Fandaharan’ny Fivoriambe Manokana Iray Andro
Izao no foto-kevitry ny fivoriambe manokana iray andro amin’ny taom-panompoana 2008: “Tanimanga Isika, ary i Jehovah no Mpanefy Antsika.” Nalaina avy tao amin’ny Isaia 64:7 izy io. Hahazo torohevitra avy ao amin’ny Baiboly isika amin’io fivoriambe io. Hanjary hazava amintsika sy hankasitrahantsika bebe kokoa ny fahendren’ilay Mpanefy Tanimanga Lehibe, ny fanaovany ny rariny, ny heriny, ary ny fitiavany.
“Ahoana no Hahatonga Antsika ho Fitaovana Mendri-kaja eo Amin’ny Fanompoana?” Izany no lahateny hataon’ny mpiandraikitra ny faritra. Horesahiny fa mihamaro ny olona mahazo fitahiana be, satria mahalala ny fahamarinana sy mitory izany amin’ny hafa. Ho hitantsika amin’ilay lahateny hoe “Hiaro Anao ny Fisaintsainana”, fa ho voaro isika raha misaintsaina ny toro lalana marina avy amin’i Jehovah. Mpandahateny mpitsidika kosa no hanao ireto lahateny ireto: “Aza Manaiky ‘Hovolavolain’ity Tontolo Ity’ ” sy “Avelao Hamolavola Anao Ilay Mpanefy Tanimanga Lehibe.” Hampahery ny ray aman-dreny sy ny tanora ny lahateny hoe: “Tanora Ilain’i Jehovah” sy “Ny Andraikitra Lehibe Tanan’ny Ray Aman-dreny.” Hisy fampisehoana sy fanadinadinana koa amin’io fivoriambe io. Hahafaly antsika ny hahita sy handre ny zava-bitan’ireo rahalahy sy anabavintsika eny amin’ny fanompoana. Tokony hanatona ny mpiandraikitra mpitantan-draharaha haingana araka izay azo atao ireo maniry hatao batisa. Aza hadino ny mitondra Ny Tilikambo Fiambenana hianarana amin’ny herinandron’io fivoriambe io.
Manatanteraka izay rehetra kasainy ilay Mpanefy Tanimanga Lehibe. Anjarantsika tsirairay anefa ny mifidy na hanaiky hovolavolainy isika na tsia. Izao, ohatra, no ataon’ny mpanefy tanimanga mba hahazoana vazy na fitaovana hafa ilaina eo amin’ny fiainana: Volavolainy hanome izay endrika tiany aloha ilay vongan-tanimanga, ataony malama tsara avy eo, ary dorany ao anaty lafaoro. Ho lasa fitaovana ilain’i Jehovah koa isika, raha manaiky hovolavolainy sy hohatsarainy. Hanamarina ny zony hitondra isika ary hahazo fitahiana maro.