Fiverenana Mitsidika Misy Zava-kendrena
1 Rehefa manao fiverenana mitsidika, dia tokony hiezaka mafy ianao mba hampiasa andinin-teny iray izay hampitombo ny fahalalan’ilay olona momba ilay loha hevitra ara-baiboly nodinihinareo teo aloha.
2 Ny iray amin’ny tanjona amin’ny fiverenana mitsidika ireo olona nametrahana gazety dia ny mba hanorenana lalana fizarana gazety. Mety handaitra ny fomba fampiseho tsotra toy izao:
◼ “Antenaiko fa nahafaly anao ilay lahatsoratra tao amin’ny Ny Tilikambo Fiambenana napetrako taminao, izay nanazava ny antony tokony hatahorantsika an’Andriamanitra. Androany aho dia nitondra lahatsoratra iray ao amin’ny iray amin’ireo nomerao farany. [Manonòna lahatsoratra iray mahaliana.] Raiso, raha sitrakao, itỳ gazety itỳ ka mahazoa fampaherezana amin’ny fanantenana mafy orina atolotry ny Tenin’Andriamanitra.” Avy eo dia hazavao fa hiverina ianao ka hitondra ireo nomerao manaraka ary angamba hiresaka bebe kokoa momba izay nampanantenain’Andriamanitra ho an’ny olombelona mankato. Tadidio fa isaky ny manatitra ireo gazety ianao, dia afaka manao tatitra fiverenana mitsidika iray.
3 Raha nametraka ilay lahatsoratra hoe “Tontolo Iray Tsy Hisy Ady — Rahoviana?” ianao, dia ho azonao atao ny hilaza hoe:
◼ “Ho toy inona ny fiainana eto an-tany raha tsy misy intsony ny ady? [Avelao ilay olona hamaly.] Mamelà ahy hampiseho aminao izay nampanantenain’Andriamanitra fa hataony.” Vakio ny Salamo 37:10, 11, ary lazalazao hoe hanao ahoana ny toe-piainana rehefa hatao etỳ an-tany ny sitrapon’Andriamanitra. Ampahatsiahivo an’ilay olona izay nampianarin’i Jesosy ny mpianany mba hangatahin’izy ireo amin’ny vavaka, araka izay voarakitra ao amin’ny Matio 6:9, 10. Ampio izy hanjohy hevitra momba ny dikan’ny tenin’i Jesosy. Azonao atao ny manolotra famandrihana amin’ny Ny Tilikambo Fiambenana na ny Réveillez-vous!, ary manaova fandaharana mba hiverenana, hanaovana resaka fanampiny.
4 Ny fanombohana fampianarana Baiboly dia tanjona iray lehibe eo amin’ny fanompoantsika. Angamba ianao efa nanao fitsidihana imbetsaka tamin’ny olona iray izay nandray ireo gazety. Nahoana moa no tsy manandrana an’itỳ tari-dresaka itỳ amin’ny fitsidihanao manaraka?:
◼ “Manan-kevitra maro samy hafa momba ny fivavahana sy ny lanjany eo amin’ny fiainana maoderina, ny olona. Misy zavatra inoana mifanohitra momba ny hoe nahoana Andriamanitra no namela ny faharatsiana hisy na ny hoe nahoana isika no mihantitra sy maty. Tian’ny olona sasany ny hahafantatra ny fomba fivavaka ka hohenoin’Andriamanitra.” Sokafy ho eo amin’ny loha hevitra iray izay heverinao fa hahaliana ilay tompon-trano, ny iray amin’ireo zavatra vita an-tsoratra fianarana Baiboly ananantsika, ary asehoy vetivety ny fomba itarihana fampianarana.
5 I Jehovah dia Andriamanitra manana fikasana. Aoka isika hanahaka azy mandritra ny volana Oktobra, amin’ny fanaovana fiverenana mitsidika misy zava-kendrena.