Mpitory ny Vaovao Tsara

NANOME an’i Jesosy Kristy Zanany i Jehovah mba ho modely ho antsika. (1 Pet. 2:21) Lasa mpanompon’Andriamanitra ny olona iray, rehefa manara-dia an’i Jesosy ka mitory ny vaovao tsara. Mampahery izany, araka ny teniny hoe: “Mankanesa atỳ amiko ianareo rehetra miasa mafy sy mitondra enta-mavesatra, fa hamelombelona anareo aho. Ento ny ziogako ka mianara amiko, fa malemy fanahy sy manetry tena aho, dia ho velombelona ianareo.” (Mat. 11:28, 29) Hitan’izay rehetra nanaiky an’io fanasana io fa nanatanteraka ny teniny i Jesosy.

² Nitaona olona hanara-dia azy i Jesosy, ilay Mpanompon’Andriamanitra Lehibe Indrindra. (Mat. 9:9; Jaona 1:43) Nampiofaniny tamin’ny fanompoana izy ireny, ary nirahiny hanao ilay asa nataony. (Mat. 10:1–11:1; 20:28; Lioka 4:43) Naniraka 70 hafa izy, tatỳ aoriana, mba hitory ny vaovao tsaran’ny Fanjakan’Andriamanitra. (Lioka 10:1, 8-11) Hoy i Jesosy, rehefa naniraka ny mpianany: “Izay mihaino anareo, dia mihaino ahy. Ary izay tsy manaiky anareo, dia tsy manaiky ahy. Ary izay tsy manaiky ahy, dia tsy manaiky an’Ilay naniraka ahy.” (Lioka 10:16) Nasehon’i Jesosy tamin’izany fa tena lehibe ilay andraikitra nomena ny mpianany. Hisolo tena azy sy ilay Andriamanitra Avo Indrindra mantsy izy ireo! Toy izany koa izay rehetra manaiky ny fanasan’i Jesosy “hanara-dia” azy ankehitriny. (Lioka 18:22; 2 Kor. 2:17) Irahin’Andriamanitra hitory ny vaovao tsaran’ilay Fanjakana sy hanao mpianatra ny olona toy izany.​—Mat. 24:14; 28:19, 20.

³ Rehefa nanaiky ny fanasan’i Jesosy hanara-dia azy isika, dia lasa ‘nahafantatra’ an’i Jehovah sy Jesosy Kristy. (Jaona 17:3) Nampianarina ny lalan’i Jehovah koa isika. Nampiany isika, ka afaka nanova ny saintsika, nitafy ny toetra vaovao, ary nampifanaraka ny fomba fiainantsika tamin’ny fitsipik’i Jehovah. (Rom. 12:1, 2; Efes. 4:22-24; Kol. 3:9, 10) Tena mankasitraka an’i Jehovah isika, ka nanokan-tena ho azy sy nampiseho izany tamin’ny alalan’ny batisa anaty rano. Voatendry ho mpanompon’Andriamanitra isika amin’ny fotoana anaovana batisa antsika.

⁴ Tadidio foana fa izay madio fo sy tsy manan-tsiny eo amin’izay ataon’ny tanany ihany no eken’Andriamanitra hanompo azy. (Sal. 24:3, 4; Isaia 52:11; 2 Kor. 6:14–7:1) Lasa manana feon’ny fieritreretana madio isika, noho isika mino an’i Jesosy Kristy. (Heb. 10:19-23, 35, 36; Apok. 7:9, 10, 14) Nilaza ny apostoly Paoly fa tokony hataontsika ho voninahitr’Andriamanitra ny zava-drehetra, mba tsy hanafintohina ny hafa. Nilaza koa ny apostoly Petera fa tena tokony ho tsara fitondran-tena isika, raha tiantsika hanaraka ny fahamarinana ny tsy mpino. (1 Kor. 10:31, 33; 1 Pet. 3:1) Ahoana àry no azontsika anampiana olona mba ho lasa mpitory ny vaovao tsara toa antsika?

