Tanora Mpanazava
1. Ahoana no ampisehoan’ny Baiboly fa tokony hiavaka ny Kristianina? Manao ahoana ny tanora kristianina ankehitriny?
1 Hoy i Jesosy tamin’ny mpianany: “Ianareo no fahazavan’izao tontolo izao.” (Matio 5:14, 16) Hiavaka toy ny tanàna eny an-tampon-kavoana izy ireo, ary hamirapiratra rehefa tarafin’ny masoandro. Maro ankehitriny ny tanora kristianina tsara fitondran-tena sy mazoto mitory, ka lasa “mpanazava eo amin’izao tontolo izao.”—Fil. 2:15; Mal. 3:18.
2. Inona no anisan’ny fomba azonao itoriana amin’ny mpampianatra sy mpiara-mianatra?
2 Any am-pianarana: Ahoana no hitorianao any am-pianarana? Nisy tanora nanararaotra ny dinidinika tany am-pianarana momba ny foto-kevitra toy ny zava-mahadomelina, evolisiona, ary ny Famonoana Tambabe. Nasaina nanao famelabelarana momba ny fampihorohoroana ny anabavy iray. Nohararaotiny izany mba hilazana fa ny Fanjakan’Andriamanitra no tena fanantenana ho an’ny olombelona. Nampiaiky an’ilay mpampianatra ilay fikarohana tsara, ka nanjary afaka nitory bebe kokoa ilay anabavy.
3. Ahoana no hisehoanao ho mpanazava any am-pianarana, amin’ny alalan’ny fitondran-tenanao?
3 Fomba hisehoana ho mpanazava koa ny fitondran-tena sy fitafiana ary taovolo maotina. (1 Kor. 4:9; 1 Tim. 2:9) Mety ho liana amin’ny fahamarinana ny mpianatra sy ny mpampianatra raha hitany fa miavaka ny fitondran-tenanao. Ho afaka hiresaka ny fahamarinana amin’izy ireny ianao amin’izay. (1 Pet. 2:12; 3:1, 2) Tsy mora angamba ny maneho toetra tsara, nefa tena hitahy anao i Jehovah. (1 Pet. 3:16, 17; 4:14) Azonao atao koa angamba ny mamaky ny bokintsika mandritra ny fakan-drivotra, na mametraka izany eo amin’ny toerana mora tazana, mba hahaliana ny olona.
4. Inona no anisan’ny soa azo, noho ny fitoriana any am-pianarana?
4 Manatanjaka ny finoanao sy manampy anao hirehareha amin’ny fanompoana an’i Jehovah ny fisehoana ho mpanazava any am-pianarana. (Jer. 9:23) Miaro anao koa izany. Hoy ny anabavy iray: “Tsara ny niresahako ny finoako tamin’ny mpiara-mianatra amiko, satria nahatonga azy ireo tsy ho sahy hanery ahy hanao zavatra mifanohitra amin’ny Baiboly izany.”
5. a) Ahoana no anitaran’ny tanora sasany ny fanompoany? b) Inona no tanjonao eo amin’ny fanompoana?
5 Fanitarana ny fanompoana: Fomba isehoan’ny tanora ho mpanazava koa ny fanitarana ny fanompoana. Nifindra tany amin’ny toerana nila mpitory maro kokoa ny rahalahy iray, rehefa vita ny fianarany tany amin’ny lise. Fiangonana kely tsy nisy afa-tsy anti-panahy iray no nisy azy tany. Hoy izy tamin’ny namany iray: “Tena faly aho eto. Mamelombelona erỳ ny fanompoana! Miresaka mandritra ny 20 minitra isam-baravarana izahay, satria tena te hihaino anay ny olona.” Hoy koa izy: “Tiako hanao toy izany ny tanora rehetra, ka hahatsapa izay tsapako. Tsy misy tsara noho ny hoe izay rehetra ananantsika no ampiasaintsika hanompoana an’i Jehovah.”
6. Mampirehareha anao ve ireo tanora eo anivon’ny fiangonanao?
6 Tena mirehareha aminareo tanora mpanazava eo amin’izao tontolo izao izahay! (1 Tes. 2:20) Hahazo ‘avo zato heny [ianareo] amin’izao andro izao, ary fiainana mandrakizay ao amin’ilay tontolo ho avy’, raha manompo an’i Jehovah amin’ny fonareo sy ny tenanareo ary ny sainareo sy ny herinareo manontolo.—Marka 10:29, 30; 12:30.