Mitantara Ireo Mpitory Ilay Fanjakana

Asa Soa Izay Mankalaza An’i Jehovah

TAO amin’ilay Toriteniny teo An-tendrombohitra, dia hoy i Jesosy tamin’ireo mpianany: “Aoka hazava eo imason’ny olona toy izany koa ny fahazavanareo, mba hahitany ny asa soa ataonareo ka hankalazany ny Rainareo Izay any an-danitra.” (Matio 5:16). Toy izany koa, ireo Kristiana marina amin’izao andro izao dia revo amin’ny fanaovana “asa soa” izay mankalaza an’i Jehovah.

Inona avy izany asa soa izany? Voafaoka amin’izany ny fitoriana ny vaovao tsara, kanefa tapany lehibe aminy koa ny fitondran-tenantsika fakan-tahaka. Ny fitondran-tenantsika tsara matetika no manintona voalohany ny olona ho amin’ny kongregasiona kristiana. Ireto zavatra niainana manaraka ireto dia manazava ny fomba narahin’ireo Vavolombelon’i Jehovah any Martinique mba ‘hampahazava eo imason’ny olona ny fahazavany’.

◻ Teo am-panaovany ny asa fitoriana isan-trano, dia nitsidika vehivavy katolika iray, ny Vavolombelon’i Jehovah iray. Efa hatramin’ny 25 taona io vehivavy io no nanao tokantranomaso tamin-dehilahy iray. Nahafantatra ny fampianaran’ny Vavolombelon’i Jehovah izy satria tokony ho fito taona talohan’izay, dia naharay ilay boky hoe Azonao Atao ny Hiaina Mandrakizay ao Amin’ny Paradisa eto An-tany izy.a Hoy ilay vehivavy tamin’ilay Vavolombelona: “Misy fivavahana maro loatra. Tsy fantatro hoe iza no tokony hinoana eo amin’izao fisafotofotoana rehetra izao.” Nanazava ilay Vavolombelona fa tsy hita afa-tsy ao amin’ny Baiboly ihany ny fahamarinana, ary mba hahitana azy io, dia tsy maintsy mianatra ny Soratra Masina amim-pitandremana izy, sy mivavaka amin’Andriamanitra mba hahazo ny fanahiny sy ny fitarihany.

Nandritra ny fe-potoana iray, na dia liana tamin’ny fianarana ny Baiboly aza ilay vehivavy, dia nanda fanasana maromaro mba hanatrika ireo fivoriana kristiana tany amin’ny Efitrano Fanjakanan’ny Vavolombelon’i Jehovah. Nahoana? Faran’izay saro-kenatra izy. Kanefa rehefa avy naharay fanasana ho any amin’ny Fahatsiarovana ny Nahafatesan’i Kristy izy, dia nandresy ny hasarotan-kenany ka nanatrika.

Ny nahatalanjona azy indrindra tamin’ilay fivoriana dia ilay rivo-piainana feno fitiavana tao amin’ny Efitrano Fanjakana. Mbola tsy nahita fisakaizana marina toy izany mihitsy izy tany amin’ny fiangonany! Taorian’io fivoriana io izy dia nanomboka nanatrika ireo fivoriana rehetra nataon’ireo Vavolombelona teo an-toerana, ary tsy ela izy dia nivady tamin’ilay lehilahy niara-niaina taminy. Mpikambana vita batisa ao amin’ny kongregasiona izy izao.

◻ Nitondra vokany tsara ny asa soa nataon’ny Vavolombelona hafa iray. Nanana toerana nisy andraikitra izy tao amin’ny fiasana iray. Rehefa nisy lehilahy iray avy tany amin’ny nosy La Réunion nokaramaina, dia nanomboka nanaraby azy io noho ny hafohiny, ny mpiasa sasany. Nanjary natao fihomehezana izy. Nifanohitra tamin’izany ilay Vavolombelona fa tsara fanahy sy nanaja foana an’ilay lehilahy. Tsy ela izy dia nanontany ny antony naha-hafa aoka izany an’ilay Vavolombelona.

Nanazava ilay Vavolombelona fa ny fitondran-tenany feno fanajana dia vokatr’ireo fotopoto-pitsipiky ny Baiboly izay nianarany avy tamin’ny Vavolombelon’i Jehovah. Nasehony azy koa izay lazain’ny Soratra Masina momba ny fikasan’Andriamanitra sy ny fanantenana tontolo vaovao iray. Nanaiky fianarana ny Baiboly ilay lehilahy sady nanomboka nanatrika ireo fivoriana kristiana, ary nivady tamin’ilay vehivavy niara-niaina taminy.

Tatỳ aoriana izy dia niverina tany La Réunion. Tamin’ny lasa izy dia nahita fahasahiranana tamin’ireo havany, indrindra fa tamin’ireo havam-badiny. Izao anefa izy ireo dia tena talanjona noho ny fitondran-tena kristiana tsara dia tsara ananany. Natao batisa ilay lehilahy, ary amin’izao fotoana izao izy dia mpanampy amin’ny fanompoana. Misy mpianakaviny maromaro, anisan’izany ny vadiny sy ny zanany roa vavy, manompo koa ao amin’ny kongregasiona kristiana amin’ny maha-mpitory ny vaovao tsaran’ny Fanjakan’Andriamanitra.

[Fanamarihana ambany pejy]