MPITORY VAOVAO

⁵ Vao manomboka mianatra ny olona ampianarinao dia ampirisiho hiresaka amin’ny hafa ny zavatra ianarany. Afaka miresaka amin’ny havany na ny namany na ny mpiara-miasa aminy, ohatra, izy isaky ny afaka manao izany. Tena ilaina izany, satria efa mampiofana azy hitory ny vaovao tsara sy ho lasa mpanara-dia an’i Jesosy Kristy. (Mat. 9:9; Lioka 6:40) Azo inoana hoe haniry hitory miaraka amin’ny fiangonana ny mpianatra, rehefa manao fandrosoana ka zatra mitory tsy ara-potoana.

FEPETRA TAKINA

⁶ Tsy maintsy mahafeno fepetra aloha ny olona iray vao azo asaina hitory isan-trano. Efa eritreretin’ny olona hoe Vavolombelon’i Jehovah mantsy izy, raha vao miara-manompo amintsika. Tokony ho efa nampifanaraka ny fiainany tamin’ny fitsipik’i Jehovah àry izy vao azo ekena ho mpitory tsy vita batisa.

⁷ Azo inoana fa fantatrao tsara ny fiainan’ilay olona, rehefa niara-nianatra sy nanazava ny torolalan’ny Baiboly taminy ianao. Mety ho hitanao hoe efa mampihatra ny zavatra ianarany avy ao amin’ny Baiboly izy. Misy zavatra mba tian’ny anti-panahy ho fantatra anefa momba ny fiainany, ka tian’izy ireo ny handinika izany miaraka aminao sy io mpianatrao io.

⁸ Hisy anti-panahy roa (anisan’ny Komitin’ny Fanompoan’ny Fiangonana ny iray) hasain’ny anti-panahy mpandrindra handinika izany miaraka aminao sy ilay mpianatra Baiboly. Raha tsy ampy ny anti-panahy, dia azo tendrena hanao izany ny anti-panahy iray sy ny mpikarakara fiangonana za-draharaha. Tsy tokony hangataka andro ireo rahalahy ireo rehefa hanao an’ilay fiaraha-midinika. Raha any am-pivoriana, ohatra, ny anti-panahy no mahalala hoe misy mpianatra te hitory, dia mety ho azo atao aorian’io fivoriana io avy hatrany ilay fiaraha-midinika. Tokony hatao toy ny resadresaka tsotra ilay izy, fa tsy hatao mampahatahotra na koa hoe toy ny fanontaniana sy valiny fotsiny. Mila mahafeno an’ireto fepetra ireto ilay mpianatra vao azo ekena ho mpitory tsy vita batisa:

1. 1) Mino izy fa Tenin’Andriamanitra avy amin’ny herin’ny fanahy masina ny Baiboly.​—2 Tim. 3:16.

2. 2) Fantany sy inoany ny fampianarana fototra ao amin’ny Soratra Masina, ka raha misy manontany azy dia ho hainy ny hamaly araka ny Baiboly, fa tsy araka ny fampianaran-diso na ny heviny manokana. ​—Mat. 7:21-23; 2 Tim. 2:15.

3. 3) Manaraka ny didin’ny Baiboly izy ka mivory miaraka amin’ny vahoakan’i Jehovah foana, raha mbola afaka manao izany.​—Sal. 122:1; Heb. 10:24, 25.

4. 4) Fantany fa raran’ny Baiboly ny fijangajangana, anisan’izany ny fanitsakitsaham-bady, ny manambady maro, ny firaisan’ny samy lehilahy na samy vehivavy. Fantany koa hoe tokony ho vita soratra ny lehilahy sy vehivavy miray trano toy ny efa mpivady. Hita amin’ny fomba fiainany hoe mankatò an’izany fampianarana izany izy.​—Mat. 19:9; 1 Kor. 6:9, 10; 1 Tim. 3:2, 12; Heb. 13:4.

5. 5) Fantany hoe mandrara ny fimamoana ny Baiboly, ary mankatò an’izany izy. Tsy mampiasa zava-mahadomelina avy amin’ny zavamaniry na namboarina koa izy.​—2 Kor. 7:1; Efes. 5:18; 1 Pet. 4:3, 4.

