Mitandrema Amin’ny Fandriky ny Devoly!

Miezaha ho “afaka amin’ny fandriky ny Devoly.”—2 TIM. 2:26.

AHOANA NO HAMALIANAO AN’IRETO?

Inona ny fandinihan-tena tokony hataonao, raha tia manakiana ny hafa ianao?

Inona no ianaranao avy amin’ny tantaran’i Pilato sy Petera, ka manampy anao tsy ho resin’ny tahotra olona?

Inona no afaka manampy anao, mba tsy hanamelo-tena tafahoatra?

1, 2. Inona avy ny fandriky ny Devoly hodinihina ato amin’ity lahatsoratra ity?

MIHAZA antsika mpanompon’i Jehovah ny Devoly. Tsy ny hamono antsika anefa no tanjony fa ny hanao sambo-belona antsika, mba hahafahany hampiasa antsika amin’izay itiavany azy.—Vakio ny 2 Timoty 2:24-26.

² Mety hampiasa fandrika ny mpihaza mba hahazoana biby velona. Mety hataony, ohatra, izay hampivoaka an’ilay biby avy ao amin’ny fiafenany, ary samboriny amin’ny tady ilay biby rehefa mivoaka. Mety hampiasa fandrika miafina koa izy, ka raha vao misy zavatra voadona amin’ilay fandrika, dia voasambotra ilay biby tsy manam-po na inona na inona. Toy izany no ataon’ny Devoly mba hanaovana sambo-belona ny mpanompon’i Jehovah. Tokony ho mailo àry isika, ka handinika tsara hoe aiza i Satana no mametraka fandrika. Hodinihintsika ato hoe ahoana no hanalavirana an’ireo fandrika telo fampiasan’ny Devoly, izay efa nahavoa ny Kristianina sasany: 1) Ny teny tsy voafehy, 2) ny tahotra olona, ary 3) ny fanamelohan-tena tafahoatra. Handinika fandrika roa hafa isika ao amin’ny lahatsoratra manaraka.

AZA MANAO TENY TSY VOAFEHY

3, 4. Inona no mety ho vokany raha tsy mifehy ny lelantsika isika? Manomeza ohatra.

³ Mety hodoran’ny mpihaza ny faritra iafenan’ny biby, ka raha vao mitsoaka ilay biby dia samboriny. Toy izany koa no tian’i Satana hatao. Tiany hasiana afo eo anivon’ny fiangonana, ka raha vao miala ao isika dia samboriny mora foana. Mety ho isika mihitsy anefa no hanampy tsy nahy an’i Satana, ka efa tafiditra ao anaty fandriny ihany isika amin’izay. Amin’ny fomba ahoana?

⁴ Nilaza i Jakoba mpianatra fa toy ny afo ny lela. (Vakio ny Jakoba 3:6-8.) Toy ny hoe mandrehitra afo eo anivon’ny fiangonana isika, raha tsy mifehy ny lelantsika. Diniho izao ohatra izao: Nampandrenesina tany am-pivoriana hoe voatendry ho mpisava lalana maharitra ny anabavy iray. Niresadresaka momba izany ny anabavy roa, taorian’ny fivoriana. Faly be ny iray ary nilaza fa manantena izy hoe handeha tsara ny fanompoan’ilay anabavy. Ny iray kosa nilaza hoe te hoderaina fotsiny ilay anabavy, matoa mirotsaka ho mpisava lalana. Iza amin’izy roa no tianao ho namana? Tsy sarotra ny mahita hoe iza amin’izy roa vavy no mety hampisy afo eo anivon’ny fiangonana.

5. Inona ny fandinihan-tena tokony hataontsika, mba tsy hahatonga antsika hanao teny tsy voafehy?

⁵ Inona no azontsika atao mba tsy hahatonga antsika hanao teny tsy voafehy? Hoy i Jesosy: “Izay mameno ny fon’ny olona no lazain’ny vavany.” (Mat. 12:34) Ny zavatra voalohany mila atao àry, dia ny mandinika ny fo. Miezaka ve isika mba tsy hanana an’ireo fihetseham-po mety hahatonga antsika hilaza teny mandratra? Azontsika dinihina, ohatra, hoe manao ahoana ny fihetsitsika rehefa rentsika hoe misy rahalahy miezaka hahazo tombontsoam-panompoana. Matoky ve isika hoe tsara ny antony anaovany izany? Sa miahiahy azy isika, ka mieritreritra hoe fitiavan-tena no anaovany an’ilay izy? Mila mitadidy ny nataon’ny Devoly isika, raha mora manakiana toy izany. Nilaza ny Devoly hoe antony ratsy no nahatonga an’i Joba hanompo an’i Jehovah. (Joba 1:9-11) Tsy tokony hiahiahy an’ilay rahalahintsika àry isika. Mila mandinika kosa isika hoe nahoana isika no manakiana azy. Manana antony tsara hanakianana azy ve isika, sa kosa ny fontsika no efa voapoizin’ny toe-tsaina tsy manam-pitiavana, miely amin’izao andro farany izao?—2 Tim. 3:1-4.

