Manana Fanafarana Gazety Voafaritra Tsara ve Ianao?
1 Efa nandeha tany amin’ny fivoriana ho amin’ny fanompoana ve ianao, ka nahita fa tsy nanana gazety tao anaty kitaponao? Tsarovy ny takelaka fanampiny amin’ny Fanompoantsika Ilay Fanjakana Septambra 1995, izay nitondra ny lohateny hoe “Ampiasao Amin’ny Fomba Tsara Indrindra Ireo Gazetintsika”. Nilaza tamintsika mba ‘hanana fanafarana gazety voafaritra tsara’ izy io, ary nanao hoe: ‘Mametraha fanafarana gazety amin’ilay rahalahy mikarakara ny gazety, ka amin’ny isany mihevitra ny zava-misy sy voafaritra tsara ho an’ny nomerao tsirairay. Amin’izany fomba izany ianao sy ny fianakavianao dia hanana tahirin-gazety tsy tapaka sy ampy.’ Efa nanao izany ve ianao?
2 Nahoana raha mametraka fanafarana gazety voafaritra tsara? Hahatsapa andraikitra bebe kokoa hizara ireo gazety isan-kerinandro ianao, ary hitombo ny fifalianao manao izany. Raha efa manana fanafarana gazety voafaritra tsara ianao, dia tombano indray raha ampy ny isan’ny gazety ilainao eny amin’ny fanompoana mandritra ny volana iray. Mazava ho azy fa maniry ny haneho fahatokiana isika amin’ny fandraisana avy hatrany ny gazety nohafarantsika, aorian’ny fahatongavany ao amin’ny kôngregasiôna, ary tokony hahatsapa ny adidy hanao izany isika. Amin’ny fivoriana voalohany aorian’ny nahatongavan’ireo gazety, dia efa tokony hozarain’ilay mpikarakara azy izy ireo. Raha tsy ho ao amin’ny kôngregasiôna mandritra ny fotoana elaela ianao, dia ampahafantaro an’ilay mpikarakara ny gazety raha irinao na tsia ny hanomezany ny gazetinao ho an’ny olon-kafa, mandra-piverinao.
3 Io takelaka fanampiny voatonona tetsy ambony io ihany dia nilaza koa fa tokony ‘hampiditra andro iray fanelezana gazety tsy tapaka ao amin’ny fandaharam-potoanantsika’ isika. Afaka manohana ny Andro Fanelezana Gazety isan-kerinandro ve ianao? Isaky ny asabotsy ao anatin’ny taona izany, araka ny aseho ao amin’ny Kalandrien’ny Vavolombelon’i Jehovah 1999! Aza hamaivanina ny maha zava-dehibe ny fizarana ny Tilikambo Fiambenana sy Mifohaza! Rehefa manao ezaka mba handray anjara feno amin’ny asa fizarana gazety isika, dia “mitondra [vaovao tsara ny amin’ny zavatra tsara kokoa, NW ]” ho an’ny mpiara-belona amintsika. — Isaia 52:7.