6. 6) Hitany hoe mahasoa ny manalavitra ny naman-dratsy.​—1 Kor. 15:33.

7. 7) Efa notapahiny tanteraka ny fifandraisany tamin’ny fivavahan-diso mety ho niarahany taloha, ary efa tsy mivavaka any intsony izy. Tsy manohana azy io intsony koa izy, ary tsy mandray anjara amin’ny asany.​—2 Kor. 6:14-18; Apok. 18:4.

8. 8) Tsy mandray anjara amin’ny politika mihitsy izy. ​—Jaona 6:15; 15:19; Jak. 1:27.

9. 9) Tsy manao miaramila izy sady tsy midikiditra amin’ny adin’ireo firenena.​—Isaia 2:4.

10. 10) Tena maniry ho lasa Vavolombelon’i Jehovah izy. ​—Sal. 110:3.

⁹ Tokony hanontany tsara an’ilay mpianatra ireo anti-panahy raha toa ka misy zavatra tsy azony antoka. Azon’izy ireo ampiasaina ireo andinin-teny rehefa manao an’ilay fiaraha-midinika. Tokony ho takatr’ilay mpianatra fa tsy maintsy mahafeno an’ireo fepetra takin’ny Soratra Masina ireo ny olona miara-mitory amin’ny Vavolombelon’i Jehovah. Ho hitan’ny anti-panahy amin’ny tenin’ilay mpianatra raha fantany ny zavatra andrasana aminy, ary raha mahafeno fepetra araka ny antonony izy mba handray anjara amin’ny fanompoana.

¹⁰ Tokony hilazan’ny anti-panahy avy hatrany izy, raha mahafeno fepetra na tsia. Aorian’ilay fiaraha-midinika no anaovana an’izany, amin’ny ankapobeny. Azon’ny anti-panahy arahabaina izy raha mahafeno fepetra ho mpitory. (Rom. 15:7) Tokony hampirisihina izy mba handray anjara amin’ny fanompoana, haingana araka izay azo atao, ary hamerina tatitra momba ny fanompoana amin’ny faran’ny volana. Azon’ny anti-panahy hazavaina aminy fa hasiana Firaketana ny Fanompoan’ny Mpitorin’ny Fiangonana amin’ny anarany ao amin’ny antontan-taratasin’ny fiangonana, rehefa mamerina tatitra voalohany izy. Maka an’ireny fanazavana manokana ireny any amin’ilay mpitory ny anti-panahy, amin’izay ny fandaminana afaka mikarakara tsara ny asa ara-pivavahana ataon’ny Vavolombelon’i Jehovah eran-tany. Afaka mandray anjara amin’ny asa hafa mifandray amin’ny fanompoana an’i Jehovah koa ilay mpitory, amin’izay, sady afaka mahazo an’izay fampaherezana ilainy. Hita ao amin’ny jw.org ilay hoe Faneken’ny Vavolombelon’i Jehovah fa Tsy Hamoaka ny Fanazavana Omenao. Azon’ny anti-panahy ampahatsiahivina ireo mpitory vaovao hoe atao mifanaraka amin’io Fanekena io ny fomba hampiasana an’izay fanazavana momba azy.

¹¹ Tokony hiezaka hahafantatra tsara ny mpitory vaovao isika sady ho liana amin’ny zava-bitany. Mety hisy vokany tsara eo aminy mantsy izany. Mety hiezaka kokoa, ohatra, izy eo amin’ny fanompoana an’i Jehovah ary hamerina tatitra isam-bolana.​—Fil. 2:4; Heb. 13:2.

¹² Rehefa hitan’ny anti-panahy hoe mahafeno fepetra ho mpitory ny mpianatra Baiboly iray vao azo omena boky Voalamina mba Hanao ny Sitrapon’i Jehovah. Rehefa namerina ny tatitra momba ny fanompoany voalohany ilay mpianatra, dia hanaovana fampandrenesana fohy ny fiangonana hoe mpitory vaovao izy.