6, 7. a) Inona no mety hahatonga antsika hanakiana ny hafa? b) Inona no tokony hataontsika raha nisy olona nanevateva antsika?

⁶ Misy antony hafa koa mety hahatonga antsika hanakiana. Mety hoe tiantsika hisongadina kokoa ny zava-bitantsika. Kianintsika ny hafa mba hahatonga ny olona hieritreritra fa isika no tsara kokoa, ary ny hafa ratsy kokoa. Mety hanakiana ny hafa koa isika, satria te hanala tsiny ny tenantsika, noho isika tsy nanao ny zavatra tokony ho nataontsika. Ratsy foana anefa ny vokany, na ny fialonana no mahatonga antsika hanakiana ny hafa, na noho isika mihevi-tena ho ambony, na noho isika tsy matoky tena.

⁷ Mety hisy toe-javatra sasany anefa ieritreretantsika hoe rariny isika raha manakiana. Mety hoe nanao teny maharary antsika ny olona iray ka mampalahelo antsika izany na mampahatezitra antsika. Tsy tokony hamaly faty anefa isika, na izany aza. Vao mainka manampy trotraka an’ilay olana izany. Lasa manao ny sitrapon’ny Devoly koa isika amin’izany, fa tsy manao ny sitrapon’i Jehovah. (2 Tim. 2:26) Mila manahaka an’i Jesosy isika. “Tsy mba nanevateva izy” rehefa nisy nanevateva. ‘Nanankina foana ny fiainany tamin’ilay mitsara araka ny hitsiny’ izy. (1 Pet. 2:21-23) Natoky izy hoe hanao zavatra i Jehovah, amin’ny fotoana voatondrony sy araka ny fomba hitany fa mety. Tokony hatoky an’Andriamanitra toy izany koa isika. Manao izay hisian’ny “fihavanana” sy ny firaisan-tsaina eo anivon’ny fiangonana isika, raha manao teny manasitrana.—Vakio ny Efesianina 4:1-3.

AZA MATAHOTRA OLONA

8, 9. Nahoana i Pilato no nanameloka an’i Jesosy?

⁸ Tsy dia afaka mihetsika sy mandehandeha intsony ny biby iray rehefa voafandrika. Toy izany koa fa lasa tsy tena afaka mibaiko ny fiainany ny olona iray, rehefa resin’ny tahotra olona na milefitra amin’ny faneren’ny namany. (Vakio ny Ohabolana 29:25.) Hodinihintsika izao ny tantaran’ny lehilahy roa, izay resin’ny tahotra olona. Hojerentsika hoe inona no azontsika ianarana avy amin’izay nitranga tamin’izy ireo.

⁹ I Pontio Pilato, governora romanina, ny iray. Fantany hoe tsy nanan-tsiny i Jesosy, ka tsy te hanisy ratsy azy izy. Nilaza mihitsy aza izy hoe “tsy nanao zavatra tokony hamonoana azy ho faty” i Jesosy. Nanameloka an’i Jesosy ho faty ihany anefa izy. Nahoana? Satria nilefitra izy rehefa noteren’ny vahoaka. (Lioka 23:15, 21-25) Natahotra angamba izy rehefa niantsoantso ny vahoaka hoe: ‘Tsy naman’i Kaisara ianao raha manafaka an’io.’ (Jaona 19:12) Mety ho nieritreritra i Pilato hoe hesorina tsy ho governora izy, na hovonoina ho faty mihitsy, raha manohana an’i Kristy. Nanjary nanao ny sitrapon’ny Devoly izy, vokatr’izany.

10. Inona no nahatonga an’i Petera handa an’i Kristy?

¹⁰ Ny apostoly Petera ilay faharoa. Anisan’ny naman’i Jesosy akaiky izy. Nilaza ampahibemaso izy hoe i Jesosy no Mesia. (Mat. 16:16) Tsy nivadika koa izy, rehefa nandao an’i Jesosy ireo mpianatra hafa, noho izy ireo tsy nahazo ny tian’i Jesosy holazaina. (Jaona 6:66-69) Nampiasa sabatra hiarovana an’i Jesosy koa izy, rehefa tonga hisambotra azy ny fahavalony. (Jaona 18:10, 11) Resin’ny tahotra anefa i Petera tatỳ aoriana, ka nilaza mihitsy hoe tsy mahalala an’i Jesosy Kristy. Fotoana fohy ihany izy no natahotra olona, nefa tsy nanana herim-po hanaovana ny tsara izy, rehefa tratran’izy io.—Mat. 26:74, 75.

