Fitoriana Tsy Amin’ny Teny
1 Tsy miteny ny zavaboary, nefa milaza zavatra betsaka momba ny toetra tsy hita mason’i Jehovah. (Sal. 19:1-3; Rom. 1:20) Toy izany koa fa miteny ho azy ny fitondran-tena tsara sy ny toetra kristianina, ary ny fitafiana sy taovolo maotina mampiavaka antsika. (1 Pet. 2:12; 3:1-4) Ny “hampamirapiratra ny fampianaran’Andriamanitra Mpamonjy antsika, amin’ny zava-drehetra” no tokony ho faniriantsika tsirairay.—Tit. 2:10.
2 Afaka hampamirapiratra ny fampianaran’ny Baiboly ve ny olona tsy lavorary? Tsy ho vita mihitsy izany, raha tsy noho ny fitarihan’ny Tenin’Andriamanitra sy ny herin’ny fanahy masina. (Sal. 119:105; 143:10) “Velona sy mahery [mantsy] ny tenin’Andriamanitra, eny, maranitra noho ny sabatra roa lela.” (Heb. 4:12) Tonga hatrany anatintsika ny herin’izy io, ary manampy antsika hitafy ny toetra vaovao. (Kol. 3:9, 10) Mamokatra toetra mahatehotia ao amintsika kosa ny fanahy masina, ka anisan’izany ny hatsaram-panahy, fanaovan-tsoa, fahalemem-panahy ary fifehezan-tena. (Gal. 5:22, 23) Mamela ny tenin’Andriamanitra sy ny fanahiny hanan-kery eo amin’ny fiainantsika ve isika tsirairay?—Efes. 4:30; 1 Tes. 2:13.
3 Voamariky ny olona: Voamariky ny olona isika rehefa mankatò ny fitsipik’i Jehovah sy miezaka mafy haneho ny toetrany. Diniho, ohatra, ny amin’ny lehilahy iray nesoin’ny mpiara-miasa taminy noho ny hafohiny. Nitondra azy tamim-pahamendrehana sy tamim-panajana foana kosa ny anabavy iray niray birao taminy. Nanontany an’ilay anabavy àry izy hoe nahoana no hafa toy izany ny fihetsiny. Nohazavain’io anabavy io taminy fa zatra nanaja olona izy, satria nampihatra ny toro lalan’ny Baiboly. Nolazainy taminy koa ny fanantenana kanto momba ilay Fanjakana. Nanomboka nianatra Baiboly ilay lehilahy, ary nandroso ho amin’ny batisa. Gaga be ny havany nahita ny fitondran-tenany tsara, rehefa niverina tany amin’ny taniny izy. Maromaro tamin’izy ireo koa no nanaiky ny fahamarinana.
4 Koa na any am-piasana isika, na any am-pianarana, na eo anivon’ny havana aman-tsakaiza, dia hahatonga ny olona hanome voninahitra an’Andriamanitra ny fitondran-tenantsika tsara sy ny fitoriantsika.—Matio 5:16.