FANAMPIANA NY ANKIZY

¹³ Mety hahafeno fepetra ho mpitory ny vaovao tsara koa ny ankizy. Nandray azy ireny ho eo aminy i Jesosy ary nametra-tanana taminy. (Mat. 19:13-15; 21:15, 16) Ny ray aman-dreny no tompon’andraikitra voalohany amin’ny zanany, nefa azon’ny olon-kafa eo anivon’ny fiangonana atao koa ny manampy an’ireo ankizy tena maniry ho lasa mpitory ilay Fanjakana. Tokony ho ohatra tsara eny amin’ny fanompoana ny Kristianina manan-janaka, satria tena handrisika ny zanany hanompo an’Andriamanitra izany. Inona koa anefa no azo atao, raha hita hoe tena maniry hiresaka ny finoany amin’ny hafa ny ankizy iray sady hendry tsara?

¹⁴ Tsara raha manatona anti-panahy anisan’ny Komitin’ny Fanompoan’ny Fiangonana ny ray aman-dreny, mba hahitana raha mahafeno fepetra ho mpitory ny zanany na tsia. Hasain’ny anti-panahy mpandrindra hihaona amin’ilay ankizy ny anti-panahy roa (anisan’ny Komitin’ny Fanompoan’ny Fiangonana ny iray). Tokony hanatrika eo koa ny rainy na ny reniny (na izy mivady), na ny mpiantoka azy, raha Vavolombelona izy ireo. Ho hita hoe mandroso tsara ilay ankizy raha fantany ny fahamarinana fototra ao amin’ny Baiboly, ary tena maniry hitory izy. Hodinihin’ny anti-panahy ireo lafin-javatra ireo sy ny zavatra hafa takina amin’ny olon-dehibe, mba hahitana raha azo ekena ho mpitory tsy vita batisa ilay ankizy na tsia. (Lioka 6:45; Rom. 10:10) Tsy voatery hodinihina miaraka aminy kosa ny fepetra sasany takina amin’ny olon-dehibe, rehefa hita hoe tena tsy mihatra amin’ny ankizy.

¹⁵ Tokony hidera an’ilay ankizy ny anti-panahy, mandritra an’ilay fiaraha-midinika, noho ny fandrosoana vitany. Tokony hilazana koa izy hoe azony atao tanjona ny ho lasa mpitory vita batisa. Mendrika ny hoderaina koa ireo ray aman-dreny, satria azo inoana hoe niezaka mafy izy ireo mba hanampiana ny zanany handray am-po ny fahamarinana. Azon’ny anti-panahy atoro an’ireo ray aman-dreny ilay hoe “Ho An’ny Ray Aman-dreny Kristianina” eo amin’ny pejy 179-181, satria misy torohevitra hanampy azy ireo ao.

FANOKANAN-TENA SY BATISA

¹⁶ Efa mahafantatra an’i Jehovah ianao sady tia azy matoa mahafeno ireo fepetra takiny ary mandray anjara amin’ny fanompoana. Mbola misy zavatra tokony hataonao anefa, mba hahatonga anao ho akaiky kokoa azy. Mila manokan-tena ho an’i Jehovah ianao, ary avy eo atao batisa mba hanaporofoana an’izany.​—Mat. 28:19, 20.

¹⁷ Ny hoe manokana zavatra iray dia midika hoe manavaka azy io mba hampiasaina amin’ny asa masina. Ahoana no atao rehefa manokan-tena ho an’Andriamanitra? Mivavaka aminy ianao, ary mampanantena fa hampiasainao hanompoana azy ny fiainanao. Resahinao koa fa vonona hanaraka ny fitsipiny ianao, ary izy irery no hotompoinao mandrakizay. (Deot. 5:9) Ianao irery no tokony hanao izany ary tsy misy olon-kafa afaka misolo anao.

