy iray izay nanana asa fivelomana manontolo andro iray mitaky be loatra, izy io. Nihevitra ve izy fa tsy natao ho azy velively ny asan’ny mpisava lalana? Tsia. Raha ny marina aza, dia nahavita nanao ny asan’ny mpisava lalana isam-bolana izy. Nahoana? Satria tsapany fa tena nanampy azy hihazona ny fahaizany mandanjalanja ny asan’ny mpisava lalana. Ny fanampiana olona hianatra ny fahamarinana ao amin’ny Baiboly sy ny fahitana azy ireo manova ny fiainany mba hahazoana ny fankasitrahan’Andriamanitra, no loharanom-pifaliana lehibe indrindra eo amin’ny fiainany feno zavatra atao. — Ohab. 10:22.
15 Izay sorona sy fanitsiana ilain’ny olona iray hatao mba hanaovana ny asan’ny mpisava lalana dia oneran’ireo fitahiana azony. Toy izao no nosoratan’ny anabavy iray momba ny fanaovany ny asan’’ny mpisava lalana mpanampy: “Nanampy ahy tsy hifantoka tamin’ny tenako ilay izy ary hifantoka bebe kokoa tamin’ny fanampiana ny hafa. (...) Manoro hevitra an’ireo izay afaka aho, mba hanao azy io.”
16 Mila fandaharam-potoana tsara ilay izy: Ao amin’ny pejy faran’itỳ takelaka fanampiny itỳ, dia asehonay indray ilay fandaharam-potoana hita tao amin’ny Fanompoantsika Ilay Fanjakana Febroary 1997. Angamba mety amin’ny toe-javatra misy anao ny iray amin’izy ireo. Rehefa mijery azy ireo ianao, dia eritrereto ny asa fanaonao isam-bolana. Zavatra kasaina hatao ao an-trano inona avy no azo atao alohan’ny hanaovanao ny asan’ny mpisava lalana, na azo ahemotra aoriana kely? Moa ve azo foanana ny fotoana sasany laninao amin’ny fialam-boly sy ny fanarian-dia, na ny fandaniana andro hafa? Aza mijery ny fitambaran’ireo 60 ora ilaina, fa manaova fandaharam-potoanan’ny fanompoana hataonao isan’andro na isan-kerinandro. Adiny 2 isan’andro na adiny 15 isan-kerinandro monja no takina amin’ny mpisava lalana mpanampy. Jereo ireo fandaharam-potoana nomena ho ohatra ary mandraisa pensilihazo, dia jereo izay azonao alamina momba ny fandaharam-potoana ho amin’ny fanompoana mety indrindra aminao sy amin’ny fianakavianao.
17 Ny fanoinana tsara ilay antso sy ny fanohanana fanampiny nomen’ny kongregasiona ho an’ny fanompoana tamin’ny Aprily sy May lasa teo, dia nanamafy ny hafanam-pon’ny mpisava lalana maharitra iray, izay nanoratra toy izao: “Misaotra betsaka anareo aho noho ny fampaherezana feno fitiavana avy aminareo mba hanao ezaka fanampiny ho fanohanana ny asan’ny mpisava lalana mpanampy. (...) Ireo fandaharam-potoana nanoroanareo hevitra dia nanampy mpitory maro izay mbola tsy nanao ny asan’ny mpisava lalana mihitsy taloha, mba hahita fa ho afaka ny hanao izany izy ireo. (...) Faly aoka izany aho anisan’ny fandaminan’i Jehovah, sy manaraka ny fitarihana feno fitiavana sy fahasambarana omen’ny mpanompo mahatoky sy malina.”
18 Manome toky antsika toy izao ny Ohabolana 21:5: “Ny [fanaovan’ny mazoto fandaharana mialoha, NW ] dia mampanan-karena”. Mampirisika antsika toy izao ny Ohabolana 16:3: “Ankino amin’i Jehovah ny asanao, dia ho lavorary izay kasainao.” Eny, amin’ny fampidirana an’i Jehovah amim-bavaka ao amin’ny fanapahan-kevitra ataontsika, sy amin’ny fianteherana mafy aminy mba hanampiany antsika hahita fahombiazana, dia afaka mijery ny lafy tsaran-javatra momba ny fikasantsika hanao ny asan’ny mpisava lalana mpanampy isika. Angamba, rehefa hitantsika fa nandeha tsara ny fandaharam-potoanantsika nandritra ny iray na roa volana nanaovantsika ny asan’ny mpisava lalana, dia ho azontsika atao ny hanisy marika ilay efajoro kely eo amin’ny fangatahana hanao ny asan’ny mpisava lalana mpanampy, izay amakiana hoe: “Asio marika eto raha maniry hanompo tsy misy fahatapahana amin’ny maha-mpisava lalana mpanampy ianao mandra-pisin’ny filazana vaovao.” Na ahoana na ahoana, dia afaka miandrandra ny hanao ny fanompoan’ny mpisava lalana mpanampy indray isika amin’ny Aogositra, izay hisian’ny faran’ny herinandro dimy feno. Eo am-pamaranantsika ny taom-panompoana amin’ny Aogositra, dia hisy ezaka hifarimbonana hatao mba handraisan’ny tsirairay anjara feno araka izay azo atao amin’ny fanompoana.
