Fandaharana Vaovaon’ny Fivoriambe Manokana Iray Andro
1 Manindrahindra ny harena ny haino aman-jery sy ny mpanabe, fa ny Tenin’Andriamanitra kosa mampirisika hoe: “Aoka Ianao Hanankarena Amin’ny Asa Tsara.” (1 Tim. 6:18) Io no foto-kevitry ny fivoriambe manokana iray andro, hatao manomboka amin’ny Septambra 2002. Inona no fampaherezana ho azontsika mandritra io fivoriambe io?
2 Ny mpiandraikitra ny faritra dia hanao ilay lahateny hoe “Aoka Ianao Hanankarena Ara-panahy.” Hanadinadina olona sasany miezaka hanangona harena ara-panahy izy. Hohazavain’ny mpandahateny mpitsidika kosa, mandritra ny lahateniny voalohany, ny fomba hanaovan’ny vahoakan’Andriamanitra “Asa Tsara Amin’izao Fotoam-pijinjana Izao.” Hampirisika antsika tsirairay handinika izay azontsika atao izany, mba handraisana anjara bebe kokoa amin’ny asa fijinjana nandidian’Andriamanitra, izay tontosaina ankehitriny.
3 Finaritra erỳ isika rehefa mahita tanora kristianina miezaka hanangona harena ara-panahy! Sady manome voninahitra an’i Jehovah izany, no manampy ny tanora hametraka fototra tsara ho amin’ny tombontsoam-panompoana mbola ho azony. Hanasongadina ny asa tsara ataon’ny tanora kristianina eto amintsika ilay anjara hoe “Deraina ny Tanora Manao Asa Tsara ho Voninahitr’i Jehovah.”
4 Inona avy no vokatry ny fanaovana asa tsara? Hiresaka momba izany ny mpandahateny mpitsidika, ao amin’ilay lahateniny farany hoe “Tohizo ny Asa Tsara dia Hotahin’i Jehovah Ianao.” Horesahiny ireo fitahiana ho azon’ny: 1) tsirairay, 2) fianakaviana, 3) fiangonana, ary 4) ny fandaminana.
5 Hanana fahafahana hatao batisa ireo efa nanolo-tena ho an’i Jehovah. Miresaha amin’ny mpiandraikitra mpitantan-draharaha avy hatrany, raha efa vonona ho amin’izany dingana izany ianao.
6 Manaova avy hatrany fandaharana tsara mba hanatrehana ny fivoriambe, raha efa voalaza ny datin’ny fivoriambe ho an’ny faritra misy anao. Miezaha ho tonga aloha, mba ho afaka handray anjara amin’ny hira sy ny vavaka fanokafana. Hampahery antsika ny fanatrehana sy ny fihainoana tsara mandritra ilay fandaharana manontolo, ka hahatonga antsika hanana fiainana mampanan-karena hatrany eo anatrehan’i Jehovah Andriamanitsika.