Fitsidihana Mety ho Fitahiana
1 Tamim-pifaliana no nandraisan’i Zakaiosy an’i Jesosy mba ho vahiny tao an-tranony. Ary nanjary fitahiana toy inona moa izany fitsidihana izany! — Lioka 19:2-9.
2 Amin’izao andro izao, amin’ny maha Lohan’ny kongregasiona azy, i Jesosy Kristy dia manome toromarika ireo loholona mba ‘hiandry ny ondrin’Andriamanitra’. (1 Pet. 5:2, 3; Jaona 21:15-17). Ho fanampin’ny fampianarana any amin’ireo fivoriana sy ny fitarihan-dalana eo amin’ny fanompoana eny amin’ny saha, ny mpiandraikitra ao amin’ny kongregasiona dia manome fanampiana manokana sy amim-pitiavana ny mpikambana tsirairay ao amin’ny kongregasiona. Indraindray àry, dia mety hanantena ny hahazo fiheverana manokana avy amin’ireo loholona ianao, na any an-tokantranonao, na any amin’ny Efitrano Fanjakana, na rehefa miaraka eo amin’ny fanompoana eny amin’ny saha, na amin’ny fotoana hafa. Tokony hatahotra ny hotsidihin’ireo loholona ve ianao? Tsy izany velively. Ny fitsidihany anao dia tsy midika hoe misy zavatra sasany tsy mety ataonao. Inona àry no zava-kendren’ny fitsidihan’ny mpiandry?
3 Nilaza i Paoly fa niriny ny hitsidika ireo rahalahy mba ‘hahitana hoe nanao ahoana izy ireo’. (Asa. 15:36, NW ). Eny, amin’ny maha mpiandry be fitiavana azy ireo, ny loholona dia tena liana fatratra ny amin’ny hoe manao ahoana ianao. Iriny ny hanolotra fanampiana ara-panahy izay mety hahasoa sy hampahery anao. Fikarakarana manokana toy izany no irin’i Jehovah, ilay Mpiandry antsika be fitiavana, ho azon’ny tsirairay amintsika. — Ezek. 34:11.
4 Ankasitraho ny fitsidihan’ireo loholona: Ny tanjon’i Paoly tamin’ny fitsidihana ireo rahalahiny, dia ny mba ‘hanome [fanomezana ara-panahy, NW ] ho azy ireo, mba hampaherezina izy ireo, ary ny mba [hisian’ny fifampaherezana, NW ]’. (Rom. 1:11, 12). Mila fampaherezana ara-panahy isika rehetra amin’izao andro farany sarotra izao, ary mila fanampiana isika mba hiorina mafy hatrany amin’ny finoana. Tsy isalasalana fa hiteraka fifampaherezana lehibe ny fandraisanao tsara ny fitsidihan’ny mpiandry.
5 Ankasitraho ny soa maro raisina avy amin’ny asa fiandrasana ataon’ireo loholona. Raha misy raharaha sasany na fanontaniana mampanahy anao, dia tadidio fa eo ireo loholona ao amin’ny kongregasiona mba hanampy. Aza misalasala miresaka amin’izy ireo ny amin’ny raharaha na inona na inona izay mety hisy fiantraikany eo amin’ny fahasalamanao ara-panahy. Ankasitraho io fandaharana feno fitiavana ataon’i Jehovah io, ary mifalia amin’ireo fitahiana entin’ny fitsidihana toy izany.