¹⁸ Tsy ampy anefa ny mivavaka amin’i Jehovah sy milaza aminy hoe irinao ny ho lasa fananany. Tokony hatao batisa ao anaty rano toa an’i Jesosy ianao, mba hampisehoana hoe efa nanokan-tena. (1 Pet. 2:21; 3:21) Inona no tokony hataonao raha tapa-kevitra ny hanompo an’i Jehovah ianao ary maniry hatao batisa? Resaho amin’ny anti-panahy mpandrindra ny fanirianao. Hasainy hiara-midinika aminao ny anti-panahy vitsivitsy, mba hahafantarana raha tena mahafeno ny fepetra takin’Andriamanitra ho an’ireo atao batisa ianao. Raha mila fanazavana fanampiny ianao, dia jereo ilay hoe “Ho An’ny Mpitory Tsy Vita Batisa”, eo amin’ny pejy 182-184 amin’ity boky ity, sy ilay hoe “Fanontaniana ho An’ireo Maniry Hatao Batisa”, eo amin’ny pejy 185-207.

TATITRA MOMBA NY FANDROSOAN’NY ASA FITORIANA

¹⁹ Nampahery ny vahoakan’i Jehovah foana ny tatitra momba ny fandrosoan’ny asa fitoriana maneran-tany. Nilaza tamin’ny mpianany mantsy i Jesosy Kristy fa hotorina maneran-tany ny vaovao tsara. Efa hatramin’ny fotoana nitenenan’i Jesosy an’io ny tena Kristianina no te hahafantatra hoe ahoana no hahatanteraka an’izany.​—Mat. 28:19, 20; Mar. 13:10; Asa. 1:8.

²⁰ Liana tamin’ireo tatitra momba ny fandrosoan’ny asa fitoriana ny mpanara-dia an’i Jesosy fahiny. (Mar. 6:30) Milaza ny bokin’ny Asan’ny Apostoly fa mpianatra 120 teo ho eo no nilatsahan’ny fanahy masina, tamin’ny Pentekosta taona 33. Tsy ela dia lasa 3 000 teo ho eo ny isan’izy ireo, ary avy eo 5 000 teo ho eo. Voalaza fa “nisy olona voavonjy nataon’i Jehovah nanampy isa azy ireo isan’andro” ary ‘be dia be ny mpisorona lasa nanaiky ny finoana.’ (Asa. 1:15; 2:5-11, 41, 47; 4:4; 6:7) Azo antoka fa tena nampahery an’ireo mpianatra ny nandre an’izany tatitra izany! Vao mainka àry izy ireo tapa-kevitra ny hanohy an’ilay asa nasain’Andriamanitra nataony, na teo aza ny fanenjehana mafy avy tamin’ny mpitondra fivavahana jiosy.

²¹ Nanoratra ho an’ny Kolosianina i Paoly tamin’ny taona 60-61 tany ho any, ary nilaza fa ‘namoa sady niparitaka eran’izao tontolo izao’ ny vaovao tsara, ary “notorina tamin’ny zavaboary rehetra etỳ ambanin’ny lanitra.” (Kol. 1:5, 6, 23) Nankatò ny Teny ny Kristianina voalohany. Nahazo hery avy tamin’ny fanahy masina koa izy ireo ka tena niavaka ny asa fitoriana vitany, talohan’ny namaranana ny tontolo jiosy tamin’ny taona 70. Tena nampahery an’ireny Kristianina tsy nivadika ireny ny nandre an’ireo tatitra momba ny zava-bita!

²² Manao tatitra momba ny asa vita koa ny fandaminan’i Jehovah ankehitriny, mba hahitana ny fahatanterahan’ny Matio 24:14 hoe: “Hotorina maneran-tany ity vaovao tsaran’ilay Fanjakana ity, ho vavolombelona amin’ny firenena rehetra, vao ho tonga ny farany.” Manana asa maika tokony hatao ny Kristianina rehetra efa nanokan-tena ho an’Andriamanitra. Tsy inona izany fa ny asa fitoriana. Tsy maintsy manao izay rehetra azontsika atao àry isika tsirairay mba hamitana tsara an’io asa io, alohan’ny hahatongavan’ny farany. Tsy maintsy ataon’i Jehovah izay hahavitana azy io. Hahazo ny fankasitrahany isika raha mandray anjara amin’izany.​—Ezek. 3:18-21.

