Mamaly Fanontaniana Maro ny Fahalalana avy Amin’Andriamanitra
1 Talohan’ny nahazoanao fahalalana araka ny marina ny fahamarinana, dia azo inoana fa nanana fanontaniana maro momba ny fiainana, izay tsy hainao novaliana, ianao. Sambatra toy inona moa ianao nahazo valiny niorina tamin’ny Baiboly ho an’ireo fanontaniana ireo! Ankehitriny dia afaka manampy ny hafa hahita ireny valiny ireny koa ianao. (Ampitahao amin’ny 2 Timoty 2:2.) Afaka mizara amin’izy ireo ny fahalalana an’Andriamanitra izay mitarika ho amin’ny fiainana mandrakizay ianao. (Jaona 17:3). Kanefa, ahoana no ahafahanao manampy olona iray hahatakatra ny hasarobidin’io fahalalana io? Eritrereto ireo fanontaniana izay novalian’ny fahamarinana ho anao. Inona no irin’ireo mitady ny fahamarinana ho fantatra? Ny fieritreretana momba ireo hevitra ireo dia afaka manampy anao hanolotra ny boky Fahalalana Izay Mitarika ho Amin’ny Fiainana Mandrakizay. Mety hanampy anao eo am-piomananao ho amin’ny fitoriana mandritra ny Jona, ireto fanoloran-kevitra manaraka ireto.
2 Koa satria olona maro no manontany tena ny amin’ny antony isian’ny fijaliana be dia be maneran-tany, dia mety hahazoana vokany tsara itỳ tari-dresaka itỳ:
◼ “Rehefa mamely ny loza na rehefa mitombo ny fanaovana heloka bevava sy ny herisetra, dia manontany ny amin’ny antony itrangan’ny zavatra mahatsiravina toy izany ny olona matetika. Ahoana no hamalianao izany?” Avelao ilay olona hamaly ary misaora azy noho izany. Avy eo, dia avadiho ho eo amin’ny toko faha-8 ny boky Fahalalana ary sariho ny sainy ho amin’izay voalaza eo amin’ny fehintsoratra faha-2. Hazavao fa io boky io dia manolotra ny fanazavana omen’ny Baiboly mikasika ny antony itrangan’ny faharatsiana, ary lazao hoe: “Ho faly aho hametraka itỳ boky itỳ ho anao amin’ny fandraisana anjara kely.”
3 Rehefa miverina any amin’izay nametrahanao ny boky “Fahalalana” ianao, dia ho azonao atao ny hilaza toy izao:
◼ “Nahaliana ahy ny fanatsoahan-kevitra nataonao momba ny antony isian’ny fijaliana be dia be maneran-tany. Mitovy hevitra amin’ny valiny omen’ny Baiboly, araka ny voasoritra ao amin’ilay boky ve ianao?” Avelao ilay olona hamaly. Vakio ny fehintsoratra faha-17 eo amin’ny pejy faha-77 ao amin’ny boky Fahalalana, ary vakio ao amin’ny Baiboliny ny Romana 9:14. Avy eo, dia manaova hoe: “Ny vaovao tsara dia hoe tsy Andriamanitra no mampahory sy mampijaly tsy ara-drariny antsika. Nampanantena izy fa hanome antsika fiainana mandrakizay ao anatin’ny fiadanana sy ny fahasambarana. Ny toko voalohany amin’itỳ boky itỳ dia mitondra ny lohateny hoe ‘Afaka Manana Hoavy Sambatra Ianao!’ Ho tiako ny hanazava aminao ny fomba hahatonga izany ho tena izy ho anao sy ireo olon-tsy foinao.” Sokafy ny toko voalohany, ary asehoy ny fomba fanaovantsika fampianarana. Diniho ny faran’izay betsaka amin’ilay toko araka izay mety amin’ny toe-javatra.
4 Mety hifidy ny hampiasa ilay fampidiran-dresaka hita eo amin’ny pejy faha-11 amin’ny boky “Fanjohian-kevitra” ianao, eo ambanin’ny lohateny hoe “Fahanterana/Fahafatesana”:
◼ “Efa mba nanontany tena ve ianao hoe: ‘Ny fahafatesana ve no faran’ny zava-drehetra? Sa misy zavatra hafa aorian’ny fahafatesana?’ [Avelao ilay olona hamaly.] Hazavain’ny Baiboly izay fanontaniana mety hananantsika momba ny fahafatesana. [Vakio ny Mpitoriteny 9:5, 10.] Asehon’izy io koa fa misy fanantenana marina ho an’ireo olona manam-pinoana. [Avadiho ho eo amin’ny fehintsoratra faha-13 ao amin’ny pejy faha-84 ny boky Fahalalana; vakio ary hazavao ny tenin’i Jesosy hita eo amin’ny Jaona 11:25.] Itỳ toko manontolo itỳ dia natokana mba hamaliana ilay fanontaniana hoe: Inona no manjo an’ireo olo-malalantsika nody mandry?” Avy eo, dia atolory amin’ny sarany mahazatra ilay boky.
5 Rehefa manao ilay fiverenana mitsidika ianao, dia ho afaka hampahafantatra indray ny tenanao, ka hilaza toy izao avy eo:
◼ “Teo aloha isika dia niresaka momba izay manjo ny olona iray rehefa maty. Olona maro no mino fa any an-danitra na any amin’ny afobe no hisian’ny fiainana aorian’ny fahafatesana. Kanefa, efa mba noeritreretinao ve hoe mety ho velona indray ny maty, eto ambonin’ny tany mihitsy? [Avelao ilay olona hamaly.] Araka ny Baiboly, ireo hatsangana amin’ny maty dia ho anisan’ireo mpandefitra izay handova ny tany. [Vakio ny Salamo 37:11, 29, avy eo dia diniho ny fehintsoratra faha-20 eo amin’ny pejy faha-88 ao amin’ny boky Fahalalana.] Nanome fampiononana olona an-tapitrisany maro izay niaina tao amin’ny tahotra ny fahafatesana, izany fanantenana izany. Hanampy anao hahatakatra tsara kokoa io foto-kevitra io itỳ boky itỳ. Azoko aseho anao ve hoe ahoana?”
6 Raha fomba fampiseho tsotra no tianao kokoa, dia ho azonao andramana itỳ iray itỳ:
◼ “Ho tiako ny hampiseho aminao sary iray ato amin’itỳ boky hoe Fahalalana Izay Mitarika ho Amin’ny Fiainana Mandrakizay itỳ. Tsy sary tsara tarehy ve izao?” Sokafy ilay boky mba hahitan’ilay tompon-trano ny pejy faha-4 sy faha-5. Avelao izy hamaly. Avy eo, dia vakio ny teny eo amin’ny pejy faha-5. Atolory amin’ny sarany mahazatra ilay boky. Fantaro izay fotoana hety mba hiverenana ka hanolokoloana izay mety ho fahalianana naseho.
7 Manana ny fahalalana avy amin’Andriamanitra, izay mamaly ireo fanontaniana lehibe momba ny fiainana, isika. Miomàna amim-pahazotoana, ary dia hitahy ny ezaka ataonao mba hizarana io fahalalana manome fiainana io amin’ireo izay mitady ny fahamarinana, i Jehovah.