11. Inona ny zavatra itarihan’ny olona antsika ka mila toherintsika?

¹¹ Mila miady mafy ny Kristianina rehetra, mba tsy ho voataona hanao zavatra tsy mampifaly an’i Jehovah. Mety hanery antsika tsy hanao ny marina ny mpampiasa antsika na ny olon-kafa, na koa hitaona antsika haloto fitondran-tena. Mety hampirisika antsika hangala-tahaka amin’ny fanadinana ny mpiara-mianatra amintsika, na hitaona antsika hijery sary vetaveta, na hifoka sigara na rongony, na hiboboka toaka, na haloto fitondran-tena. Toy ny fandrika ny tahotra olona, ary mety hahatonga antsika hanao zavatra tsy mampifaly an’i Jehovah. Inona àry no hanampy antsika hiala amin’io fandrika io?

12. Inona no ianarantsika avy amin’ny tantaran’i Pilato sy Petera?

¹² Hodinihintsika izao hoe inona no ianarantsika avy amin’izay nitranga tamin’i Pilato sy Petera. Tsy dia nahalala firy an’i Kristy i Pilato. Fantany anefa hoe tsy nanan-tsiny izy, ary olona niavaka fa tsy toy ny olon-drehetra. Tsy nanetry tena anefa i Pilato ary tsy tia an’ilay tena Andriamanitra, ka azon’ny Devoly mora foana. I Petera indray nanana fahalalana marina tsara ary tena tia an’Andriamanitra. Tsy nanetry tena sy resin’ny tahotra olona koa anefa izy indraindray. Nirehareha izy talohan’ny nisamborana an’i Jesosy hoe ‘na hahafoy an’i Jesosy aza ny olona rehetra, izy tsy mba hahafoy azy.’ (Mar. 14:29) Vonona hiatrika fitsapana kokoa anefa izy, raha natoky an’i Jehovah toa ilay mpanao salamo izay nilaza hoe: “I Jehovah no momba ahy, ka tsy hatahotra aho. Inona moa no azon’ny olombelona atao amiko?” (Sal. 118:6) Tsy izany anefa no nataon’i Petera, rehefa jerena izay nitranga ny alina talohan’ny nahafatesan’i Jesosy. Tsy mba niambina izy sy ny apostoly hafa, rehefa nentin’i Jesosy tao amin’ny zaridainan’i Getsemane, fa resin-tory. Namoha azy ireo i Jesosy sady niteny hoe: “Miambena sy mivavaha foana mba tsy ho resin’ny fakam-panahy.” (Mar. 14:38) Mbola natory ihany anefa i Petera, ary resin’ny tahotra olona izy taorian’izay.

13. Inona no hanampy antsika hahatohitra ny fanerena hanao ratsy?

¹³ Misy zava-dehibe hafa koa ianarantsika avy amin’i Pilato sy Petera: Raha tiantsika ny hahatohitra ny faneren’ny hafa, dia tokony hanana fahalalana marina tsara isika, hanetry tena, ho tia sy hatahotra an’Andriamanitra fa tsy hatahotra olona. Raha mahalala ny marina isika dia hanjary hanam-pinoana. Hanampy antsika ho be herim-po izany rehefa miresaka ny zavatra inoantsika. Hanampy antsika koa izany mba handresy ny tahotra olona sy ny faneren’ny hafa. Tsy tokony hatoky tena be loatra anefa isika. Mila manetry tena isika, ka miaiky fa mila hery avy amin’Andriamanitra isika, mba hanoherana ny faneren’ny hafa. Mila mivavaka aminy isika ary mangataka ny fanahy masina. Raha tena tia an’Andriamanitra koa isika, dia ho vonona hankatò ny fitsipiny, ary tsy hanala baraka ny anarany. Ilaina koa anefa ny miomana mialoha mba hahafahana hiatrika fitsapana. Raha ampiantsika, ohatra, ny zanatsika mba hiomana mialoha sy hivavaka, dia ho hain’izy ireo hoe ahoana no hatao rehefa misy ankizy mitaona azy hanao ratsy.—2 Kor. 13:7.a

AZA MANAMELO-TENA TAFAHOATRA

14. Inona no tian’ny Devoly hoeritreretintsika?

¹⁴ Maka vatan-kazo na vato be ny mpihaza indraindray, ary ahantony amin’ny tady eo ambonin’ny lalana falehan’ny biby ilay izy. Raha vao voadonan’ilay biby ilay tady, dia mianjera ilay vatan-kazo na vato be, ka voatsindry ao izy, ary mety ho torotoro mihitsy. Toy ny hoe voatsindrin’ny vatan-kazo na vato be koa isika raha manamelo-tena tafahoatra. Mety ho torotoro fo isika, ka ho “kivy tanteraka” raha mieritreritra foana ny fahadisoana nataontsika. (Vakio ny Salamo 38:3-5, 8.) Tian’i Satana hieritreritra isika hoe be loatra ny fahotana nataontsika ka tsy hamindra fo amintsika i Jehovah. Tiany hieritreritra koa isika hoe tsy ho vitantsika mihitsy ny hanaraka ny fitsipik’i Jehovah.

15, 16. Inona no hanampy anao tsy hanamelo-tena tafahoatra?

