Valin’ireo Fanontanianareo
◼ Ahoana no ahafahan’ny mpikarakara ny mpanatrika manohana ny ray aman-dreny, mba hanampiana ny zanany hihazona filaminana tsara mandritra ny fivoriana?
Efa voajanahary ao amin’ny ankizy ny fananana tanjaka, sy ny tsy fahazarana mipetraka mandritra ny fotoana lava. Aorian’ny fivoriana, dia feno hery izay mety hampirona azy ireo hihazakazaka sy hanenjika ankizy hafa ao amin’ny Efitrano Fanjakana na any amin’ny toeram-pivoriana hafa, eny amin’ny parking na eny an-tsisin-dalana, ny ankizy. Kanefa, marina ilay ohabolana hoe ‘ny zaza avela hanaram-po dia mampahamenatra ny reniny’. — Ohab. 29:15, NW.
Mampalahelo fa nisy sasany tamin’ireo rahalahintsika sy anabavintsika be taona naratra mafy, satria nisy ankizy nihazakazaka teny aminy, ka nandona azy. Niteraka fahoriana tsy nilaina ary koa fandaniana tsy tamin’ny antony ho an’ny ray aman-dreny sy ny kongregasiona izany. Ho fiarovana ny tenany sy ny hafa, dia tsy tokony havela hihazakazaka sy hilalao ao anatin’ny Efitrano Fanjakana na any ivelany ny ankizy.
Manana andraikitra araka ny Soratra Masina mba hampiofana ny zanany haneho fanajana araka ny tokony ho izy ny toeram-panompoam-pivavahantsika ny ray aman-dreny. (Mpit. 4:17a). Any amin’ny fivoriantsika sy ny fivoriambentsika kristianina dia misy mpikarakara ny mpanatrika tendrena mba hijery raha ‘atao amin’ny fahamendrehana ny zavatra rehetra’, sy atao amin’ny ‘filaminana [tsara, NW ]’. (1 Kor. 14:40; Kol. 2:5). Tsy maintsy mailo hatrany izy ireo, aloha sy mandritra ary aorian’ny fandaharana, raha ny amin’izay mitranga ao anatin’ny Efitrano sy any ivelany. Raha mihazakazaka na manjary tsy voafehy ny zaza iray, dia afaka mampijanona amin-katsaram-panahy ilay zaza ny mpikarakara ny mpanatrika, ka hanazava aminy ny antony tsy hanekena ny zavatra toy izany. Tokony hilazana amin-katsaram-panahy ny amin’ilay zava-manahirana sy ny ilana hanaraha-maso ilay zaza koa ny rainy na ny reniny. Tokony hanao zavatra mifanaraka amin’izany ilay ray na ilay reny.
Takatra fa indraindray dia mety hitomany na hanjary hanakorontana ny zaza sy ny ankizy madinika, mandritra ny fivoriana. Ny mpikarakara ny mpanatrika, izay tonga 20 minitra, fara fahakeliny, alohan’ny hanombohan’ny fandaharana, dia afaka manokana ny laharan-tseza roa farany ao amin’ny efitrano fivoriana mba ho an’ny ray aman-dreny te hipetraka any miaraka amin’ny zanany madinika. Ny hafa rehetra amintsika dia tokony hahay hiara-miasa, amin’ny famelana ireo seza ireo ho azy ireo.
Raha manakorontana ny zaza iray, dia tokony hanao zavatra ilay ray na ilay reny. Raha tsy manao izany ilay ray na ilay reny, ka manjary manelingelina ilay fanakorontanana, dia tokony hangataka amin-katsaram-panahy an’ilay ray na ilay reny, hitondra ilay zaza any ivelan’ilay efitrano fivoriana, ny mpikarakara ny mpanatrika iray. Rehefa manasa olona vaovao manan-janaka kely ho any amin’ny fivoriana isika, dia tokony hiara-mipetraka aminy sy hanampy amin’ny fikarakarana ny zaza, raha mitomany na manakorontana amin’ny fomba hafa izy ireo.
Mitondra fifaliana ny mahita ankizy amin’ny sokajin-taona rehetra any amin’ny Efitrano Fanjakana sy ny mandinika ny fitondran-tenany tsara ao anatin’ny tranon’Andriamanitra. (1 Tim. 3:15). Amin’ny fanajany ny fandaharana nataon’i Jehovah ny amin’ny fanompoam-pivavahana, dia manome voninahitra azy izy ireo, ary ankasitrahan’ny rehetra ao amin’ny kongregasiona.