Aza Hadinoina Ireo any Amin’ny Trano Fitaizana Be Antitra
1. Nahoana no ilaina ny mitory any amin’ny trano fitaizana be antitra?
1 Maro ny olona mizaka ny vokatry ny fandrosoan’ny taona. (Mpito. 12:1-7) Tsy ny zokiolona rehetra no ho hitantsika rehefa mitory isan-trano isika, satria mipetraka any amin’ny trano fitaizana be antitra ny sasany aminy. Marina fa tsy afaka mandehandeha firy ny zokiolona sy ny olon-kafa mipetraka any amin’ireny toerana ireny sady tsy dia mahatadidy zavatra intsony, nefa mbola afaka ny hianatra momba an’i Jehovah sy ho tia azy izy ireo. Ahoana no izarantsika amin’izy ireo ny vaovao tsara momba ny “zavatra mahafaly antenaintsika”?—Tit. 2:13.
2. Ahoana no atao raha misy trano fitaizana be antitra ao amin’ny faritanin’ny fiangonana?
2 Ny atao voalohany: Misy trano fitaizana be antitra ve ao amin’ny faritanin’ny fiangonanareo? Afaka manao fandaharana ny mpiandraikitra ny fanompoana mba handefasana mpitory mahay any. Matetika no azo atao ny manomboka fampianarana Baiboly amin’ny olona maromaro mitambatra, rehefa voalamina tsara ilay fandaharana sady tsy hadino ny miantehitra amin’i Jehovah.—Ohab. 21:5; 1 Jaona 5:14, 15.
3, 4. a) Iza no tokony hohatonintsika voalohany? b) Ahoana no azontsika anazavana an’ilay fandaharana?
3 Miankina amin’ny karazan’ilay toerana ny fomba iresahana amin’ny tompon’andraikitra. Raha lehibe ilay toerana ary maro ny zokiolona mipetraka ao sady betsaka ny mpiasa, dia tsara raha mankeo amin’ny fandraisana olona ary mangataka hiresaka amin’ny tompon’andraikitra. Raha kely ilay toerana ary vitsy ny zokiolona mipetraka ao ka olona roa na telo monja no miasa ao, dia aleo mifanao fotoana amin’ilay tompon-trano.
4 Na lehibe ilay toerana na kely, dia hazavao hoe te hampahery ny olona tia mamaky sy miresaka momba ny tantara ara-baiboly ianao, ary ataonao an-tsitrapo izany. Anontanio sao dia misy amin’ireo mipetraka ao te hanao fiaraha-midinika antsasak’adiny isan-kerinandro. Isan-karazany ny boky azo ampiasaina, fa maro no mahita hoe be mpitia Ny Bokiko Misy Fitantarana avy ao Amin’ny Baiboly sy Ilay Lehilahy Niavaka Indrindra Teto An-tany. Azonao aseho an’ilay tompon’andraikitra ireo boky ireo. Azo jerena miaraka aminy ny andro sy ora ary efitra hanaovana an’ilay fianarana. Matetika no apetaky ry zareo eo amin’ny fandaharam-potoanany izany mba ho hitan’ny rehetra. Aza menatra mihitsy milaza hoe Vavolombelon’i Jehovah ianao. Ataovy azon’ilay tompon’andraikitra tsara koa anefa hoe tsy hitarika fotoam-pivavahana ianao fa hampianatra Baiboly.