¹⁵ Inona no hanampy anao tsy hanamelo-tena tafahoatra? Raha nanao fahotana lehibe ianao, dia miezaha hamitram-pihavanana amin’i Jehovah. Mangataha fanampiana amin’ny anti-panahy. (Jak. 5:14-16) Ahitsio izay fahadisoana nataonao. (Mat. 3:8) Aza kivy raha mahazo famaizana ianao. Porofon’ny fitiavan’i Jehovah anao izany. (Heb. 12:6) Aoka ianao ho tapa-kevitra tsy hamerina an’ilay fahotana intsony, ary mitandrema amin’izay rehetra nahatonga anao hanao an’ilay fahotana. Rehefa avy nibebaka ianao ary niova, dia matokia fa mamela ny helokao i Jehovah noho ny soron’i Jesosy Kristy.—1 Jaona 4:9, 14.

¹⁶ Mbola mahatsiaro ho meloka anefa ny olona sasany na dia efa nahazo famelan-keloka aza. Raha izany no tsapanao, dia tadidio fa namela ny helok’i Petera sy ireo apostoly hafa i Jehovah, nefa izy ireo nandao ny Zanany malala tamin’ny fotoana tena nilany fanampiana. Tadidio koa ilay lehilahy noroahina tao amin’ny fiangonan’i Korinto satria nanana fitondran-tena maharikoriko. Namela ny fahotany i Jehovah rehefa nibebaka izy. (1 Kor. 5:1-5; 2 Kor. 2:6-8) Misy olon-kafa koa resahin’ny Baiboly hoe nanao fahotana lehibe, nefa nahazo famelana rehefa nibebaka.—2 Tan. 33:2, 10-13; 1 Kor. 6:9-11.

17. Inona no soa raisintsika avy amin’ny vidim-panavotana?

¹⁷ Hamela sy hanadino ny fahotanao i Jehovah, raha tena mibebaka ianao ary manaiky ny famindram-pony. Aza mieritreritra mihitsy hoe tsy afaka manarona ny fahotanao ny soron’i Jesosy. Ho voafandrik’i Satana ianao raha mieritreritra an’izany. Na inona na inona hevitra tian’i Satana hoeritreretinao, dia matokia fa afaka manarona ny fahotan’izay rehetra mibebaka ny vidim-panavotana. (Ohab. 24:16) Manavesatra anao ny fieritreretana tafahoatra hoe meloka ianao. Ho afaka anefa izany, raha tena mino ny vidim-panavotana ianao. Hahazo hery koa ianao mba hanompoana an’i Jehovah amin’ny fonao sy ny sainao ary ny tenanao manontolo.—Mat. 22:37.

FANTATSIKA NY TETI-DRATSIN’I SATANA

18. Inona no azontsika atao mba tsy ho voafandriky ny Devoly?

¹⁸ Tsy mampaninona an’i Satana izay fandrika hahazoany antsika, fa rehefa azony isika dia faly izy. Fantatsika anefa ny teti-dratsiny, ka tsy voatery ho voafitany isika. (2 Kor. 2:10, 11) Tsy ho voafandrik’i Satana isika, raha mivavaka mba hahazo fahendrena hiatrehana fitsapana. Hoy i Jakoba: “Raha misy aminareo tsy ampy fahendrena, aoka izy tsy hitsahatra hangataka izany amin’Andriamanitra, fa malala-tanana amin’ny rehetra izy sady tsy manome tsiny. Dia homena azy izany.” (Jak. 1:5) Mila manao zavatra mifanaraka amin’ny vavaka ataontsika koa isika, ka mianatra samirery tsy tapaka ary mampihatra izay ianarantsika. Manana an’ireo boky ara-baiboly isika, avy amin’ny mpanompo mendri-pitokisana sy malina. Toy ny jiro mampiharihary ny fandriky ny Devoly izy ireny, ka manampy antsika tsy ho voafandrika.

19, 20. Nahoana isika no tokony hankahala ny ratsy?

¹⁹ Manampy antsika ho tia ny tsara ny vavaka sy ny fianarana Baiboly. Tena ilaina koa anefa ny hoe mankahala ny ratsy. (Sal. 97:10) Manampy antsika tsy hanana fanirian-dratsy ny fieritreretana mialoha ny voka-dratsin’ilay faniriana. (Jak. 1:14, 15) Rehefa mianatra mankahala ny ratsy isika ary miezaka ho tia ny tsara, dia tsy hahasarika antsika mihitsy ireo zavatra ataon’i Satana hamandrihana antsika.

²⁰ Mankasitraka an’i Jehovah isika, satria manampy antsika izy mba tsy ho voafitak’i Satana. Manafaka antsika “amin’ilay ratsy” izy, amin’ny alalan’ny fanahiny sy ny Teniny ary ny fandaminany. (Mat. 6:13) Hodinihintsika manaraka hoe ahoana no hanalavirana ny fandrika roa hafa fampiasan’ny Devoly, izay efa nahavoa ny Kristianina sasany.

Halaviro ny Fandrik’i Satana!

‘Tohero ny teti-dratsin’ny Devoly.’—EFES. 6:11.

AHOANA NO HAMALIANAO AN’IRETO?

