Ampiasao eny Amin’ny Fanompoana ny jw.org: “Ataovy Namanao i Jehovah”

Misy fizarana hoe “Ataovy Namanao i Jehovah” ao amin’ilay hoe “Fampianaran’ny Baiboly”, ao amin’ny jw.org. Natao ho an’ny ankizy izy io, ary misy hira sy video ary kilalao ao. Efa nampiasa azy io teny amin’ny fanompoana ve ianao? Raha manan-janaka mbola kely ny olona ampianarinao Baiboly, nahoana raha aseho azy izy io? Mety hahatonga azy hijery an’ireo zavatra hafa ao amin’ny jw.org izany.

Nihaona tamin’ny renim-pianakaviana iray ny rahalahy iray rehefa nizara an’ilay Vaovao Momba Ilay Fanjakana No. 38. Tonga dia novakin’ilay vehivavy ilay izy. Manan-janaka kely maromaro ilay vehivavy ary nahaliana azy ireo koa ilay taratasy mivalona. Noresahin’ilay rahalahy vetivety ny tao anatin’ilay izy sy ny adiresin’ny tranonkalantsika hita ao amin’ny pejy farany. Liana ilay vehivavy ka nampijereny video iray misy an’i Kaleba, tamin’ny smartphone tany aminy, izy sy ny zanany.

Noresahin’ny anabavy iray tamin’ny mpiara-miasa aminy ny tranonkalantsika sy ny zavatra hita ao, izay natao ho an’ny fianakaviana. Nojeren’ilay vehivavy sy ny zanany ilay izy. Nilaza tamin’ilay anabavy ilay vehivavy, tatỳ aoriana, fa mihirahira an’ilay hoe “Torio ny Teny” foana ny zanany ao an-trano. Ao amin’ilay hoe “Ataovy Namanao i Jehovah” io hira io.

Fantaro tsara àry ny zavatra ao amin’io fizarana ao amin’ny jw.org io. Makà koa video na hira na kilalao ao, dia ataovy ao anatin’ny fitaovana elektronika anananao. Ho vonona hampiasa azy io eny amin’ny fanompoana ianao amin’izay. Tena manampy antsika hanompo ny Tompo tokoa izy io!—Asa. 20:19.