5. Inona no mety hahatonga an’ilay fianarana hahafinaritra sy handraisan-tsoa?
5 Fitarihana an’ilay fianarana: Miankina amin’ny zava-misy ao amin’ilay toerana ny fomba itarihana an’ilay fianarana. Mahaiza àry manavaka sy mampifanara-javatra. Mitondrà maromaro amin’ilay boky hianarana ary alaivo izy ireo aorian’ny fianarana. Mitondrà soratra lehibe amin’ilay boky fa mety hisy hila an’izany. Toy ny mahazatra, dia azo vakina ny fehintsoratra, apetraka ny fanontaniana, ary avy eo valiana. Azo asaina hamaky fehintsoratra na andinin-teny izay te hamaky sy afaka mamaky. Aoka ianao ho sariaka sy tsy ho mora kivy ary ho tsara fanahy mandritra ny fianarana. Azo atao koa indraindray ny mampiseho video an’ny fandaminana, izay mampirisika ny olona hino ny Baiboly na manasongadina lesona avy amin’ny tantara ao amin’ny Baiboly. Mierà anefa aloha amin’ny tompon’andraikitra. Mety ho azo atomboka sy faranana amin’ny vavaka tsotra ilay fianarana. Misy mihitsy aza manao hiran’ilay Fanjakana.
6. Ahoana no hatao raha misy fanoherana?
6 Ahoana raha misy manohitra ny zavatra vakina na ny zavatra resahina mandritra an’ilay fianarana? Mahaiza manavaka rehefa mamaly. (Kol. 4:6) Azonao atao angamba ny mampiseho andinin-teny fohy mamaly mivantana an’ilay izy. Raha tsy mety anefa ny hanaovana an’izany, dia aleo tadidina ny fanamarihany ary ilazana izy hoe rehefa mirava ilay fianarana dia afaka miresaka momba an’ilay izy mitokana ianareo.
7. Inona no azonao atao raha misy tena liana na mametraka fanontaniana?
7 Mety hisy hametraka fanontaniana indraindray, na hilaza hoe te hahazo fanazavana fanampiny. Izao no avalin’ny anabavy iray rehefa misy toy izany: “Tsara be ilay fanontanianao. Fa satria ilay izy fanontanianao manokana, dia aleo isika sy ianao miresaka momba an’izay rehefa vita ny vakitenintsika.” Matetika no azo ampianarina Baiboly mitokana amin’ny fotoana hafa izay liana.
8. Ahoana no hanisana ny fampianarana Baiboly mitambatra sy mitokana?
8 Tsara raha tsy miovaova ny Vavolombelona mitarika ny fianarana Baiboly mitambatra any amin’ny trano fitaizana be antitra. Afaka manisa ora izay mpitory mandray anjara amin’izany. Rehefa mandeha tsara ilay fianarana, dia afaka manisa fiverenana mitsidika iray ilay mpitory isaky ny avy mitarika an’ilay fianarana, ary azony isaina ho fampianarana Baiboly iray isam-bolana izany. Azo isaina toy ny mahazatra ny fampianarana Baiboly atao mitokana amin’ny olona mahatakatra ny fianarana.
9, 10. Inona avy ny toetra ilain’ireo mitarika an’ilay fianarana?
9 Tohizo foana: Tsara raha atao amin’ny andro sy ora raikitra ilay fianarana mitambatra. Manantena ireo zokiolona sy mpiasa ao hoe tsy ho tapatapaka ilay fianarana ary hanomboka sy hifarana ara-potoana. (Mat. 5:37) Ilaina àry ny fahatsapana adidy sy ny fahazotoana ary ny fahaiza-mandamina. Hita hoe tsara raha mpitory mahay roa no mifanampy mitarika an’ilay fianarana. (Mpito. 4:9, 10) Mety ho mpitory maromaro no ilaina raha lehibe ilay toerana.
10 Zava-dehibe koa ny hatsaram-panahy sy ny fiahiana. (Fil. 2:4) Makà fotoana hifankahalalana amin’ny zokiolona tsirairay manatrika an’ilay fianarana, amin’ny fitsidihana voalohany. Soraty ny anarany ary ezaho tadidina alohan’ny fianarana manaraka. Tsy tian’ny zokiolona sasany anefa raha miantso azy amin’ny fanampin’anarany ny olona tsy fantany. Hahazo aina sy hahatsapa hoe tiana ireo zokiolona raha manam-paharetana sy tsara fanahy ny mpitory.
