Manjohy Hevitra avy Amin’ny Soratra Masina ve Ianao?
1 Ny miaramila efa za-draharaha iray izay handeha hiady dia ho ampy fitaovam-piadiana sy ho voaro amin’ny fomba feno. Ny mpanao asa tanana kinga iray miomana hiasa amin’ny tetik’asa fanorenana lehibe iray dia hitondra ireo fitaovana hilainy mba hamitana ny asa. Ny mpanompon’i Jehovah iray mandray anjara amin’ny asa fanompoana dia hanana ny ‘sabany’ eny an-tanany ka hampiasa izany amim-pahakingana izy, isaky ny manana fahafahana hanao izany. (Efes. 6:17). Marina ve izany ny aminao manokana? Rehefa mandray anjara amin’ny asa fanompoana ianao, moa ve avelanao hiteny ny Tenin’Andriamanitra, mba hahafahan’ny fanahy masina hanohina ny fon’ireo mpihaino anao? — Ohab. 8:1, 6.
2 Tsy asa mora foana akory ny fitoriana. Any amin’ny faritany sasany, dia mahalana vao tratra ao an-tranony ny olona, ary ireo izay manokatra ny varavarana dia sahirana mazàna, ka tsy manolotra afa-tsy fahafahana kely ho an’ny fifanakalozan-kevitra miitatra avy amin’ny Baiboly. Koa satria ny Baiboly no boky fianarantsika lehibe indrindra, amin’ny fomba ahoana no azontsika ampiasana azy io bebe kokoa amin’ny asa fanompoana sy amelana ny hafatra ara-tsindrimandry raketiny hisy heriny eo amin’ireo mpihaino antsika?
3 Isaky ny misy fahafahana: Isam-baravarana, dia irintsika ny hampiasa ny Baiboly mba hampirisihana an’ilay tompon-trano hanao zavatra. Tsy maintsy miomana hanao izany isika na inona na inona zavatra vita an-tsoratra atolotra. Raha sahirana ilay olona ka tsy ampy ny fotoana hanokafana ny Baiboly sy hamakiana andinin-teny iray na roa, moa ve ianao afaka manonona andinin-teny iray na milaza izany amin’ny endriny hafa mora azo alohan’ny hanolorana zavatra vita an-tsoratra? Izany ihany no mety hahatonga ilay olona hiato ka hihaino. — Heb. 4:12.
4 Ohatra, raha manasongadina ny Mifohaza! n°4 1993, misy ny lahatsoratra hoe “Ny Fahafatesana Entin’ny Elatra Manify” ao amin’ny pejy faha-19 ianao, dia manontania toy izao: “Inoanao ve fa hisy farany ny aretina indray andro any, ka amin’izay dia hifaly amin’ny toe-pahasalamana tanteraka ny rehetra?” Na inona na inona valin-teniny, dia mety ho afaka hamaky mivantana andinin-teny iray avy ao amin’ny Baibolinao ianao na hilaza izany amin’ny fomba hafa mora azo, toy ny Isaia 33:24 na ny Apokalypsy 21:4. Amin’izany fomba izany, dia mamela ny Tenin’Andriamanitra hiteny ianao.
5 Amin’ny fiverenana mitsidika: Tokony hiomana isika, alohan’ny hanaovana fiverenana mitsidika. Matetika anefa, dia hipoitra ny foto-kevitra izay tsy nomanintsika hodinihana. Amin’izay no ho afaka hiseho ho fitaovana sarobidy ny boky Ny Fomba Fanjohian-kevitra avy Amin’ny Soratra Masina. Ny fanononantsika na famakiantsika andinin-teny fanaporofoan-kevitra avy ao amin’ny boky Fanjohian-kevitra dia hanampy ny olona hahita fa mpanompon’Andriamanitra isika fa tsy manao ny Teniny ho filam-bola. — 2 Kor. 2:17, DIEM.
6 Rehefa miverina mitsidika ianao any amin’izay tsy nisian’ny foto-kevitra voafaritra tsara nodinihina dia mety hosokafanao fotsiny ny boky Fanjohian-kevitra ao amin’ny foto-kevitra mifanentana iray, toy ny hoe “Jesosy Kristy”, “Andro Farany”, na “Fananganana amin’ny maty”, ka hampiasa ny iray amin’ireo lohatenikely ianao mba hanombohana ny dinidinika. Azo asaina hamaky ny sasany amin’ireo andinin-teny avy ao amin’ny Baibolin’izy ireo manokana ireo tompon-trano. Amin’izay ny Baiboly dia hahaliana sy hisy heviny ho azy ireny, ary hirotsaka ny fanahy masin’i Jehovah raha mampiseho fahavononana araka ny marina izy ireny.
7 Ny andraikitsika hitory ny vaovao tsara sy hampitandrina ny ratsy fanahy dia andraikitra lehibe. Hafatr’i Jehovah izy io, fa tsy antsika. Aoka ny Teniny, ny sabatry ny fanahy, no hanampy anao.