Tsy Maintsy Tondrahana ny Voa mba Haniry
1 Inona no tsy maintsy tondrahana raha tiana haniry?
1 Tsy maintsy tondrahana ny voa nambolena teny amin’ny saha, raha tiana haniry. Toy izany koa ny voan’ny fahamarinana nafafy tao am-pon’ny olona. (1 Kor. 3:6) Tsy maintsy mitsidika an’ireo olona efa nitoriana isika, ka hanondraka an’ireo voa amin’ny alalan’ny Tenin’Andriamanitra, raha tiantsika hamaka sy hitombo ary handrobona izy ireny.
2. Ahoana no ataonao mba hiomanana amin’ny fiverenana mitsidika?
2 Mametraha fanontaniana mahaliana: Rehefa manomana fitoriana ianao, dia tsara koa raha mitady fanontaniana hovaliana rehefa mitsidika an’ilay olona indray. Apetraho ilay fanontaniana rehefa vita ilay fitoriana, ary manaova fotoana voafaritra tsara. Fanontaniana ao amin’ny boky Ampianarina no ampiasain’ny mpitory maro, ka tonga dia afaka manomboka fampianarana izy.
3. Inona avy no azo soratana ao amin’ny fandraisana an-tsoratra?
3 Mandraisa an-tsoratra: Makà fotoana handraisana an-tsoratra, raha vao avy nitory tamin’ilay olona ianao. Soraty ny anarany sy ny adiresiny. Tsara koa raha atao ao ny ora sy ny daty niresahana taminy, ny zavatra noresahina, ary izay zavatra napetraka raha nisy. Nilaza ve izy hoe efa manana ny fivavahany? Mpitovo ve izy sa efa manambady aman-janaka? Nilaza ny zavatra mahaliana na mampanahy azy ve izy? Hanampy anao hamaritra ny foto-kevitra horesahinao amin’ny manaraka izany. Soraty eo koa ny fotoana hiverenana sy ny fanontaniana hovalianao.
4. Nahoana isika no tsy tokony ho kivy, rehefa manampy ny olona liana?
4 Aza kivy: Tsy hitsahatra ‘hanaisotra ny teny’ nafafy tao am-pon’ny olona i Satana. (Mar. 4:14, 15) Aza kivy àry raha tsy tratranao foana ilay olona liana. Afaka mandefa taratasy any aminy ianao, na mamela taratasy kely eo am-baravarany. Nisy mpisava lalana nanomboka fampianarana teo am-baravarana. Tsy tratrany tao an-trano foana anefa ilay ramatoa, ka nanoratra ho azy izy. Rehefa nihaona indray izy ireo tatỳ aoriana, dia nilaza ilay ramatoa fa tena nanohina ny fony ny fiahian’ilay mpisava lalana azy. Ho faly isika hahita ny voa nafafintsika maniry sy mitombo ary “mamoa avo telopolo heny sy enimpolo heny ary zato heny.”—Mar. 4:20.