Fitahiana Entin’ny Fiarahana Miasa Amin’ny Hafa
1 Mihevitra ve ianao fa misy soa azo avy amin’ny fiarahana miasa amin’ny hafa eo amin’ny fanompoana? I Jesosy dia nihevitra izany. Na dia be aza ny vokatra ary vitsy ny mpiasa, dia naniraka mpianatra 70 “tsiroaroa” teny amin’ny saha izy. Fotoana novalian-tsoa toy inona moa no hitan’izy rehetra ireo nitory tany “amin’ny tanàna sy ny tany rehetra izay efa halehany”! — Lioka 10:1, 17; Matio 9:38.
2 Mandrisika ny fiarahana miasa amin’ny hafa. Ny sasany amintsika dia saro-kenatra ka sarotra amintsika ny manatona olona tsy fantatsika. Raha manana olon-kafa eo anilantsika isika, izany dia hanome fatokiana antsika mba hilazantsika ny Tenin’Andriamanitra amim-pahasahiana. Rehefa misy olona miaraka amintsika, dia mety ho mora kokoa amintsika ny hanatanteraka ilay asa amin’ny fomba nampiofanana antsika. (Ohab. 27:17). Nilaza ilay olon-kendry hoe: “Tsara ny roa noho ny iray”. — Mpit. 4:9.
3 Tsara ny fiarahana miasa amin’ny mpitory sy mpisava lalana maro samihafa. Anisan’ireo naman’ny apostoly Paoly teo amin’ny fanompoana i Barnabasy, i Silasy, i Timoty ary i Jaona Marka, ary nahita fitahiana maro be izy ireo tamin’ny fiarahana nitory. Afaka ny ho marina koa izany amin’izao andro izao. Efa niara-niasa tamin’ny olona iray izay tao amin’ny fahamarinana efa hatramin’ny ela be ve ianao? Rehefa nandinika ny fahakingany teo am-panaovana fanambarana ianao, dia azo inoana fa nandray hevitra tsara sasany izay nanampy anao hihatsara. Efa niaraka tamina mpitory mbola vaovao ihany ve ianao? Nety ho afaka nanampy azy ireny hahita vokatra kokoa sy hahita fifaliana lehibe kokoa eo amin’ny fanompoany, ianao.
4 Mitarika fampianarana Baiboly ve ianao izao? Raha izany no izy, nahoana raha manasa ny iray amin’ireo loholona na ny mpiandraikitra ny fizaran-tany hiaraka aminao? Mandray soa avy amin’ny fahafantarana ireo mpiandraikitra ireo olona ampianarintsika ny Baiboly. Raha misalasala ianao hitarika ilay fampianarana eo anatrehan’ny loholona iray, dia angamba izy ho vonona hitarika azy io ka hamela anao handinika izany. Aorian’izany, dia aza misalasala mangataka fanipazan-kevitra aminy momba ny fomba ahafahanao manampy ilay mpianatra handroso haingana kokoa.
5 Aoka ianao ho namana mampahery rehefa miara-miasa amin’ny hafa. Manaova teny manorina momba ilay faritany. Aza manao resadresa-poana momba ny hafa mihitsy na mitaraina momba ireo fandaharan’ny kongregasiona mihitsy. Aoka ny sainao hifantoka amin’ny fanompoana sy amin’ireo fitahiana avy amin’i Jehovah. Raha manao izany ianao, dia samy hody, nahazo famelombelomana ara-panahy, ianao sy ireo namanao.
6 Mety hahatonga ny fiarahanao miasa tsy tapaka amin’ny rahalahy sy ny anabavy hafa ho sarotra ny toe-javatra misy anao. Kanefa, raha azo atao, nahoana raha manao fandaharana mba hanananao fotoana hiarahana miasa amin’ny mpitory hafa iray? Samy hahazo fitahiana ianareo! — Rom. 1:11, 12.