TATITRA MOMBA NY FANOMPOANA

²³ Efa hita ao amin’ny Tatitra Momba ny Fanompoana ireo zavatra tokony hanaovana tatitra. Mety hanampy anefa ny fanazavana omena eto.

²⁴ Misy soratra hoe “Zavatra Napetraka (Vita pirinty sy Elektronika)” eo amin’ilay tatitra. Tokony hosoratanao tandrifin’izy io ny tontalin’ny zavatra vita pirinty na elektronika nozarainao tamin’ny olona mbola tsy Vavolombelona vita batisa. Soraty eo ambanin’ny hoe “Fampisehoana Video” kosa hoe impiry ianao no nampiseho ny video-ntsika tamin’ny olona.

²⁵ Mila anaovanao tatitra koa ny fotoana niverimberenanao tany amin’ny olona liana, izay tsy Vavolombelona vita batisa. Isao hoe impiry ianao no niverina nitsidika azy ireny mba hanampiana azy, ary soraty eo amin’ilay hoe “Fiverenana Mitsidika” ny tontaliny. Manao fiverenana mitsidika ianao rehefa mitsidika olona any an-tranony, manoratra taratasy, miantso an-telefaonina, mandefa hafatra amin’ny telefaonina na amin’ny e-mail, na manatitra boky na gazety. Azonao atao koa ny manisa fiverenana mitsidika iray, isaky ny mitarika fampianarana Baiboly. Afaka manisa fiverenana mitsidika iray isan-kerinandro ny ray na reny, rehefa mitarika Fotoam-pivavahan’ny Fianakaviana, raha misy ankizy mbola tsy vita batisa manatrika eo.

²⁶ Na dia isan-kerinandro aza ianao no mitarika fampianarana Baiboly, dia isaina ho fampianarana iray ihany izany ao amin’ny tatitra ataonao isam-bolana. Soraty eo amin’ilay tatitra ny tontalin’ny fampianarana Baiboly notarihinao nandritra ny volana. Anisan’ireo fampianarana Baiboly anaovana tatitra ny fampianarana an’ireo olona mbola tsy Vavolombelona vita batisa. Azonao isaina koa ny fampianarana Baiboly notarihinao tamin’ny rahalahy na anabavy tsy nitory intsony, izay nasain’ny Komitin’ny Fanompoan’ny Fiangonana nampianarinao. Mbola azonao isaina koa ny fampianarana notarihinao tamin’ny olona efa vita batisa, izay mbola tsy nahavita ny boky Ankafizo Mandrakizay ny Fiainana!

²⁷ Tokony hanao tatitra marina tsara momba ny “Ora” nanompoany ny mpitory. Anisan’izany ny fotoana laniny nitoriana isan-trano, nanaovana fiverenana mitsidika, nitarihana fampianarana Baiboly, na nanaovana fitoriana hafa alamin’ny fiangonana, na nitoriana tsy ara-potoana tamin’ny olona tsy Vavolombelona. Afaka samy manisa ora ny mpitory roa miara-manompo. Izay tompon’ny fitsidihana na fampianarana ihany anefa no manisa fiverenana mitsidika na fampianarana Baiboly. Afaka manisa hatramin’ny adiny iray isan-kerinandro ny mpivady, raha samy mampianatra ny zanany mandritra ny Fotoam-pivavahan’ny Fianakaviana. Afaka manisa ny ora laniny anaovana lahateny ho an’ny besinimaro ireo rahalahy. Afaka manao toy izany koa ireo mandika lahateny ho an’ny besinimaro. Marina aloha hoe zava-dehibe ny miomana handeha hanompo, manatrika fivoriana alohan’ny fanompoana, miantsena, na ny toy izany. Tsy tokony hampidirina amin’ny ora anompoana anefa ny fotoana anaovana an’ireo.

