Ry Ray Aman-dreny — Ampiofano mba Hitory ny Zanakareo
1 Mandray fitahiana amin’ny fisian’ny ankizy maro izay maniry amim-pahatsorana hanompo an’Andriamanitra, ny kongregasionantsika. (Mpit. 12:1). Izy ireo dia anisan’ireo izay asain’i Jehovah mba hidera azy. (Sal. 148:12-14). Noho izany, ny fampiofanana isan’andro omen’ny ray aman-dreny ny zanany dia tokony hahafaoka fampianarana ny fomba hizarany ny finoany amin’ny hafa eo amin’ny asa fitoriana ilay Fanjakana. — Deot. 6:6, 7.
2 Ampiofano miandalana ny ankizy: Mendrika ny hampiofanina aloha be mba hiaraka amin’ny ray aman-dreniny eo amin’ny fanompoana ny ankizy. Alohan’ny handehanana eny amin’ny fanompoana, dia ampiomano mba handray anjara amin’ny fomba misy heviny ny zanakao. Farito mialoha izay antenainao hataony eny am-baravarana. Afaka manolotra taratasy mivalona sy taratasy fanasana ary manasa olona hankany amin’ny Efitrano Fanjakana ny ankizy madinika. Azo asaina hamaky andinin-teny eny am-baravarana ny ankizy mahay mamaky teny tsara. Afaka manolotra gazety, amin’ny fampiasana fomba fampiseho fohy, izy ireo. Rehefa mihaza-draharaha izy, dia ampiofano mba hampiasa ny Baiboly ao amin’ny fomba fampisehony. Mpitory tanora maro no nanomboka lalana fizarana gazety ho an’ny tenany ary manao fiverenana mitsidika tsy tapaka. Tsara indrindra raha miara-miasa amin’olon-dehibe ny ankizy, fa tsy amin’ankizy hafa iray. Ilay olon-dehibe dia afaka manazava amin’ilay tompon-trano fa ampiofanina eo amin’ny fanompoana ilay ankizy.
3 Nisy ankizivavy kely iray nangataka ny fanampian’ireo loholona mba hahafahany hahafeno fepetra mba ho mpitory ilay Fanjakana. Na dia dimy taona monja aza izy tamin’izay, no sady tsy nahay namaky teny, dia afaka nanolotra tamin’ny fomba nandaitra ny hafatra momba ilay Fanjakana teny am-baravarana. Notadidiny an-kandrina ny toerana nisy ireo andinin-teny, nosokafany ilay pejy nisy azy, nangatahiny hamaky azy ilay tompon-trano, ary avy eo dia nomeny ny fanazavana.
4 Tokony hampianarina ny ankizy koa, amin’ny alalan’ny ohatra omen’ny ray aman-dreny, fa zava-dehibe ny manana fandaharam-potoana tsara mba handraisana anjara tsy tapaka amin’ny fanompoana. Mila manorina fahazarana isan-kerinandro manao fanompoana ny ray aman-dreny, ka mifikitra amin’izany. Amin’izay, dia ho fantatr’ireo ankizy izay tapany amin’ny herinandro atokana ho amin’ny asa fitoriana.
5 Rehefa ampiofanina dieny mbola kely ny ankizy mba ho tia sy hankafy ny fanompoana, dia ho voatosika hanatratra tombontsoa lehibe kokoa izy amin’ny hoavy, anisan’izany angamba ny fanompoan’ny mpisava lalana. (1 Kor. 15:58). Isika rehetra dia tokony hampirisika ireo ankizy eo amintsika mba hanao fandrosoana tsara amin’ny maha-mpidera an’i Jehovah azy.