Hatsarao ny Fanompoanao: Raiso An-tsoratra Izay Liana

Hoy ny apostoly Paoly tamin’i Timoty: “Tandremo tsara foana ny tenanao sy ny fampianaranao.” (1 Tim. 4:16) Hita avy amin’io fa tokony hiezaka isika mba hanatsara ny fanompoantsika, na efa ela isika no mpitory na vao haingana. Hisy andian-dahatsoratra vaovao hoe “Hatsarao ny Fanompoanao” àry ato amin’ny Fanompoantsika Ilay Fanjakana. Hanazava hevitra iray tena ilaina sy hanome soso-kevitra hampiharana an’izany ny lahatsoratra tsirairay. Ampirisihina mba hampihatra an’ilay hevitra ny mpitory mandritra ny volana. Rehefa tapitra ny volana, dia hisy anjara amin’ny Fivoriana Momba ny Fanompoana hahafahan’ny mpanatrika miresaka ny soa noraisiny rehefa niezaka nampihatra an’ilay izy. Ampirisihina isika amin’ity volana ity mba handray an-tsoratra ny mombamomba an’ireo olona liana.

Nahoana izany no tena ilaina? Tsy ny hitory fotsiny no nasaina nataontsika. Mila manondraka ny voa nafafintsika koa isika, izany hoe miverina mitsidika an’ireo olona liana ary mampianatra azy ireo. (Mat. 28:19, 20; 1 Kor. 3:6-9) Midika izany fa mila mankany amin’ilay olona indray isika, miresaka momba izay mampanahy azy, ary manohy an’ilay resaka nataontsika farany. Rehefa mahita olona liana àry isika, dia tokony handray an-tsoratra ny mombamomba azy.