²⁸ Mila mampiasa ny feon’ny fieritreretany ny mpitory rehefa mamaritra ny tena ora laniny nanompoana. Tsy mitovy ny faritany itoriana, ka mety tsy hitovy koa ny fomba fanisan’ny mpitory ny orany. Any amin’ny faritra be olona mantsy ny mpitory sasany no manompo. Ny hafa kosa mitory any amin’ny faritra vitsy mponina ka mila mandeha lavitra be. Tsy manome fitsipika hentitra ho an’ny fiangonana eran-tany momba ny fanisana ora ny Filan-kevi-pitantanana, ary tsy misy manana fahefana hanao an’izany.​—Mat. 6:1; 7:1; 1 Tim. 1:5.

²⁹ Ora feno no tokony hosoratana ao amin’ny tatitra momba ny fanompoana. Afaka manao tatitra 15 na 30 na 45 minitra anefa ny mpitory tena tsy afaka manompo firy. Anisan’izany ny be taona, ireo tsy afaka mivoaka ny trano, ary ny any amin’ny trano fitaizana ny be antitra. Tokony hanao tatitra ireny mpitory ireny, na dia 15 minitra monja aza no nitoriany tao anatin’ny volana. Tsy anisan’ny mpitory tapatapaka izy ireo amin’izay. Afaka manao tatitra 15 na 30 na 45 minitra koa ny mpitory iray, raha tsy afaka mivoaka ny trano mandritra ny iray volana eo ho eo satria marary mafy na maratra be. Ho an’ireo tena tsy afaka ihany anefa io fandaharana io. Ny Komitin’ny Fanompoan’ny Fiangonana no manapa-kevitra hoe iza no mpitory afaka manao izany.

FIRAKETANA NY FANOMPOAN’NY MPITORIN’NY FIANGONANA

³⁰ Soratana ao amin’ny Firaketana ny Fanompoan’ny Mpitorin’ny Fiangonana ny tatitra momba ny fanompoana ataonao isam-bolana. An’ny fiangonana ireny firaketana ireny. Ilazao ny anti-panahy rehefa hifindra fiangonana ianao. Halefan’ny mpitan-tsoratry ny fiangonana nisy anao any amin’ilay fiangonana ifindranao ireny firaketana ireny. Ho afaka handray tsara anao ireo anti-panahy, amin’izay, sady ho afaka hanome an’izay fampaherezana ilainao. Alefaso any amin’ny fiangonanao ihany ny tatitra momba ny fanompoanao, raha latsaka ny telo volana ianao no tsy eo an-toerana.

NAHOANA ISIKA NO MANAO TATITRA MOMBA NY FANOMPOANA?

³¹ Hadinonao ve indraindray ny mamerina ny tatitra momba ny fanompoanao? Marina aloha hoe mila fampahatsiahivana isika rehetra indraindray. Mety ho tadidintsika foana anefa ny hamerina tatitra, raha heverintsika ho zava-dehibe izany ary fantatsika ny antony tena ilana an’izany.

³² Mety hieritreritra ianao hoe: “Nahoana aho no tokony hanao tatitra, nefa i Jehovah efa mahafantatra ny fanompoana ataoko?” Fantatr’i Jehovah tokoa ny fanompoana ataontsika, ary hitany raha nataontsika tamin’ny fo manontolo ilay izy na fanompoana anarany fotsiny. Tadidio anefa hoe nasain’i Jehovah nosoratana ny andro nijanonan’i Noa tao anaty sambofiara sy ny taona nivezivezen’ny Israelita tany an-tany efitra. Nasainy noraketina an-tsoratra koa ny isan’ny olona tsy nivadika taminy sy ny isan’ireo tsy nankatò azy. Noraketina an-tsoratra ny fomba nahazoan’ny Israelita tsikelikely ny tany Kanana sy ny zavatra nataon’ireo mpitsara tsy nivadika, tany Israely. Nasainy noraketina an-tsoratra ny tsipiriany maro be momba ny zava-bitan’ny mpanompony. Nasainy nosoratana ireny zava-nitranga ireny mba ho takatsika hoe zava-dehibe aminy ny manao tatitra marina tsara.