11. Ahoana no ampisehoana fa manaja ny mpiasa sy ny havan’ireo zokiolona isika?
11 Tokony ho tsara fanahy sy hanaja an’ireo mpiasa ao amin’ilay toerana sy ny havan’ireo zokiolona koa ny mpitory. Rehefa mandeha tsara ilay fianarana, dia aleo tsy ovaovana ny fotoana sy ny fomba fanaovana azy raha tsy miresaka amin’ny tompon’andraikitra aloha. Anontanio azy tsindraindray ny vokatr’ilay fianarana eo amin’ireo zokiolona. Miezaha hifankahalala amin’ny havan’ireo zokiolona raha tonga mamangy mandritra ny fianarana izy ireo, ary hazavao ny tanjon’ilay fianarana. Omeo toky izy ireo fa tena miahy ny havany ianao. Asaivo manatrika an’ilay fianarana izy ireo.
12, 13. Tantarao ny soa azo avy amin’ny fitoriana any amin’ny trano fitaizana be antitra.
12 Vokatra azo: Mampahery ny tatitra omen’ny mpiandraikitra mpitety faritany sy ny fiangonana momba an’io endri-panompoana io. Tany amin’ny toerana iray, dia 20 eo ho eo no tonga nanatrika tamin’ny fitsidihana voalohany, ary 6 no lasa nianatra Baiboly mitokana. Nisy iray natao batisa, tatỳ aoriana. Tany an-toeran-kafa indray, dia nisy vehivavy 85 taona lasa te hanatrika fivoriana ary nilaza fa te hatao batisa, rehefa nampianarina Baiboly. Rehefa nanapa-kevitra ny tao amin’ny trano iray fitaizana be antitra fa hajanona ilay fianarana Baiboly mitambatra ataon’ny Vavolombelon’i Jehovah, dia nitaraina tany amin’ny tompon’andraikitra ireo zokiolona. Naverina indray àry ilay fianarana, ary 25 ka hatramin’ny 30 ny mpanatrika.
13 Tsy eo amin’ireo zokiolona ihany ny fitiavana asehontsika no misy vokany. Matetika, ohatra, ny mpiasa no manatrika an’ilay fianarana ary mandray anjara mihitsy aza. Voamariky ny fiaraha-monina koa ny ezaka ataontsika mba hanampiana an’ireo any amin’ny trano fitaizana be antitra. (1 Pet. 2:12) Hoy ny tompon’andraikitra iray rehefa avy nohazavaina taminy ny tanjon’ilay fianarana: “Efa ela mihitsy izahay no nitady an’izany. Dia rahoviana ianareo no hanomboka?” Hoy ny tompon’andraikitra ao amin’ny toerana iray hafa: “Ampirisihiko hanao an’io fianarana mitambatra io ny trano fitaizana be antitra rehetra etỳ amintsika. Anisan’ny zavatra ataon’ny Vavolombelon’i Jehovah ho an’ny fiaraha-monina io fampianarana maimaim-poana io.” Nahazo mari-pankasitrahana avy amin’ny trano fitaizana be antitra any Hawaii koa ny Vavolombelon’i Jehovah, ary nolazainy hoe “harena sarobidy” ho an’ireo ao amin’io toerana io ireo nanolo-tena nampianatra tao.
14. Nahoana isika no tokony hiezaka hanampy an’ireo any amin’ny trano fitaizana be antitra?
14 Asain’i Jehovah midera azy ny zokiolona. (Sal. 148:12, 13) Anisan’izany ireo any amin’ny trano fitaizana be antitra. Misy toerana toy izany ve ao amin’ny faritaninareo? Sao dia misy zokiolona mety handray soa amin’ny vaovao tsara torintsika any? Mety ho azo atao ny mitory any raha miara-miasa amin’ny anti-panahy eo an-toerana sy ny tompon’andraikitra ao amin’ilay trano fitaizana be antitra ny mpitory. Manahaka an’i Jehovah isika raha tsy manadino an’ireo zokiolona.—Sal. 71:9, 18.