Soso-kevitra Hanampy Anao Hamaky Baiboly Isan’andro

Be atao be ve ianao ka sarotra aminao indraindray ny mamaky Baiboly isan’andro? (Jos. 1:8) Raha izany, dia andramo ny iray amin’ireto soso-kevitra ireto:

• Asio zavatra mampahatsiahy anao isan’andro. Asio fanairana ao amin’ny fitaovana elektronika ampiasainao mba hampahatsiahy anao hoe mila mamaky Baiboly ianao.

• Ataovy amin’ny toerana talaky maso ny Baibolinao. Raha ilay vita pirinty no ampiasainao, dia ataovy amin’ny toerana mora tazana foana ilay izy isan’andro.​—Deot. 11:18.

• Mihainoa raki-peo. Mihainoa raki-peo rehefa manao ny raharahanao andavanandro ianao. Mpisava lalana ny Ranabavy Tara. Manan-janaka izy ary miasa alina. Izao no nolazainy: “Mihaino famakiana Baiboly noraisim-peo aho rehefa manao ny raharahako andavanandro, dia mba lasa tsy tapatapaka ny famakiako Baiboly.”

• Aza milavo lefona. Nisy zavatra tsy nampoizina ve ka lasa tsy afaka namaky Baiboly tamin’ny fotoana tokony ho nanaovana an’izany ianao? Miezaha mamaky andininy vitsivitsy, fara fahakeliny, alohan’ny hatory. Aleo mantsy, hono, mihinan-kely toy izay mandry fotsy.​—1 Pet. 2:2.