Hazoto toa An’i Jehovah sy Jesosy ve Ianao Amin’ny Vanim-potoanan’ny Fahatsiarovana?
1. Inona ny ezaka manokana ataon’ny Vavolombelon’i Jehovah rehefa vanim-potoanan’ny Fahatsiarovana?
1 Mazoto na mafana fo i Jehovah rehefa manatanteraka ny fikasany. Hoy ny Isaia 9:7, rehefa niresaka ny fitahiana sasany hoentin’ny Fanjakan’Andriamanitra: “Ny hafanam-pon’i Jehovah Tompon’ny tafika no hanatanteraka izany.” Nafana fo tamin’ny fivavahana marina koa i Jesosy, tamin’izy tetỳ an-tany. (Jaona 2:13-17; 4:34) Manao ezaka manokana ny mpitory an-tapitrisany eran-tany, isaky ny vanim-potoanan’ny Fahatsiarovana. Mazoto toa an’i Jehovah sy Jesosy izy ireo, ka mampitombo ny fanompoany. Hanao toa azy ireo koa ve ianao?
2. Inona no hataontsika manomboka amin’ny 7 Martsa, raha be zotom-po isika?
2 Ezaka manokana: Hanomboka amin’ny asabotsy 7 Martsa ny ezaka manokana hanasana ny olona hanatrika ny Fahatsiarovana. Eritrereto dieny izao àry ny fomba hahafahanao handray anjara be amin’ny fanompoana. Tena ho faly ny fiangonana rehefa hiara-hiasa mba hamitana faritany faran’izay betsaka. Miezaha hanasa ny olona tsidihinao na ampianarinao Baiboly, ny mpiara-miasa, havana, ary ny mpiara-mianatra aminao. Omeo fanasana izy ireo na ampiasao ny jw.org.
3. Ahoana no azontsika ampitomboana ny fanompoantsika amin’ny Martsa sy Aprily?
3 Mpisava lalana mpanampy: Hampitombo ny fanompoantsika koa isika raha be zotom-po. Azo antoka fa maro no ho afaka hanao mpisava lalana mpanampy amin’ny Martsa sy Aprily, satria ho afaka hifidy ny hanatratra 30 ora isika. Diniho amim-bavaka ny fomba hahavitanao an’izany, rehefa manao fotoam-pivavahan’ny fianakaviana ianao na mianatra samirery. (Ohab. 15:22) Lasa mazoto koa ny hafa rehefa mahita anao mafana fo manao an’io ezaka manokana io. Hanahaka ny zotom-pon’i Jesosy ianao, raha manao fanovana mba ho afaka hanompo bebe kokoa.—Mar. 6:31-34.
4. Inona avy ny valisoa ho azontsika raha mazoto toa an’i Jehovah sy Jesosy isika?
4 Hahazo valisoa be dia be isika, raha mazoto toa an’i Jehovah sy Jesosy amin’ny vanim-potoanan’ny Fahatsiarovana. Olona maro ao amin’ny faritanintsika mantsy no handre ny vaovao tsara. Ho faly sy ho afa-po koa isika, satria manompo an’i Jehovah sy manome ho an’ny hafa. (Asa. 20:35) Ny tena zava-dehibe dia hoe hampifaly an’Andriamanitra sy ny Zanany, izay samy be zotom-po, isika.