Inona no azon’ny mpanompon’i Jehovah atao mba tsy ho lasa tia harena?

Inona no azon’ny Kristianina atao mba tsy hahatonga azy hanitsakitsa-bady?

Araka ny hevitrao, inona ny soa azo rehefa miezaka mafy mba tsy ho lasa tia harena na haloto fitondran-tena?

1, 2. a) Nahoana i Satana no mankahala ny voahosotra sy ny “ondry hafa”? b) Inona no fandrik’i Satana hodinihina ato amin’ity lahatsoratra ity?

MANKAHALA ny olombelona i Satana Devoly, ka ny mpanompon’i Jehovah no tena halany. Voalohany amin’izany ny sisa voahosotra. Miady amin’ireo Kristianina be herim-po ireo i Satana, satria mitarika ny asa fitoriana izy ireo, ary mampahafantatra fa i Satana no mitondra an’ity tontolo ity. (Apok. 12:17) Tsy tian’i Satana koa ny “ondry hafa”, satria manohana ny voahosotra izy ireo ary hiaina mandrakizay. Izy anefa tsy mba hiaina mandrakizay. (Jaona 10:16) Tsy mahagaga àry raha tezitra i Satana! Na ho any an-danitra isika na ho eto an-tany, dia tadidio fa ny handrapaka antsika no tanjony fa tsy ny hanasoa antsika.—1 Pet. 5:8.

² Mampiasa fandrika isan-karazany i Satana mba hanatratrarana ny tanjony. ‘Nohajambainy ny sain’ny tsy mino’, ka tsy manaiky ny vaovao tsara izy ireo ary tsy mahita ny fandrika ataony. (2 Kor. 4:3, 4) Voafandriky ny Devoly koa anefa na dia ny olona sasany efa nanaiky ny vaovao tsara aza. Nisy fandrika telo fampiasan’i Satana, noresahina tao amin’ny lahatsoratra teo aloha. Noresahina tao ny momba ny teny tsy voafehy, ny tahotra olona, ary ny fanamelohan-tena tafahoatra. Horesahintsika indray izao ny fomba azo ialana amin’ny fandrika roa hafa, dia ny fitiavan-karena sy ny fanitsakitsaham-bady.

FANDRIKA NY FITIAVAN-KARENA

3, 4. Nahoana ny fanahiana eto amin’ity tontolo ity no mety hahatonga antsika hikatsaka harena?

³ Nanao fanoharana momba ny voa nafafy teny amin’ny tsilo i Jesosy, indray mandeha. Nilaza izy fa mety handre ny hafatra momba ilay Fanjakana ny olona iray, “kanefa ny fanahiana eto amin’ity tontolo ity sy ny famitahan’ny harena dia mangeja ny teny, ka manjary tsy mamoa izy.” (Mat. 13:22) Ampiasain’i Satana tokoa ny fitiavan-karena mba hamandrihana antsika.

⁴ Zavatra roa mitambatra no “mangeja ny teny.” Voalohany, “ny fanahiana eto amin’ity tontolo ity.” Betsaka tokoa ny zavatra mety hiteraka fanahiana amin’izao “fotoan-tsarotra tsy mora setraina” izao. (2 Tim. 3:1) Mety ho sarotra aminao ny mahita vola ampy hivelomana, satria miakatra be ny vidim-piainana ary be dia be ny tsy an’asa. Mety hanahy momba ny hoavy koa ianao, ka ho lasa saina hoe: ‘Hanam-bola ampy hivelomako ve aho, rehefa antitra ka tsy afaka miasa intsony?’ Noho ny fanahiana toy izany, dia mikatsaka harena ny olona sasany, satria mihevitra fa tsy ho ory na inona na inona izy rehefa manam-bola.

5. Nahoana no lazaina hoe mamitaka ny “harena”?

⁵ Faharoa, “ny famitahan’ny harena.” Milaza ny Baiboly fa ‘fiarovana ny vola’, izany hoe manampy antsika hahazo izay ilaintsika. (Mpito. 7:12) Tsy hendry anefa isika raha mikatsaka vola aman-karena. Maro no mahatsapa fa arakaraka ny iezahany hahazo harena, dia vao mainka izy mitady harena, ka toy ny hoe voafandrik’izy io. Lasa andevozin’ny vola aman-karena mihitsy aza ny olona sasany.—Mat. 6:24.

6, 7. a) Inona no mety hitranga any am-piasana, ka mety hahatonga ny olona iray ho lasa tia harena? b) Inona no tokony hodinihin’ny Kristianina iray, raha angatahina hiasa mandritra ny ora fanampiny izy?

