Ataovy Izay Handrosoan’ny Fampianarana Baiboly eo Am-baravarana
1. Inona no tanjontsika rehefa mampianatra Baiboly?
1 Tena mahafaly ny manomboka fampianarana Baiboly! Vao fiandohana fotsiny anefa ny mahita olona te hianatra Baiboly. Izay hahatonga azy ho lasa tena mpianatr’i Kristy no tanjona amin’ilay fianarana. (Matio 28:19, 20) Inona no hanampy antsika ho tonga amin’izany?
2. Inona no atao hoe fampianarana Baiboly eo am-baravarana na an-telefaonina, ary nahoana izany no mandaitra?
2 Amin’ny olona be atao: Mihabe atao ny olona ankehitriny. Any amin’ny faritra sasany, dia vitsy ny olona vonona hanokana adiny iray amin’ny voalohany, mba hianarana Baiboly. Ampirisihina hanomboka fampianarana Baiboly eo am-baravarana na an-telefaonina àry isika, mba hanampiana azy ireny. Mety ho fohy izany fianarana izany, amin’ny voalohany. Andinin-teny vitsivitsy monja avy amin’ny fehintsoratra iray na roa, ao amin’ny boky Ampianarina angamba, ohatra, no iarahana midinika. Mahate hidera tokoa, fa maro ankehitriny ny mpitory mampianatra Baiboly eo am-baravarana na an-telefaonina!
3. Nahoana no tokony hatao ela kokoa ny fotoana ianarana eo am-baravarana?
3 Tokony hatao eo am-baravarana foana ve anefa ilay fianarana? Tsia. Marina aloha fa tsy fahendrena ny miresaka ela eo am-baravarana, raha vao manomboka ilay fianarana. Hoy anefa Ny Fanompoantsika Ilay Fanjakana Mey 1990: ‘Tsara raha atao ela kokoa amin’izay ilay fianarana, rehefa mianatra tsy tapaka ilay olona, ary mihatiany ilay izy.’ Asehon’ity ohatra ity fa tena ilaina izany: Mety ho sakafo kely fotsiny aloha no homena ny ankizy iray mosarena mandra-pahafahany hisakafo betsaka kokoa. Hatanjaka tsara indray sy hitombo ara-dalàna ve anefa izy, raha sakafo kely toy izany foana no omena azy, am-bolana maro? Toy izany koa fa mila mianatra Baiboly bebe kokoa sy tsy tapaka ilay mpianatra, mba ho tonga Kristianina matotra.—Heb. 5:13, 14.
4. Inona no soa azo rehefa ao an-trano no mianatra Baiboly?
4 Fampianarana Baiboly ao an-trano: Tsara kokoa raha atao ao an-trano na any amin’ny toerana hafa tsy voahelingelina ny fianarana. Ho mora kokoa amin’izay ny mianatra ka hanampy an’ilay mpianatra hahazo tsara ny hevitry ny Tenin’Andriamanitra izany. (Matio 13:23) Ho afaka hampifanaraka ny fianarana amin’izay ilain’ny mpianatra koa ilay mpampianatra amin’izay. Ho vita tsara kokoa ny fianarana sady hanatanjaka finoana rehefa atao ela kokoa.—Rom. 10:17.
5. Ahoana no hatao mba ho lasa ao an-trano ilay fampianarana Baiboly natomboka teo am-baravarana?
5 Ahoana àry no hatao mba ho lasa ao an-trano ilay fampianarana Baiboly natomboka teo am-baravarana? Rehefa avy nianatra imbetsaka teo am-baravarana ianareo, nahoana raha anontaniana fotsiny izy raha te hianatra ela kokoa? Azonao faritana hoe adiny firy ilay izy. Na hanontany azy ianao hoe: “Mety hanam-potoana ve ianao izao, raha hipetraka isika mandritra ny fianarana?” na “Manana adiny firy ianao anio, mba hianarana an’ity loha hevitra ity?” Mazava ho azy fa tokony hotohizinao eo am-baravarana ihany ilay fianarana, raha tsy mandaitra ireo fomba ireo. Andramo indray ilay izy any aoriana, mba ho lasa ao an-trano ny fianaranareo.
6. Inona no tokony ho tanjontsika eo amin’ny fanompoana? Ary ahoana no anampian’ireo soso-kevitra ato amin’ity lahatsoratra ity antsika hanatratra izany?
6 Ny hanampy ny olona tso-po ho tonga mpanompon’i Jehovah vita fanoloran-tena sy batisa no tanjontsika, rehefa mampianatra Baiboly. Enga anie ka tsy hohadinointsika mihitsy izany eo am-pitadiavantsika ireo mendrika. Hotahin’i Jehovah anie ny ezaka ataontsika eo amin’ny fanompoana mba hanatratrarana izany!—2 Tim. 4:5.