Valin’ny Fanontanianareo
◼ Ahoana no ahafahana manampy olona iray tsy nitory intsony efa hatramin’ny ela mba hahafenoany fepetra indray ho mpitory ny vaovao tsara?
Rehefa manome porofo ny olona iray tsy nitory intsony fa maniry amim-pahatsorana ny hanompo an’i Jehovah izy, dia antom-pifaliana izany. (Lioka 15:4-6). Azo inoana fa namela ny fanoherana na ny fanerena eo amin’ny fiainana hisakana ny fanaovany fianarana manokana sy ny fanatrehany fivoriana ary ny fandraisany anjara amin’ny fanompoana ilay olona. Ahoana no fomba tsara indrindra ahafahana manome fanampiana manokana mba hanaovany fandrosoana ara-panahy?
Isika rehetra dia tokony hanao ny dingana voalohany mba hanomezana toky an’ilay olona fa tena tia azy amin’ny fitiavana kristianina isika. Ireo loholona dia tokony ho mailaka hamantatra izay zavatra voafaritra tsara ilainy eo amin’ny ara-panahy. (Jak. 5:14, 15). Raha nandritra ny fotoana fohy no tsy nitoriany intsony, dia mety ho ny fanampian’ny mpitory iray za-draharaha no hany ilaina mba hiverenan’ilay olona hitory indray. Kanefa, raha efa ela no tsy niarahan’ilay olona tamin’ny kongregasiona, dia mety ho tena ilaina ny fanampiana bebe kokoa. Mba hampitomboana tsikelikely finoana sy fankasitrahana, dia mety ho tsara ny hianarany ny Baiboly, amin’ny zavatra vita an-tsoratra mifanentana amin’izany. Amin’ny toe-javatra toy izany, dia handamina ny hisian’ny mpitory mahay iray hitarika ilay fianarana ny mpiandraikitra ny fanompoana. (Heb. 5:12-14; jereo ny Valin’ny Fanontanianareo ao amin’Ny Fanompoantsika Ilay Fanjakana Novambra 1998.) Raha mahafantatra olona mila fanampiana toy izany ianao, dia miresaha amin’ny mpiandraikitra ny fanompoana ao amin’ny kongregasionanao.
Alohan’ny hanasana olona iray tsy nitory intsony hatramin’ny ela handray anjara indray amin’ny fanompoana, dia ho tsara ny hihaonan’ny loholona roa aminy mba hahitana raha mahafeno fepetra ho mpitory ilay Fanjakana izy. Hanao toy ny rehefa mihaona amin’ny olona vao maniry hameno fepetra ho mpitory ny vaovao tsara izy ireo. (Jereo Ny Tilikambo Fiambenana 15 Febroary 1989, pejy faha-17.) Ilay olona tsy mitory intsony dia tokony hanana faniriana amim-pahatsorana hizara ny vaovao tsara amin’ny hafa. Ilainy koa ny mameno ireo zavatra takina fototra voasoritra ao amin’ny boky Ny Fanompoantsika, pejy faha-98-99, sy ny manatrika ireo fivorian’ny kongregasiona tsy tapaka.
Ny fananana fahazarana tsara ara-panahy dia hanampy be dia be an’ilay olona niverina mba hanatanjahany sy hihazonany ny fifandraisany sarobidy amin’i Jehovah, ka hanohizany handeha eo amin’ny lalan’ny fiainana mandrakizay. (Matio 7:14; Heb. 10:23-25). Ny fanaovany ny “ezaka amim-pahatsorana rehetra” sy ny fampitomboany toetra kristianina izay maharitra, dia hisakana azy tsy ho tonga mpianatra kristianina “hipetra-potsiny na tsy hamokatra” indray. — 2 Pet. 1:5-8, NW.