³³ Hita amin’ireo fitantarana nosoratana ao amin’ny Baiboly fa nanao tatitra marina tsara ny vahoakan’i Jehovah. Matetika mantsy no tsy tena mazava ilay tantara raha tsy misy tarehimarika voafaritra tsara. Diniho ireto ohatra ireto: Genesisy 46:27; Eksodosy 12:37; Mpitsara 7:7; 2 Mpanjaka 19:35; 2 Tantara 14:9-13; Jaona 6:10; 21:11; Asan’ny Apostoly 2:41; 19:19.

³⁴ Rehefa avy nitory ny apostoly tamin’ny taonjato voalohany, dia nolazain’izy ireo tamin’i Jesosy “izay rehetra nataon’izy ireo sy nampianariny.” (Mar. 6:30) Marina aloha fa tsy ho hita ao amin’ny tatitra daholo ny zavatra rehetra ataontsika ho an’i Jehovah. Tena ilain’ny fandaminana anefa ireny tatitra ireny. Mety ho hita amin’izy ireny indraindray hoe inona no karazana fanompoana ilana ezaka bebe kokoa. Mety ho hita amin’ireo tarehimarika mantsy hoe nihatsara ny karazana fanompoana sasany, fa tsy toy izany kosa ny hafa. Mety hoe tsy nisy fitomboana firy ny isan’ny mpitory. Angamba izy ireo mila fampaherezana, na misy olana mila alamina. Hijery ny tatitra rehetra ny mpiandraikitra mba hahitana hoe inona ny olana mety ho nahatonga ny mpitory tsirairay na ny fiangonana tsy handroso, ary hiezaka handamina an’izany izy ireo.

³⁵ Ilain’ny fandaminana koa ny tatitra mba hamantarany ny faritra mila mpitory maro kokoa. Ho fantany hoe aiza ny toerana ahitana vokatra kokoa ary aiza no tsy dia mandroso. Ho hitany koa hoe inona ny boky ilaina mba hanampiana ny olona hianatra ny fahamarinana. Ny tatitra no ahafantaran’ny fandaminana hoe inona avy ny boky na gazety tena ilaina any amin’ny faritra samihafa eran-tany, ary ataony izay hahazoan’izy ireo an’izany.

³⁶ Mampahery ny ankamaroantsika ny tatitra. Tena faly isika rehefa mandre ny asa fitoriana ataon’ny rahalahintsika eran-tany. Ny tatitra koa no ahitantsika ny fandrosoan’ny fandaminan’i Jehovah amin’ny ankapobeny. Mampahery antsika ny fitantarana, ary vao mainka mahatonga antsika hazoto hitory. (Asa. 15:3) Tena mila mamerina ny tatitra momba ny fanompoana nataontsika àry isika. Ho hita amin’izany mantsy hoe miahy an’ireo rahalahintsika eran-tany isika. Toy ny hoe zavatra kely ny hoe mamerina tatitra, kanefa hita hoe manaiky ny fandaharana ataon’i Jehovah eo anivon’ny fandaminany isika raha manao izany.​—Lioka 16:10; Heb. 13:17.

MIEZAHA HANANA TANJONA

³⁷ Aza ampitahaina amin’ny an’ny hafa ny zavatra vitanao eo amin’ny fanompoana. (Gal. 5:26; 6:4) Tsy mitovy mantsy ny zavatra iainan’ny tsirairay. Handray soa anefa ianao raha miezaka manana tanjona azo tratrarina, ary izay tanjona tratranao no hamaritanao ny fandrosoana vitanao eo amin’ny fanompoana. Ho afa-po koa ianao rehefa mahatratra ny tanjonao.

³⁸ Olona maro no tian’i Jehovah harovana amin’ny “fahoriana lehibe”, ary hita hoe angoniny haingana izy ireny izao. Tanteraka ankehitriny ilay faminanian’i Isaia hoe: “Ny vitsy ho lasa arivo, ary ny kely ho lasa firenena mahery. Izaho Jehovah no hanafaingana an’izany amin’ny fotoanany.” (Apok. 7:9, 14; Isaia 60:22) Tombontsoa tokoa ny hoe mitory ny vaovao tsara amin’izao andro farany tena miavaka izao!​—Mat. 24:14.