Tsy efa Rentsika ve Izany teo Aloha E!
1 Mazava ho azy fa eny! Mamerina zavatra maro ao amin’ny Teniny, ho tombontsoan’ny vahoakany, i Jehovah. Namerina ny fampianarany momba ny lafin-javatra maro samihafa ny amin’ilay Fanjakana i Jesosy matetika. Nandinika tsy an-kijanona indray ireo raharaha ara-panahy, niaraka tamin’ireo izay niorina mafy tamin’ny fahamarinana, ny apostoliny. — Rom. 15:15; 2 Pet. 1:12, 13; 3:1, 2.
2 Amin’izao androntsika izao, ny fandaminan’i Jehovah dia nandamina ny hamerimberenana handinika foto-kevitra lehibe, any amin’ny fivorian’ny kôngregasiôna. Efa naverimberina nianarana ny zavatra vita an-tsoratra sasany. Eny, tena zava-dehibe ny mandre zavatra efa rentsika teo aloha!
3 Manome zavatra ilaina tena lehibe ny famerimberenana: Ny fampahatsiahivan’i Jehovah dia mampitombo ny halalin’ny fahazoantsika hevi-javatra, sy mampivelatra ny fomba fijerintsika, ary manatanjaka ny fahatapahan-kevitsika tsy hitsoaka an-daharana eo amin’ny lafiny ara-panahy. (Sal. 119:129). Tahaka ny fijerena eo amin’ny fitaratra ny fijerena indray ireo fari-pitsipika sy ireo foto-pitsipik’Andriamanitra. Manampy antsika mba handinika lalina ny tenantsika sy hanohitra ny fironana ny ho “mpihaino manadino”, izany. — Jak. 1:22-25.
4 Raha tsy manohy mampahatsiahy ny tenantsika ny amin’ny fahamarinana isika, dia hanan-kery ao am-pontsika ireo zavatra hafa. Ny fampahatsiahivan’Andriamanitra dia manatanjaka antsika mba hanohitra ny fitaomana maloton’ny tontolon’i Satana. (Sal. 119:2, 3, 99, 133; Fil. 3:1). Ny fampahatsiahivana tsy tapaka raisintsika momba ny fahatanterahan’ny fikasan’Andriamanitra, dia manosika antsika ‘hiambina’. (Marka 13:32-37). Ny famerimberenana ny fahamarinana araka ny Soratra Masina dia manampy antsika hijanona eo amin’ny lalan’ny fiainana mandrakizay. — Sal. 119:144.
5 Ny fomba andraisan-tsoa: Tsy maintsy ‘mampirona ny fontsika ho amin’ny fampahatsiahivan’Andriamanitra’, isika. (Sal. 119:36, NW). Rehefa misy foto-kevitra iray efa fantatsika dinihina ao amin’ny fivorian’ny kôngregasiôna, dia tokony hanao fanomanana mialoha sy hijery ireo andinin-teny voatonona ary hisaintsaina ny fomba ahafahantsika mampihatra ilay fanazavana isika. Aoka isika hanao fanomanana ny famerenana an-tsoratra amin’ny Sekolin’ny Fanompoana Teôkratika, ka tsy hieritreritra hoe tsy ilaina izy io. (Lioka 8:18). Tsy hirintsika na oviana na oviana ny tsy hifantoka, satria hoe averimberina matetika any am-pivoriana ireo fahamarinana fototra. — Heb. 5:11.
6 Enga anie isika hitovy fihetsika amin’ny mpanao salamo, manao hoe: “Ny làlan’ny [fampahatsiahivanao, NW] no ifaliako, tahaka ny ifaliako amin’ny harena rehetra.” (Sal. 119:14). Eny, efa rentsika ireny zava-tsarobidy ireny teo aloha, ary azo inoana fa mbola handre azy ireo indray isika. Nahoana? Satria fantatr’i Jehovah fa mila ny mandre azy ireo isika!