“Ny Taonarivo Vaovao — Inona no Ampanantenain’ny Hoavy ho Anao?”
1 Ao an-tsain’ny olona maro maneran-tany io fanontaniana io. Na dia efa nahavita zavatra be aza ny olombelona tao anatin’ny taonjato maro, dia diso fanantenana ny olona, satria mbola eo ihany ireo zava-manahirana lehibe nampijaly ny taranak’olombelona efa hatramin’ny an’arivony taona maro. (Joba 14:1; Sal. 90:10). Aiza no ahafahany mahita fanamaivanana?
2 Mandritra ny volana Oktobra sy Novambra, dia hanana fahafahana manokana hanome ny valin’io fanontaniana io an’ireo mpiara-monina amintsika isika. Amin’ny fomba ahoana? Amin’ny fizarana ny Vaovao Momba Ilay Fanjakana No. 36. Ny lohateniny dia hoe “Ny Taonarivo Vaovao — Inona no Ampanantenain’ny Hoavy ho Anao?” Mandritra ny tapany voalohany amin’ny Oktobra, dia hanolotra ny gazety Ny Tilikambo Fiambenana sy Mifohaza! isika. Avy eo, manomboka amin’ny alatsinainy 16 Oktobra ka hatramin’ny zoma 17 Novambra, dia hizara ny Vaovao Momba Ilay Fanjakana No. 36 betsaka araka izay azo atao isika. Mandritra io ezaka manokana io, dia hifantoka amin’ny fizarana ny Vaovao Momba Ilay Fanjakana No. 36 isika, mandritra ny herinandro. Amin’ny faran’ny herinandro kosa, dia hanolotra azy io miaraka amin’ireo gazety farany isika.
3 Handray anjara feno ve ianao? Tokony hitari-dalana amin’io ezaka manokana io ny loholona sy ny mpanampy amin’ny fanompoana ary ny mpisava lalana, satria izy ireo no loha laharana amin’ny asa. Mpitory maro no nanitsy ny fandaharam-potoanany, mba ho mpisava lalana mpanampy, mandritra ny iray na ireo roa volana hanaovana io fizarana io. Ny hafa nanao fandaharana mba handany fotoana bebe kokoa noho ny mahazatra, eo amin’ny fanompoana.
4 Ireo mpitarika Fianarana ny Bokin’ny Kongregasiona dia tena afaka manampy sy mampahery an’ireo rehetra miara-mianatra ny boky aminy, mba handray anjara feno amin’ny fizarana ny Vaovao Momba Ilay Fanjakana No. 36. Mety hisy mpitory sasany nanjary tsy nitory intsony. Tokony hitsidika azy ireny ny loholona, mba hahitana izay azo atao mba hanampiana azy. Angamba izy ireo afaka mandamina ny hiarahan’ny mpitory za-draharaha iray amin’ny olona tsirairay tsy niasa intsony, eny amin’ny fanompoana, mandritra ireo volana ireo. Ny fanolorana tsotra ilay Vaovao Momba Ilay Fanjakana No. 36 no hany mety hilain’izy ireny, mba hiverenana hitory indray.
5 Ireo mpianatra Baiboly efa lasa lavitra amin’ny fianarana ny boky Fahalalana, ka mahafeno fepetra ho mpitory tsy vita batisa, dia hanana fahafahana tsara koa hanomboka handray anjara amin’ny fanompoana. Na ny ankizy aza dia afaka mandray anjara tsara amin’io asa mampientam-po io.
6 Fanolorana tsotra no hany ilaina. Azonao atao ny milaza hoe:
◼ “Nanokana an-tsitrapo ny fotoanako aho, tompoko, mba handraisana anjara amin’ny fizarana ity hafatra lehibe ity amin’ny fianakaviana tsirairay eto [anaran’ilay tanàna na faritanàna]. Ity, tompoko, ny anao. Iangaviako ianao hamaky azy.” Mety ho tsara kokoa ny tsy hitondrana kitapo, rehefa mizara ny Vaovao Momba Ilay Fanjakana No. 36.
7 Fivoriana ho amin’ny asa fanompoana voalamina tsara mialoha: Tsy maintsy ataon’ny loholona amin’ny fotoana mety sy mora arahina ireo fandaharana ho amin’ny fitoriana. Ny mpiandraikitra ny fanompoana indrindra no tokony hahazo antoka fa misy faritany be dia be hitoriana isan-trano sy isam-pivarotana, mba hahafahan’ny rehetra handray anjara feno amin’ilay asa. Any amin’izay hetezany, dia tokony hisy fivoriana ho amin’ny fanompoana alamina isan’andro sy amin’ny faran’ny herinandro ary amin’ny takariva. Azo atao koa ny manao fandaharana mba hihaonana amin’ny faran’ny tolakandro, ho an’ny mpianatra sy ny mpiasa ary ny hafa koa.
8 Izay tokony hatao amin’ireo tsy tratra an-trano: Ny tanjontsika dia ny hiresaka amin’ny tompon-trano betsaka araka izay azo atao. Koa raha tsy mahatratra olona ianao, rehefa tonga mitsidika, dia raiso an-tsoratra ny adiresiny, ary miverena amin’ny fotoana hafa ao anatin’ny andro. Raha toa, amin’ny herinandro farany amin’ilay ezaka manokana, ka mbola tsy nahatratra ireo tompon-trano ireo ianao, dia azonao atao ny mamela Vaovao Momba Ilay Fanjakana No. 36 iray ho azy ireo, amin’ny toerana tsy hahitan’ny mpandalo azy. Azon’ny loholona eo an-toerana atao ny milaza amin’ny kongregasiona mba hamela Vaovao Momba Ilay Fanjakana No. 36 iray any amin’izay tsy ahatratrarana olona amin’ny fitsidihana voalohany, rehefa miasa faritany ambanivohitra sy rehefa betsaka ny faritany ka tsy ho voasa mandritra ilay ezaka manokana.
9 Aoka àry isika hiasa mafy! Tokony hiezaka mafy ny kongregasiona mba hamita ny faritaniny, alohan’ny faran’ilay ezaka manokana amin’ny 17 Novambra. Raha lehibe ny faritaninareo, dia azon’ny mpitory sasany atao ny miasa irery, any amin’ny faritra hetezan’izany sy azo antoka. Izany dia hanamora kokoa ny fanatratrarana olona mendrika betsaka araka izay azo atao. Aza hadinoina ny mandray an-tsoratra tsara an’ireo olona liana rehetra.
10 Tokony hamaritra mialoha ny loholona hoe firy ny gazety fanampiny hilain’ny kongregasiona, ka hanao fanafarana mifanaraka amin’izany. Tsy ilaina ny manafatra ny Vaovao Momba Ilay Fanjakana No. 36, satria samy handefasana amin’izy io ny kongregasiona tsirairay. Ny mpisava lalana manokana sy maharitra ary mpanampy dia hahazo 250 avy mba hozaraina, fa ireo mpitory kosa homena 50 avy. Koa vonona àry ve ianao, no sady may hanao io asa manokana io? Endrey ny tombontsoantsika hampahafantatra amin’ny mpiara-monina rehetra amintsika, izay nampanantenain’Andriamanitra ho amin’ny hoavy tsy ho ela!