Ataovy Izay Hahazoanao ny Zavatra Ara-panahy Ilainao
1 Tena afaka hahazo ny zavatra ara-panahy ilaintsika isika, mandritra ny Fivoriamben’ny Vondrom-paritra ho avy, “Mpitory Ilay Fanjakana Mazoto.” Toy ny sakafo mahasalama ilay fandaharana, ary azo antoka fa hamelona antsika eo amin’ny lafiny ara-panahy, “amin’ny tenin’ny finoana.” (1 Tim. 4:6) Hanampy antsika mba ho akaiky kokoa an’i Jehovah izy io. Manantena ny handray torohevitra sy fampaherezana koa isika, mba hanampiana antsika hiatrika ireo fisedrana eo amin’ny fiainantsika. Manome toky antsika i Jehovah hoe: “Hanome saina anao sy hampianatra anao izay làlan-kalehanao Aho; hitsinjo anao ny masoko ka hanolo-tsaina anao Aho.” (Sal. 32:8) Tena faly mihitsy isika manana ny tari-dalany feno fitiavana eo amin’ny fiainantsika! Diniho ny zavatra sasany azontsika ampiharina mba handraisan-tsoa faran’izay betsaka amin’ny fandaharan’ny fivoriambe.
2 Mila manomana ny fontsika isika: Andraikitsika tsirairay ny miaro ny fontsika ara-panahy. (Ohab. 4:23) Mila mamola-tena sy miezaka mba ho marina amin’ny tenantsika àry isika. Ny fivoriambe dia fotoana hisaintsainana momba ny fifandraisantsika amin’i Jehovah, handinihana ny ‘lalàna tanteraka, dia ny lalàn’ny fahafahana.’ Mba hanomanana ny fontsika ‘hanaiky ny teny nambolena’, dia tokony hitalaho amin’i Jehovah isika mba handinika antsika, sy hamantatra izay “làlana mampahory” ilaina hahitsy, ary hitarika antsika amin’ny “làlana mandrakizay.”—Jak. 1:21, 25; Sal. 139:23, 24.
3 Tokony hihaino sy hisaintsaina isika: Hoy i Jesosy nidera an’i Maria noho izy nihaino tsara ny teniny: “Maria no efa nifidy ny anjara tsara, izay tsy halaina aminy.” (Lioka 10:39, 42) Tsy havelantsika hanelingelina antsika ny zavatra tsy dia manao ahoana, raha toy izany ny toe-tsaintsika. Hataontsika izay hipetrahana sy hifantohana tsara mandritra ilay fandaharana manontolo. Tsy hiresadresaka na hivezivezy tsy amin’antony isika, ary hitandrina mba tsy hanelingelina ny olona amin’ny telefaonina fitondra mandeha na ny fakan-tsary, sy ny sisa.
4 Tsara raha mandray an-tsoratra fohy isika rehefa mihaino ny lahateny, mba handinihana ny fomba amelabelarana ilay foto-kevitra. Tokony hampifandraisintsika amin’izay efa fantatsika ny zavatra henointsika. Amin’izay dia ho azontsika sy ho tadidintsika ny hevitra. Mila mieritreritra ny fampiharana ireo hevitra isika rehefa mijery indray ny zavatra noraisintsika an-tsoratra. Afaka manontany toy izao àry isika tsirairay: ‘Inona no vokatr’izany eo amin’ny fifandraisako amin’i Jehovah? Inona avy no fanitsiana ilaiko hatao eo amin’ny fiainako? Ahoana no azoko ampiharana izany hevitra izany amin’ny fifandraisako amin’ny hafa? Ahoana no azoko ampiasana izany eo amin’ny fanompoako?’ Resaho amin’ny hafa izay hevitra tena nankasitrahantsika. Izany dia hanampy antsika hirakitra ny tenin’i Jehovah ‘ao am-pontsika.’—Ohab. 4:20, 21.
5 Aoka isika hampihatra izay ianarantsika: Nisy lehilahy nilaza toy izao, rehefa avy nanatrika ny fivoriamben’ny vondrom-paritra: “Tena ny tsirairay mihitsy no voakasika tamin’ilay fandaharana. Nanosika ny tsirairay izy io mba handinika izay ao am-pony sy ao am-pon’ny fianakaviany, ary mba hanampy azy ireo amim-pitiavana, amin’ny alalan’ny Soratra Masina. Nanampy ahy izy io hahatakatra kokoa fa tokony hanampy bebe kokoa ny fiangonana aho.” Azo inoana fa mahatsapa izany ny ankamaroantsika. Tsy ampy anefa ny mahatsapa fa nampahery sy nanatanjaka ny fivoriambe. Hoy i Jesosy: “Raha fantatrareo izany, dia sambatra hianareo, raha manao izany.” (Jaona 13:17) Tsy maintsy ampiharintsika tsara ireo hevitra mahakasika antsika manokana. (Fil. 4:9) Izany no fomba tena ahazoantsika ny zavatra ara-panahy ilaintsika.
[Efajoro, pejy 5]
Saintsaino Izay Henoinao:
■ Inona no vokatr’izany eo amin’ny fifandraisako amin’i Jehovah?
■ Ahoana no azoko ampiharana izany eo amin’ny fifandraisako amin’ny hafa?
■ Ahoana no azoko ampiharana izany eo amin’ny fiainako sy ny fanompoako?