Fanolorana ny Boky Fahalalana Izay Mitarika ho Amin’ny Fiainana Mandrakizay
1 Ravoravo isika rehefa navoaka ilay boky vaovao hoe Fahalalana Izay Mitarika ho Amin’ny Fiainana Mandrakizay! Natao mba hanampiana ny olona ho tonga haingana amin’ny fahalalana araka ny marina ny fahamarinana izy io. Amin’ny Desambra isika, dia hanana ny fahafahana voalohany hanolotra io boky io eny amin’ny faritanintsika. Inona no azontsika lazaina mba hanairana fahalianana?
2 Indro misy fomba fampiseho mety hanintona ny olona izay nanjary nalemy ny finoany an’Andriamanitra:
◼ “Olona maro no nobeazina tamin’ny finoana an’Andriamanitra, nefa ankehitriny dia hitan’izy ireny fa tsy toy ny teo aloha ny finoany. Inona no heverinao fa mety ho anton’izany? [Avelao ilay olona hamaly.] Hatanjahin’ny fandinihana ireo zava-mahatalanjona eo amin’izao rehetra izao ny finoantsika an’Andriamanitra. [Vakio ny Salamo 19:1.] Ilay nanao ireo lalàna mifehy ireny tenan-javatra eny amin’ny lanitra ireny dia nanome koa fitarihan-dalana sarobidy ho antsika. [Vakio ny Salamo 19:7-9.] Manantitrantitra ny maha-zava-dehibe ny hianarana izay rehetra azontsika fantarina momba an’Andriamanitra sy ny fikasany ireo andinin-teny ireo. [Sariho ny saina ho amin’ilay sary eo amin’ny pejy faha-4 sy faha-5, ary vakio ilay fanazavana miaraka aminy.] Raha irinao ny handray soa avy amin’izany fahalalana manokana izany, dia ho faly aho hametraka itỳ boky itỳ aminao.”
3 Raha mitadidy ao an-tsaina vaovao mampahory nitranga vao haingana ianao, dia mety ho azonao atao ny hilaza hoe:
◼ “Angamba renao ilay vaovao momba ny [tonòny ilay fisehoan-javatra]. Efa mba nanontany tena ve ianao raha tena miahy ny amin’ny tsy rariny sy ny fijaliana hitantsika manodidina antsika na iainantsika mihitsy aza, Andriamanitra? [Avelao ilay olona hamaly.] Manome toky antsika ny Baiboly fa tia antsika Andriamanitra ka hanampy antsika hamakivaky fotoam-pahoriana.” Mamakia tapany amin’ny Salamo 72:12-17. Sokafy ilay boky eo amin’ny pejy faha-70, ary asehoy fa io boky hoe Fahalalana Izay Mitarika ho Amin’ny Fiainana Mandrakizay io, dia mamaly fanontaniana iray efa napetraky ny olona an-tapitrisany maro hoe: Nahoana Andriamanitra no mamela ny fijaliana hisy? “Ho hitanao fa tena mampionona ny valin-teny omen’ny Baiboly an’izany fanontaniana izany. Ho tiako ny hametraka itỳ boky itỳ aminao mba hahafahan’ny tenanao hamaky momba izany.”
4 Raha mihaona amin’ny ray na reny iray ianao, dia mety ho azonao atao ny hampifantoka ny resakao amin’ny fianakaviana:
◼ “Ny ankamaroan’ny ray aman-dreny dia manaiky fa misy zava-manahirana maro amin’ny fiezahana hihazona fiainam-pianakaviana sambatra. Inona no hitanao fa vato misakana lehibe? [Avelao ilay olona hamaly.] Ny ankamaroantsika dia manao izay tratran’ny herintsika, mazàna anefa isika no mankasitraka fanampiana izay hanampy antsika hahazo vokatra tsara kokoa. Manome torohevitra faran’izay tsara ny Baiboly. [Mamakia tapany amin’ny Kolosiana 3:12, 18-21.] Manan-javatra maro kokoa holazaina momba io foto-kevitra io ny Baiboly, araka ny voasoritra ao amin’ny toko faha-15 amin’itỳ boky itỳ, izay mitondra ny lohateny hoe ‘Fanorenana Fianakaviana Izay Manome Voninahitra An’Andriamanitra’. Izy io dia mandinika ny torohevitra omena ao amin’ny Baiboly mampiseho ny fomba hanamaivanana ny fihenjanana ara-panambadiana sy ny fomba hahazakana ireo zava-manahirana atrehin’ireo zanatsika. Tena mino aho fa hahafaly anao ny hamaky azy itỳ.”
5 Raha zavatra fohy no tianao kokoa, dia mety ho azonao atao ny hilaza hoe:
◼ “Efa mba nanontany tena ve ianao hoe nahoana isika no mihantitra sy maty? Manazava ny antony isian’ny fahafatesana sy ny fomba hanesoran’Andriamanitra azy io ny toko faha-6 amin’itỳ boky itỳ. Milaza amintsika ny Baiboly fa Andriamanitra dia nampanantena fiainana mandrakizay ho an’ireo izay tia azy. [Vakio ny Jaona 17:3.] Raha ho tianao ny hamaky momba izany, dia ho hitanao fa faran’izay hanome fahazavana ilay boky.”
6 Raha voaomana tsara isika, dia mety ho afaka hampiasa io boky io mba ‘hamoahana ny hevitry ny Soratra Masina’ amin’ny hafa amin’ny fomba izay hitondra fifaliana lehibe ho azy ireo! — Lioka 24:32.