19 Naminany toy izao i Jesosy: “Izay mino Ahy, ny asa ataoko no hataony koa; ary hanao asa lehibe noho izany aza izy”. (Jaona 14:12). Tombontsoa mahafaly antsika ny manompo amin’ny maha-mpiara-miasa amin’Andriamanitra antsika, eo am-pahatanterahan’io faminaniana io. Izao no fotoana itoriana ny vaovao tsara amin’ny ambaratonga lehibe indrindra mbola tsy nisy toy izany, ka anararaotana ny andro azo anaovan-tsoa mba hanaovana io asa io. (1 Kor. 3:9; Kol. 4:5). Ny fandraisana anjara matetika araka izay azo atao amin’ny fanompoan’ny mpisava lalana mpanampy dia fomba faran’izay tsara anaovantsika, mpitory ilay Fanjakana, ny anjarantsika. Tsy andrintsika ny hahita ny halehiben’ny hira fiderana amin’izao fotoan’ny Fahatsiarovana izao avy amin’ireo mpisava lalana mpanampy. (Sal. 27:6). Mieritreritra ny vokatry ny asa tamin’ny Aprily sy May lasa teo isika, ka manontany tena hoe: ‘Hanao azy io indray ve isika?’ Matoky izany isika!
[Efajoro, pejy 3]
Afaka ny ho Mpisava Lalana Mpanampy ve Ianao?
“Na manao ahoana na manao ahoana toeranao, raha vita batisa ianao, fantatra amin’ny fitondrantenanao tsara ary afaka manokana 60 ora isam-bolana amin’ny fitoriana, ary raha mihevitra ianao fa afaka manao ny asan’ny mpitory maharitra mpanampy mandritra ny volana iray na maromaro, dia hahafaly an’ireo loholona ao amin’ny kongregasionanao ny hihevitra ny fangatahanao hiditra amin’io tombontsoam-panompoana io.” — Voalamina mba Hanatanteraka Tsara ny Fanompoantsika, pejy 114.
[Efajoro, pejy 6]
Fandaharam-potoana Samy Hafan’ny Mpisava Lalana Mpanampy
Fomba Samy Hafa Handaharana 15 Ora Isan-kerinandro eo Amin’ny Fanompoana
Maraina — Alatsinainy ka Hatramin’ny Asabotsy
Azo asolo andro hafa ny alahady
Andro Fotoana Ora
Alatsinainy Maraina 2 1⁄2
Talata Maraina 2 1⁄2
Alarobia Maraina 2 1⁄2
Alakamisy Maraina 2 1⁄2
Zoma Maraina 2 1⁄2
Asabotsy Maraina 2 1⁄2
Tontalin’ny Ora: 15
Roa Andro Feno
Na andro inona na andro inona amin’ny herinandro
Andro Fotoana Ora
Alarobia Tontolo Andro 7 1⁄2
Asabotsy Tontolo Andro 7 1⁄2
Tontalin’ny Ora: 15
Takariva Roa Miampy ny Faran’ny Herinandro
Na takariva inona na takariva inona ankobanandro
Andro Fotoana Ora
Alatsinainy Takariva 1 1⁄2
Alarobia Takariva 1 1⁄2
Asabotsy Tontolo Andro 8
Alahady Tapak’andro 4
Tontalin’ny Ora: 15
Tolakandro Ankobanandro sy Asabotsy
Azo asolo andro hafa ny alahady
Andro Fotoana Ora
Alatsinainy Tolakandro 2
Talata Tolakandro 2
Alarobia Tolakandro 2
Alakamisy Tolakandro 2
Zoma Tolakandro 2
Asabotsy Tontolo Andro 5
Tontalin’ny Ora: 15
Ny Fandaharam-potoanako ho Amin’ny Fanompoana
Izay ora tianao holanina amin’ny fotoana tsirairay
Andro Fotoana Ora
Alatsinainy
Talata
Alarobia
Alakamisy
Zoma
Asabotsy
Alahady
Tontalin’ny Ora: 15