⁶ Mety tsy ho tandrintandrintsika akory dia mety ho lasa tia harena isika. Eritrereto izao: Manatona anao ny mpampiasa anao ary milaza hoe: “Misy vaovao tsara be! Nahazo asa vaovao ny orinasantsika. Midika izany hoe tsy maintsy hiasa bebe kokoa isika, mandritra ny volana vitsivitsy. Matokia fa homena karama fanampiny ianao!” Ahoana no hataonao raha izany no mitranga? Marina aloha fa andraikitra lehibe ny mamelom-bady aman-janaka. Tsy izany ihany anefa no andraikitrao. (1 Tim. 5:8) Misy zavatra hafa koa tokony hodinihinao. Anisan’izany ny hoe: Adiny firy ianao no tsy maintsy hiasa, ankoatra ny ora fiasana mahazatra? Ho voahelingelin’ilay asa ve ny fandaharanao ara-panahy, anisan’izany ny fivoriana sy ny Fotoam-pivavahan’ny Fianakaviana?

⁷ Eritrereto hoe inona no zava-dehibe indrindra aminao: Ny vola fanampiny horaisinao ve, sa ny fifandraisanao amin’i Jehovah? Ho may hahazo vola bebe kokoa ve ianao, ka tsy hataonao loha laharana intsony ilay Fanjakana? Takatrao ve fa raha ny vola sy ny harena no ataonao eo amin’ny toerana voalohany, dia ho lasa an-tsirambina ny ara-panahinao sy ny an’ny fianakavianao, ka ho simba ny fifandraisanareo amin’i Jehovah? Ahoana anefa raha efa tandindomin-doza ny ara-panahinao izao? Inona no azonao atao mba tsy hahatonga anao ho voagejan’ny fitiavan-karena?—Vakio ny 1 Timoty 6:9, 10.

8. Inona ny ohatra ara-baiboly afaka manampy antsika handinika ny fiainantsika?

⁸ Ilaina ny mandinika foana ny fomba fiainantsika, mba tsy hahatonga antsika ho voagejan’ny fitiavan-karena. Mila mitandrina isika mba tsy hanao tsinontsinona ny zava-masina, toy ny nataon’i Esao. (Gen. 25:34; Heb. 12:16) Tsy tokony hanahaka an’ilay lehilahy nanan-karena niresahan’i Jesosy koa isika. Nasain’i Jesosy hivarotra ny fananany sy hanome izany ho an’ny mahantra izy, ary avy eo hanara-dia azy. Tsy nanao izany anefa ilay lehilahy, fa ‘lasa tamin’alahelo satria maro ny fananany.’ (Mat. 19:21, 22) Voafandriky ny harena izy ka matiantoka be, satria tsy lasa mpanara-dia an’ilay lehilahy niavaka indrindra teto an-tany! Mitandrema koa àry sao ho very ny tombontsoanao, dia ny hoe mpanara-dia an’i Jesosy Kristy.

9, 10. Ahoana no tokony ho fiheverantsika ny zavatra ara-nofo, raha ny Baiboly no jerena?

⁹ Mila manaraka an’ity torohevitr’i Jesosy ity isika, mba tsy hanahy be loatra momba ny fiainana. Hoy izy: “Aza manahy mihitsy ianareo hoe: ‘Inona no hohaninay?’, na ‘Inona no hosotroinay?’, na ‘Inona no hotafinay?’ Izany rehetra izany mantsy no katsahin’ny olona eo amin’izao tontolo izao fatratra. Fa fantatry ny Rainareo any an-danitra fa ilainareo izany rehetra izany.”—Mat. 6:31, 32; Lioka 21:34, 35.

¹⁰ Tsy tokony hanaiky ho voafitaky ny harena isika, fa hanana fomba fihevitra toa an’i Agora, mpanoratra Baiboly. Hoy izy: “Aza atao mahantra loatra aho, na manan-karena loatra. Izay tena ilaiko ihany omena ahy.” (Ohab. 30:8, Dikan-teny Anglisy Maoderina) Takatr’i Agora tsara fa ilaina ny vola. Takany koa anefa hoe mamitaka izy io. Tokony ho takatsika koa àry fa mety hanimba antsika eo amin’ny lafiny ara-panahy ny fanahiana eto amin’ity tontolo ity sy ny famitahan’ny harena. Raha manahy be loatra momba izay ilaintsika isika, dia mety ho lany amin’ny fitadiavam-bola ny fotoanantsika sy ny herintsika, ary tsy hazoto hikatsaka an’ilay Fanjakana intsony isika. Aoka àry ianao ho tapa-kevitra ny tsy ho azon’i Satana amin’ny fitiavan-karena.—Vakio ny Hebreo 13:5.

FANDRIKA TSY MORA HITA NY FANITSAKITSAHAM-BADY

11, 12. Inona no zavatra mety hitranga any am-piasana, ka mety hahatonga ny Kristianina iray hanitsakitsa-bady?

¹¹ Rehefa te hisambotra biby lehibe ny mpihaza, dia manamboatra lavaka eo amin’ny lalana falehan’ilay biby. Saronany rantsan-kazo sy tany kely izany avy eo, mba tsy ho hitan’ilay biby. Mitovy amin’io karazana fandrika io ny fandrika tena mandaitra iray ampiasain’i Satana. Tsy inona izany fa ny fitondran-tena maloto. (Ohab. 22:14; 23:27) Maro ny Kristianina latsaka tao anatin’io lavaka io, satria tsy nitandrina tamin’ireo toe-javatra mora mahavoan’ny fakam-panahy. Lasa raiki-pitia tamin’olon-kafa tsy vadiny ny Kristianina sasany, ka nanjary nanitsakitsa-bady.

