Tahafo ny Hatsaram-panahin’i Jehovah
1 Tsy voatosika hisaotra an’i Jehovah, ilay Loharanon’ny zavatra tsara rehetra, ve isika rehefa avy mandinika masoandro mody tsara tarehy, na mihinana sakafo matsiro? Tsara fanahy amintsika izy, ka voatosika hanahaka azy isika. (Sal. 119:66, 68; Efes. 5:1) Ahoana àry no anehoantsika hatsaram-panahy toa azy?
2 Amin’ny olona tsy Vavolombelona: Fomba iray anahafantsika ny hatsaram-panahin’i Jehovah ny fiahiantsika amim-pahatsorana ny olona tsy mpiray finoana amintsika. (Gal. 6:10) Mety hahatonga azy ireny handray tsara antsika Vavolombelon’i Jehovah sy ny hafatra entintsika, ny fanehoantsika hatsaram-panahy amin’ny fomba isan-karazany.
3 Nipetraka teo akaikin’ny ramatoa be taona iray, ohatra, ny rahalahy mpisava lalana tanora iray, tany amin’ny toerana fizahana marary tany amin’ny hopitaly. Toa narary kokoa noho ny ankamaroan’ny olon-kafa teo ilay ramatoa. Rehefa anjaran’ilay rahalahy ny nankao amin’ny dokotera, dia navelany handeha alohany ilay ramatoa. Nihaona tamin’ilay ramatoa teny an-tsena izy tatỳ aoriana, ary tena faly ilay ramatoa nahita azy. Tsy nandray ny vaovao tsara izy taloha, nefa nilaza tamin’ilay rahalahy izy hoe fantany izao fa hay tena tia ny mpiara-belona aminy ny Vavolombelon’i Jehovah. Lasa nianatra Baiboly tsy tapaka izy.
4 Amin’ireo rahalahintsika: Manahaka ny hatsaram-panahin’i Jehovah koa isika rehefa miezaka manao izay vitantsika mba hanampiana ny mpiray finoana amintsika. Anisan’ireo tonga voalohany mba hanampy ny rahalahintsika, ohatra, isika, rehefa misy loza. Maneho hatsaram-panahy koa isika rehefa manampy ireo mila fitaterana mba handehanana hivory, sy mitsidika ireo efa osa, ary miezaka mifandray kokoa amin’ny olona tsy fantatsika tsara.—2 Kor. 6:11-13; Heb. 13:16.
5 Fomba hafa anehoan’i Jehovah hatsaram-panahy ny ‘famelany heloka.’ (Sal. 86:5) Asehontsika fa manahaka ny hatsaram-panahin’i Jehovah isika, rehefa mamela ny heloky ny hafa. (Efes. 4:32) Hahatonga ny fifandraisantsika amin’ny mpiara-manompo ho ‘tsara sy hahafinaritra’ izany.—Sal. 133:1-3.
6 Enga anie ny zavatra tsara maro be ataon’i Jehovah hahatonga antsika ho feno fifaliana sy hidera azy hatrany. Enga koa anie izany hanosika antsika hanahaka azy, ka hiezaka haneho hatsaram-panahy eo amin’izay rehetra ataontsika.—Sal. 145:7; Jer. 31:12.