Asio Soa ny Hafa Amin’ny Fampiasana Ireo Gazety
1 Faly aoka izany isika mandray ireo nomerao farany indrindra amin’ny Ny Tilikambo Fiambenana sy Réveillez-vous! na Mifohaza! Ankamamintsika ny fahafahana mamaky azy ireny raha vantany vao voaray, mba hahafahantsika handray soa amin’ny fanazavana aseho. Ankoatra ny fitadiavana fanazavana izay mety hanampy antsika manokana, dia tsara ny hitadiavana ireo hevitra azo ampiasaina rehefa manolotra ireo gazety amin’ny hafa. Mety hirintsika ny hanisy fanamarihana amin’ireo tapany izay hanintona indrindra ireo olona ao anatin’ny faritanin’ny kongregasionantsika na hanisy marika eny an-tsisin’ny gazetintsika manokana mba hitadidin’ny tenantsika ireo hevitra azo resahina sy ny fomba azo ampisehoana eo an-toerana ilay lahatsoratra.
2 Manana vidiny maharitra ireo gazetintsika. Na dia mety hihevitra ny hampiseho voalohany ireo gazety vao haingana aza isika, dia tsy misy antony tokony hanariana ireo nomerao tranainy kokoa, satria tsy lany andro mihitsy ny fanazavana ao anatiny. Tahirizo ao anaty kitaponao ireo nomerao teo aloha mba ho azo ampiasaina izy ireny rehefa mitory. Mety hahasoa indrindra ireny rehefa manjary fantatra fa manan-javatra ilaina voafaritra tsara ilay tompon-trano. Rehefa gazety tranainy kokoa no apetraka, dia mety ny hilazana amin’ilay tompon-trano ny fandraisana anjara an-tsitrapo amin’izany.