¹² Mety ho lasa raiki-pitia amin’ny olona any am-piasany ny Kristianina iray efa manambady. Hita tamin’ny fanadihadiana fa nijangajanga tamin’ny mpiara-miasa taminy ny ankamaroan’ireo lehilahy nanitsakitsaka ny vadiny. Toy izany koa ny antsasany mahery tamin’ireo vehivavy nanitsakitsa-bady. Ahoana àry no hataonao, raha vehivavy ianao, ka tsy maintsy mifandray amin’ny lehilahy any am-piasana, na lehilahy ianao ka tsy maintsy mifanerasera amin’ny vehivavy any am-piasana? Diniho hoe manao ahoana ny fifandraisanareo. Feranao ve ny resakareo mba ho resaka asa ihany? Raha miresaka matetika amin’ny lehilahy iray ny anabavy iray, dia mety hiresaka ny tsiambaratelony ilay anabavy amin’ny farany, na hiresaka ny olana ao an-tokantranony mihitsy. Raha minamana amin’ny vehivavy koa ny rahalahy iray any am-piasana, dia mety hanjary hieritreritra izy hoe mahafinaritra ilay vehivavy. Mety ho tsapany hoe zava-dehibe amin’ilay vehivavy ny heviny, mihaino azy tsara ilay vehivavy rehefa miresaka izy, sady tena manaja azy. Mety hieritreritra àry ilay rahalahy hoe: “Raha mba hoatran’izany mantsy ny vadiko!” Takatrao ve fa mety hahatonga ny Kristianina hanitsakitsa-bady ny toe-javatra toy izany?

13. Ahoana no mety hahatonga ny Kristianina manambady ho raiki-pitia amin’ny olona eo anivon’ny fiangonana?

¹³ Mety ho lasa raiki-pitia amin’ny olona iray eo anivon’ny fiangonana koa ny Kristianina manambady. Diniho izay nitranga tamin’i Daniel sy Sarah.a Mpisava lalana maharitra izy mivady. Anti-panahy i Daniel, ary tsy mba mandà mihitsy rehefa misy andraikitra ampanaovina azy. Nisy lehilahy dimy nampianariny Baiboly, ary natao batisa ny telo. Nila fanampiana be ireo rahalahy vao vita batisa ireo, ary i Sarah matetika no nanampy azy ireo, rehefa repotra tamin’ny andraikiny i Daniel. Nanjary i Sarah foana no nampahery azy ireo, rehefa nila fampaherezana izy ireo. I Sarah koa anefa mba nila olona hiahy azy, ary ireo rahalahy ireo no niahy azy. Loza anefa no vokatr’izany rehetra izany. Hoy i Daniel: “Nanampy an’ireo rahalahy ireo foana ny vadiko nandritra ny volana maro, ka nila fanampiana ara-panahy sy ara-pihetseham-po. Izaho anefa tsy nanampy azy. Loza no vokany, satria niaraka tamin’ilay rahalahy iray nampianariko izy. Variana loatra tamin’ny andraikitro aho, ka tsy hitako akory hoe hay efa lasa nalemy ara-panahy ny vadiko.” Inona no azonao atao mba hisorohana ny loza toy izany?

14, 15. Inona no afaka manampy ny Kristianina mba tsy hanitsakitsa-bady?

¹⁴ Tokony hosaintsaininao hoe inona no dikan’ny hoe tsy mivadika amin’ny vady, raha tianao ny tsy hanitsakitsa-bady. Hoy i Jesosy: ‘Aoka izay nampiraisin’Andriamanitra zioga, tsy hosarahin’olona.’ (Mat. 19:6) Midika izany fa tsy tokony hisy na inona na inona hanasaraka anao amin’ny vadinao. Aza mieritreritra mihitsy hoe zava-dehibe kokoa noho ny vadinao ny andraikitrao eo anivon’ny fiangonana. Tadidio koa fa raha zatra manao zavatra tsy miaraka amin’ny vadinao ianao, nefa tsy tena zava-dehibe ilay izy, dia mety hanaratsy ny fifandraisanareo mivady izany. Mety hiteraka fakam-panahy izany, ary mety hitarika ho amin’ny fahotana lehibe.

