Ampiasao Hampianarana ny Zanakao ny Tranonkalantsika
1. Inona no zava-kendren’ilay fizarana hoe “Ankizy”, ao amin’ny tranonkalantsika?
1 Natao ho an’ny olona avy amin’ny sokajin-taona rehetra ny tranonkalantsika jw.org. Manampy ny ankizy sy ny ray aman-dreny hifandray tsara sy ho lasa akaiky kokoa an’i Jehovah ilay fizarana hoe “Ankizy” (jereo ao amin’ilay hoe Fampianaran’ny Baiboly > Ankizy). (Deot. 6:6, 7) Ahoana no azonao ampiasana an’io fizarana io mba hampianarana ny zanakao?
2. Ahoana no hahafantaranao hoe inona no tsara ianarana miaraka amin’ny zanakao?
2 Mahaiza mampifanara-javatra: Samy hafa ny zavatra ilain’ny ankizy tsirairay. (1 Kor. 13:11) Ahoana àry no hahafantaranao hoe inona no tsara ianarana miaraka amin’ny zanakao? Saintsaino ireto: Inona no mety hahaliana ny zanakao? Inona no mety ho takatry ny sain’izy ireo? Afaka mifantoka elaela izy ireo sa tsia? Raha manan-janaka latsaka ny telo taona ianao, dia mety ho azonao ampiasaina ilay hoe “Andao Hianatra Baiboly!” Ny fianakaviana sasany kosa tia an’ilay fizarana hoe “Ampianaro ny Zanakao.” Diniho koa ireto manaraka ireto.
3. Ahoana no azon’ny ray aman-dreny ampiasana ny tantara sy kilalao amin’ilay fizarana hoe “Azo Atao Fotoam-pivavahan’ny Fianakaviana”?
3 Azo Atao Fotoam-pivavahan’ny Fianakaviana: Natao hanampiana ny ray aman-dreny hampianatra ny zanany io fizarana io. Tsindrio ilay hoe “Adikao” ary vakio ny toromarika hoe “Ho An’ny Ray Aman-dreny”, isaky ny mianatra tantara iray. Ampiasao amin’ny ankizikely ny kilalaon-tsary, ohatra hoe ny sary holokoana. Raha efa lehibebe kely kosa ny zanakao, dia ampio hameno an’ireo kilalaon-tsaina. Misy tantara sy lesona samihafa ao amin’ilay fizarana hoe “Azo Atao Fotoam-pivavahan’ny Fianakaviana” ary misy kilalao sy zavatra hafa azo ianarana ao amin’ny tantara tsirairay. Afaka mandray anjara daholo àry ny ankizy rehetra, na firy taona na firy taona, isaky ny hianatra tantara iray.
4. Inona avy no ao amin’ilay fizarana hoe “Ataovy Namanao i Jehovah”?
4 Ataovy Namanao i Jehovah: Manampy ny ray aman-dreny handentika ny Tenin’Andriamanitra ao an-tsain’ny zanany ny video sy hira ary kilalao ao amin’io fizarana io. (Deot. 31:12) Miana-javatra avy amin’ny video tsirairay ny ankizy, ary manamafy an’izany ireo kilalao izay misy amin’ny fiteny sasantsasany. Tia mihira ny ankamaroan’ny ankizy sady manampy azy ireo hitadidy ny zavatra nianarany koa izany. Nasiana hiran’ilay Fanjakana sy hira natao ho an’ny ankizy àry io fizarana io. Misy hira vaovao foana ao ho an’ny fiteny sasantsasany.
5. Nahoana isika no mila ny fanampian’i Jehovah rehefa mampianatra ny zanatsika?
5 Tian’i Jehovah hahomby ianareo ray aman-dreny. Mangataha àry fanampiana aminy rehefa mampianatra ny fahamarinana amin’ny zanakareo. (Mpits. 13:8) Ho afaka hampiofana ny zanakao ho lasa ‘hendry ho amin’ny famonjena, amin’ny alalan’ny finoana an’i Kristy Jesosy’ ianao, noho ny fanampian’i Jehovah.—2 Tim. 3:15; Ohab. 4:1-4.