Ny Fiaraha-miasan’ny Mpianakavy mba Samy Handray Anjara Feno — Amin’ny Fianarana Baiboly
1 Noho ny fahamarinana dia tena misy heviny sy zava-kendrena fanampiny ny fiainam-pianakaviana, nefa tsy tonga ho azy akory ny fahombiazana eo amin’ny fanompoana an’i Jehovah. Mitaky fotoana sy ezaka ny fanorenana ankohonana matanjaka ara-panahy. Tena ilain’ny mpianakavy ny miara-miasa akaiky eo amin’io ezaka io. Hifantoka amin’ny fomba ahafahan’ny fianakaviana miara-miasa mba hahazoana fahazarana mianatra tsara, ity lahatsoratra voalohany amin’ny fitohitohizan-dahatsoratra misy fizarana telo ity.
2 Amin’ny famakiana ny Baiboly isan’andro: Milaza ny Ohabolana 24:5 fa “mitombo hery ny olona manam-pahalalana”. Ny fahalalana azo avy amin’ny famakiana tsy tapaka ny Tenin’Andriamanitra dia manome ny olona iray ilay tanjaka anaty ilaina mba hanoherana an’i Satana izay manafika ny fiainany ara-panahy. (Sal. 1:1, 2). Miara-mamaky ny Baiboly isan’andro ve ny fianakavianao? Misy “Fandaharam-pamakiana Baiboly Fanampiny” ho an’ny herinandro tsirairay amin’ny taona, ao amin’ny Fandaharana Amin’ny Sekolin’ny Fanompoana Teôkratika. Zara raha maka folo minitra amin’ny fotoanan’ny fianakaviana isan’andro ny fanarahana azy io. Mifantena fotoana mety, toy ny amin’ny fisakafoana maraina, aorian’ny sakafo hariva, na alohan’ny hatoriana, mba hamakiana Baiboly sy handinihana ny andinin-teny ho an’ny andro avy ao amin’ny Fandinihana ny Soratra Masina. Ataovy anisan’ny fahazaran’ny fianakavianao isan’andro izany.
3 Amin’ny fiaraha-mianatra isan-kerinandro: Tokony ho ny zavatra misongadina indrindra ao anatin’ny herinandro diavin’ny fianakaviana ny fianaram-pianakaviana. Tokony hanohana azy io ny mpianakavy tsirairay, amin’ny fandraisana anjara amim-paharisihana amin’ilay fianarana. Haniry handinika ny zavatra ilain’ny fianakaviany ny loham-pianakaviana, rehefa mifidy izay hianarana ary koa ny andro, ny fotoana sy ny halavan’ilay fianarana. Omeo ny toerana voalohany eo amin’ny fandaharam-potoana amin’ny herinandro ny fianaram-pianakaviana. Aza avela hanembantsembana azy io ireo zavatra tsy dia tena lehibe. — Fil. 1:10, 11.
4 Nanapaka ny telefaonina nandritra ny fianaram-pianakaviana ny raim-pianakaviana iray izay nahazo antso an-telefaonina matetika, noho ny asany. Rehefa tonga tao an-trano ireo clients, dia nasaina hanatrika ny fianarana na hiandry mandra-pahavitany. Tapa-kevitra ny tsy hamela na inona na inona hanembantsembana ilay fianaram-pianakaviana, io raim-pianakaviana io. Namela soritra lalina teo amin’ny zanany izany, ary raha ny amin’ny asany, dia tena nandeha tsara izy io.
5 Tena mahafaly mihitsy rehefa miara-manao zavatra ara-panahy ny mpianakavy! Hitondra fitahian’i Jehovah ny fahatokiantsika eo amin’ny ezaka ataontsika mba handraisana anjara feno amin’ny fianaram-pianakaviana. — Sal. 1:3.