¹⁵ Raha anti-panahy anefa ianao, dia mety hieritreritra hoe: ‘Dia ahoana izany ny fikarakarana ny fiangonana?’ Nilaza tokoa ny apostoly Petera hoe: “Andraso ny andian’ondrin’Andriamanitra eo ambany fiandraiketanareo, tsy an-tery anefa, fa an-tsitrapo, ary tsy noho ny fitiavana tombony azo amin’ny tsy marina, fa amim-paharisihana kosa.” (1 Pet. 5:2) Midika izany fa tsy tokony hatao ambanin-javatra ny fikarakarana ny andian’ondry. Na izany aza anefa, dia tsy mety raha vitanao tsara ny andraikitrao amin’ny maha anti-panahy anao, nefa ataonao tsirambina ny andraikitrao amin’ny maha vady anao. Tsy hisy dikany raha toa ianao ka mifantoka tanteraka amin’ny famahanana ny andian’ondry, nefa mamela ny vadinao ho mosarena ara-panahy. Mety hampidi-doza ny tokantranonareo mihitsy aza izany. Hoy i Daniel, ilay voaresaka tetsy aloha: “Tsy mety ny hoe miezaka mafy manao ny andraikitrao eo anivon’ny fiangonana ianao, nefa manao tsirambina ny fianakavianao.”

16, 17. a) Inona no azon’ny Kristianina manambady atao, mba hampisehoana amin’ny mpiara-miasa fa tsy hiaraka amin’olon-kafa mihitsy izy? b) Inona no lahatsoratra afaka manampy ny Kristianina hisoroka fakam-panahy?

¹⁶ Misy torohevitra tsara be dia be ao amin’ny Tilikambo Fiambenana sy Mifohaza!, natao hanampiana ny Kristianina mba tsy hanitsakitsa-bady. Izao, ohatra, no voalazan’ny Tilikambo Fiambenana 15 Septambra 2006: ‘Halaviro ny toe-javatra mety hahatonga anao hiraiki-po amin’ny olona tsy vadinao, rehefa any am-piasana, na any an-toeran-kafa. Mety ho tratran’ny fakam-panahy, ohatra, ny lehilahy sy vehivavy, raha miara-miasa akaiky ivelan’ny ora fiasana. Raha lehilahy na vehivavy manambady ianao, dia asehoy mazava tsara amin’ny alalan’ny teninao sy ny fihetsikao, fa tsy afaka miaraka amin’olona ankoatra ny vadinao ianao. Olona mahafoy tena ho an’Andriamanitra koa ianao, ka azo inoana fa tsy ho ianao indray no hijejojejo amin’ny olona na hihaingo amin’ny fomba tsy maotina, mba hisarihana ny sain’ny hafa. Azonao asiana sarin’ny vady aman-janakao koa ao amin’ny toeram-piasanao. Izany no hampahatsiahy anao sy ny hafa, fa tianao ny ankohonanao. Aoka ianao ho tapa-kevitra handa an-kitsirano, rehefa misy olona mitady hanangoly anao.’

¹⁷ Tena tsara koa ny torohevitra tao amin’ilay lahatsoratra hoe “Tena Tsy Mivadika Amin’ny Vadinao ve Ianao?”, tao amin’ny Mifohaza! Aprily 2009. Nampitandrina ny Kristianina izy io, mba tsy haka sary an-tsaina ny tenany manao firaisana amin’olona tsy vadiny. Voalaza tao fa atahorana kokoa hijangajanga ny olona manana eritreritra toy izany. (Jak. 1:14, 15) Raha manambady àry ianao, dia tena tsara raha iarahanareo midinika tsindraindray ireny lahatsoratra ireny. I Jehovah no nanao ny fanambadiana ary masina izy io. Hita hoe mankasitraka ny zava-masina ianao, raha manokana fotoana hiresahana amin’ny vadinao momba ny tokantranonareo.—Gen. 2:21-24.

18, 19. a) Inona no vokatry ny fanitsakitsaham-bady? b) Inona no soa azon’ny olona tsy manitsakitsa-bady?

¹⁸ Raha tsapanao fa mitady hanomboka ho tia olon-kafa tsy vadinao ianao, dia saintsaino ny voka-dratsin’ny fijangajangana sy ny fanitsakitsaham-bady. (Ohab. 7:22, 23; Gal. 6:7) Tsy mampifaly an’i Jehovah ny olona maloto fitondran-tena. Mandratra ny fon’ny vadiny koa izy, sady manimba ny tenany. (Vakio ny Malakia 2:13, 14.) Eritrereto koa ny soa azon’ny olona madio fitondran-tena foana. Tsara ny fiainany dieny izao, manana feon’ny fieritreretana madio izy, ary hiaina mandrakizay.—Vakio ny Ohabolana 3:1, 2.

¹⁹ Nilaza ny mpanao salamo fa ho be ny fiadanan’ireo tia ny lalàn’Andriamanitra, ary tsy hisy fandrika hahavoa azy ireo. (Sal. 119:165) Aoka àry ianao ho tia ny fahamarinana, ary ‘mitandrema hatrany mba tsy hitondranao tena tahaka ny adala, fa tahaka ny hendry’, amin’izao andro feno faharatsiana izao. (Efes. 5:15, 16) Fenoin’i Satana fandrika ny lalantsika mpanompon’i Jehovah. Omen’i Jehovah izay rehetra ilaintsika anefa isika, mba hahafahantsika ‘hiorina mafy’ sy hahavita “hamono ny zana-tsipìka mirehitra rehetra alefan’ilay ratsy.”—Efes. 6:11, 16.