Manomeza Voninahitra An’i Jehovah Amin’ny Asa Tsara
1 Rehefa tratran’ny tafio-drivotra mahery ianao, dia faly erỳ rehefa mahita fialofana! Raha mafana sy manome fiarovana ilay izy, ary tia mandray vahiny ny olona ao, dia faly ianao mijanona ao. Mitarika ny olona ho amin’izany karazana fialofana amin’ny fandehan-javatr’i Satana izany, ny asa fitoriana momba ilay Fanjakana. Moa ve ny fitondran-tenantsika isan’andro afaka manampy ny hafa hahita fa tena manintona io toeram-pialofana manome fiarovana io? Eny, satria nilaza i Jesosy fa ‘hahita ny asa soa ataontsika ny olona, ka hankalaza ny Raintsika izay any an-danitra’. — Matio 5:16.
2 Amin’ny fomba ahoana no ahafahantsika mitondra tena, ka hahatonga ny asantsika hisarika ny hafa ho amin’i Jehovah sy ny fandaminany? Tokony havelantsika hamolavola ny fiainantsika isan’andro ireo tenin’i Jesosy ao amin’ny Lioka 6:31 sy 10:27. Izany dia hanosika antsika hiahy amim-pitiavana ny mpiara-belona amintsika, ka hiavaka amin’ity tontolo tsy mihontsina sy mafy fo ity isika.
3 Ny anabavy iray nandeha baka dia nahatsikaritra vehivavy tanora iray nisalebolebo aoka izany, ka tsy afaka nikarakara ny zanany kely. Nilaza ny hikarakara ilay zazakely ilay anabavy. Rehefa nanontany ilay vehivavy hoe ahoana no hahafahany haneho ny fankasitrahany, dia nilaza ilay anabavy hoe: ‘Mba henoy ireo Vavolombelon’i Jehovah rehefa mitsidika izy ireo amin’ny manaraka.’ Nanao izany ilay vehivavy, ka Vavolombelona izy sy ny vadiny ankehitriny. Ny asa tsara no tena nahatonga azy ireo handray ny hafatra momba ilay Fanjakana.
4 Ny fiainantsika manontolo no tafiditra: Ny fihevitry ny hafa momba antsika sy ny fivavahantsika dia miankina amin’ny fitondran-tenantsika eo amin’ny fiaraha-monina, any am-piasana sy any an-tsekoly, ary mandritra ireo fotoam-pialam-boly. Koa tokony hanontany tena àry isika hoe: ‘Ahoana no fiheveran’ny olona ahy sy ny fianakaviako? Hitan’ny mpifanila trano aminay ho madio sy voakarakara tsara ve ny tranonay sy ny tokotaninay? Mahita anay ho marim-potoana sy mazoto ve ny mpiara-miasa sy mpiara-mianatra? Hihevitra ny fisehoanay ivelany ho maotina sy mendri-kaja ve ny hafa?’ Afaka mahatonga ny fanompoam-pivavahana amin’i Jehovah hanintona kokoa ny hafa ny asa tsarantsika.
5 Nampitandrina i Petera fa hesoin’ny olona ny Kristianina. (1 Pet. 4:4). Tokony hataontsika azo antoka fa tsy ny fitondran-tenantsika no mahatonga ny olona hanaratsy antsika. (1 Pet. 2:12). Raha manome voninahitra an’ilay Andriamanitra tompointsika ny asantsika isan’andro, dia ho toy ny jiro asandratra ambony isika, ka hitarika ny olona ho ao amin’ilay toeram-pialofana manome fiarovana omen’i Jehovah. — Matio 5:14-16.