Fanaovana Fanambarana Amin’ny Alalan’ny Fitondran-tena Tsara
1 Eo amin’ny fitambaran’olona milefitra loatra amin’izao andro izao, dia tanora maro no mandanilany foana ny fiainany amin’ny zava-mahadomelina, ny fahalotoam-pitondran-tena, ny fikomiana, ary ny herisetra. Mifanohitra amin’izany ny fitondran-tena fakan-tahaka ananan’ny tanora madio ao amin’ny kongregasiona kristianina, ka mamelombelona ny fijerena azy, ary azo antoka fa zavatra kanto eo imason’i Jehovah. Izany dia fanambarana mahery izay mety hahasarika ny hafa ho amin’ny fahamarinana. — 1 Pet. 2:12.
2 Fitantarana maro no mampiseho fa ny fitondran-tena tsaran’ireo tanora kristianina dia nisy vokany tsara teo amin’ny mpitazana. Rehefa niresaka momba ny Vavolombelona tanora iray izay mpianany, ny mpampianatra iray dia nilaza tamin’ilay kilasy manontolo fa i Jehovah, ilay Andriamanitr’io zazavavy io, no Andriamanitra marina. Nilaza izany izy satria feno fanajana foana ilay zazavavy. Nanoratra toy izao tamin’ny Fikambanana ny mpampianatra hafa iray: “Maniry hidera anareo aho, noho ireo tanora tsara dia tsara ao amin’ny fivavahanareo. (...) Tena ohatra mihitsy ny tanoranareo. Manaja ireo zokiny amin’ny taona, sy mahalala fomba, ary mitafy amin’ny fomba maotona izy ireo. Ary tena fantany mihitsy ny Baiboliny! Izany ka fivavahana!”
3 Niaiky volana noho ny fitondran-tena tsara dia tsaran’ny Vavolombelona iray, fito taona, tao amin’ny kilasiny, ny mpampianatra hafa iray. Nahasarika azy ny toetra malefaka sy mahafinaritr’ilay zazalahy, izay nampiavaka azy tanteraka tamin’ireo zazalahy hafa. Nanaitra an’ilay mpampianatra ny fihetsik’ilay zazalahy tsy nivazivazy raha ny amin’ny finoany, ary tsy menatra ny tsy hitovy tamin’ny hafa noho izay ninoany. Hitan’ilay mpampianatra fa nozarina nampiasaina tsara ny feon’ny fieritreretan’ilay zazalahy, izay afaka ‘nanavaka ny tsara sy ny ratsy’. (Heb. 5:14). Tamin’ny farany, dia nitsidika an’ilay mpampianatra ny renin’ilay zazalahy, ary natomboka ny fianarana Baiboly. Rehefa nandeha ny fotoana, dia natao batisa ilay mpampianatra ary tonga mpisava lalana maharitra izy tatỳ aoriana!
4 Nisy heriny teo amin’ny tovolahy iray ny fitondran-tena tsaran’ny Vavolombelona iray tao an-tsekoliny. Tena hafa izy io — tena nahalala fomba, sy nazoto nianatra, ary maotona foana teo amin’ny fiakanjony; afa-tsy izany koa, tsy sahala amin’ireo zazavavy hafa izy fa tsy nijejojejo tamin’ireo ankizilahy mihitsy. Hitan’ilay tovolahy fa niaina nifanaraka tamin’ny foto-pitsipika ara-baiboly ilay zazavavy. Nanontany azy momba ny finoany ilay tovolahy, ary niaiky volana noho izay reny. Nanomboka nianatra izy, tsy ela dia natao batisa, ary tamin’ny farany dia nandray anjara tamin’ny fanompoan’ny mpisava lalana sy ny fanompoana ao amin’ny Betela.
5 Raha tanora kristianina maniry hanao fanambarana tsara dia tsara amin’ny hafa ianareo, dia tandremo ny fitondran-tenanareo amin’ny fomba rehetra. Aza avela hihena ny fiambenanareo, amin’ny fironana hanaraka ny fihetsika, ny fomba fihevitra, na ny fomba fiaina milefitra loatran’izao tontolo izao. Manomeza ohatra ambony dia ambony eo amin’ny fiteninareo, sy ny fiakanjonareo, ary eo amin’ny fisehoanareo ankapobe, tsy rehefa mandray anjara amin’ny fanompoana eny amin’ny saha sy any amin’ireo fivorian’ny kongregasiona ihany, fa rehefa any an-tsekoly sy rehefa manao fanarian-dia koa. (1 Tim. 4:12). Hanana tena fifaliana ianareo, rehefa manjary liana amin’ny fahamarinana ny olona iray, satria namela ny ‘fahazavanareo hazava’ tamin’ny alalan’ny fitondran-tenanareo ianareo. — Matio 5:16.