“Sambatra Izay Olona Miaritra Hatrany Rehefa Iharam-pitsapana”
1 Tsy maintsy miatrika fitsapana ny Kristianina rehetra. (2 Tim. 3:12) Mety ho aretina izany, na fahantrana, fakam-panahy, fanenjehana, na karazany hafa. Ny zava-kendren’i Satana amin’ireny fitsapana ireny, dia ny hahatonga antsika tsy handroso ara-panahy, na hanao tsirambina ny fanompoana, na tsy hanompo an’Andriamanitra intsony mihitsy. (Joba 1:9-11) Nahoana no lazaina fa mahasambatra ny miaritra fitsapana?—2 Pet. 2:9.
2 Miomàna hiatrika fitsapana: Nanome antsika ny Teniny i Jehovah. Mirakitra fahamarinana izy io, ka anisan’izany ny fiainan’i Jesosy sy ny fampianarany. Ho tsara fototra ny finoantsika, ka ho voaomana hiatrika zava-tsarotra isika, raha mihaino sy mankatò ny tenin’i Jesosy. (Lioka 6:47-49) Mampahery antsika koa ireo rahalahy kristianina, sy ny fivorian’ny fiangonana, ary ny boky sy gazety avoakan’ny mpanompo mahatoky sy malina. Afaka mivavaka tsy tapaka ihany koa isika, ary fanomezan’Andriamanitra izany.—Matio 6:13.
3 Ankoatra izany, dia nomen’i Jehovah fanantenana isika. Ho toy ny “vatofantsiky ny aintsika, sady azo antoka no mafy orina” izy io, raha tena matoky ny fampanantenan’i Jehovah isika. (Heb. 6:19) Tsy maintsy nanana vatofantsika ny sambo tamin’ny andron’ny Baiboly, vao niala teo amin’ny seranana, na tsara aza ny andro. Nalatsaka ilay vatofantsika raha sendra nisy rivo-mahery tampoka, mba tsy hidona amin’ny harambato ny sambo. Ho afaka hiatrika zava-manahirana toy ny rivo-mahery koa isika, raha matoky ny fampanantenan’Andriamanitra. Mety hitranga tampoka mantsy ny fitsapana. Nandray tsara an’i Paoly sy Barnabasy, ohatra, ny olona tany Lystra, rehefa nitory izy ireo. Niova tampoka anefa ny toe-javatra, rehefa tonga ireo Jiosy mpanohitra.—Asa. 14:8-19.
4 Mahasambatra ny miaritra: Manana fiadanan-tsaina isika rehefa mitory foana, na eo aza ny fanoherana. Faly isika satria natao mendrika ny ho afa-baraka noho ny anaran’i Kristy. (Asa. 5:40, 41) Mianatra manetry tena sy mankatò ary miaritra bebe kokoa isika, rehefa tsy mivadika ao anatin’ny fitsapana. (Deot. 8:16; Heb. 5:8; Jak. 1:2, 3) Izany no manampy antsika hiantehitra amin’i Jehovah sy hatoky ny fampanantenany ary hialoka aminy.—Ohab. 18:10.
5 Fantatsika fa mihelina ihany ny fitsapana. (2 Kor. 4:17, 18) Afaka manaporofo ny halalin’ny fitiavantsika an’i Jehovah anefa isika, noho ny fitsapana. Mamaly ny fiampangan’i Satana koa isika rehefa miaritra. Aza manaiky ho resy mihitsy àry! “Sambatra izay olona miaritra hatrany rehefa iharam-pitsapana, satria rehefa ankasitrahana izy, dia hahazo ny satroboninahitry ny fiainana.”—Jak. 1:12.