Aoka Ianao Hiahy ny Olona ka ho Tsara Fanahy sy Hanaja Azy Ireny
1 “Tsara fanahy amintsika” i Jehovah. (Efes. 2:7) Mpanjakan’izao Rehetra Izao izy, nefa maneho hatsaram-panahy sy miahy ny olombelona tsy lavorary ary manaja azy ireny. (Gen. 13:14; 19:18-21, 29) Mihatsara ny fomba fitorintsika ny vaovao tsara, raha tsara fanahy toa an’Andriamanitra isika. (Kol. 4:6) Tsy ampy anefa ny maneho fahalalam-pomba sy miresaka amim-panajana, raha tiantsika ny haneho hatsaram-panahy.
2 Fitoriana isan-trano: Ahoana raha mbola maika na sahirana be ilay tompon-trano amin’ny fotoana ahatongavantsika? Tokony hanisy fiheverana ny toe-javatra toy izany isika, ka hilaza fa hiverina amin’ny manaraka, na tsy ho lava resaka. Raha tsara fanahy amin’ny olona isika, dia tsy hanery azy handray ny boky na gazetintsika rehefa tsy mety mandray izy. Hanaja ny fananan’ny hafa koa isika raha miahy azy ireo. Hofafantsika tsara, ohatra, ny tongotsika alohan’ny hidirana ao an-tranony, ary hakatotsika tsara ny varavarana. Hampianarintsika hanao toy izany koa ny zanatsika. Tokony hataontsika azo antoka fa tsy ho hitan’ny mpandalo ny zavatra apetratsika mba hovakin’ireo tsy tratra an-trano. Ny hatsaram-panahy tokoa no hanosika antsika hitondra ny hafa toy izay tiantsika hitondrana antsika.—Lioka 6:31.
3 Fitoriana eny an-dalana: Aoka isika hahalala fomba rehefa mitory eny an-dalana, ka tsy hanakantsakana ny lalan’ny hafa na hitangorona eo anoloan’ny fivarotana. Tokony hahay hanavaka isika, ka ireo mety hanana fotoana fohy hiresahana no hatonintsika, fa tsy ireo efa hita hoe maika. Mety hila hiteny mafy koa isika rehefa misy tabataba, mba ho re ny zavatra lazaintsika. Na izany aza, dia tokony hanao izany amim-pahamendrehana isika, fa tsy hanintona ny sain’ny hafa ho amin’ny tenantsika.—Matio 12:19.
4 Fitoriana eny amin’ny toerana be fivarotana: Tsy ho lava resaka isika rehefa mitory amin’ny mpivarotra, satria fantatsika fa eo am-perinasa izy. Aleo miverina amin’ny fotoana hafa, raha hitantsika fa mbola sahirana ilay mpivarotra. Raha tsara fanahy aminy isika, dia hilaza avy hatrany ny hafatra entintsika, hanolotra boky na gazety, ary handao azy. Tsy ho sosotra izy amin’izay. (1 Kor. 14:8, 9) Hanahaka an’i Jehovah Andriamanitra àry isika, raha maneho hatsaram-panahy sy miahy ny hafa, ary manaja azy ireny.