Mifidiana Lahatsoratra Izay Hifanentana Amin’ny Fahalianana Voafaritra Tsaran’ny Olona
1 Sahala amin’ny mpandefa zana-tsipìka izay mikendry amim-pitandremana amin’ny zana-tsipìkany, dia mpitory sy mpisava lalana maro ao amin’ny kongregasiona no mahita fahombiazana faran’izay tsara amin’ny fampiasana lahatsoratra avy ao amin’ny Tilikambo Fiambenana sy Mifohaza! voafantina tsara mba hanohinana ny olona liana amin-javatra voafaritra tsara eny amin’ny faritaniny. Faritan’izy ireo izay olona azo inoana indrindra fa haniry hamaky lahatsoratra avy ao amin’ny gazety sasany. Ahoana no anaovany izany?
2 Voalohany, dia mamaky manontolo ny nomerao tsirairay izy ireo. Avy eo, dia manontany tena izy ireo hoe hanintona karazan’olona manao ahoana ny lahatsoratra tsirairay? Avy eo, dia miezaka hitsidika ireo olona izay azo inoana fa ho liana ny hamaky izany lahatsoratra izany izy ireo. Rehefa hitany mialoha fa ho tian’ny maro eo amin’ny faritaniny ny nomerao manokana iray, dia manafatra gazety fanampiny izy ireo.
3 Hajain’ny olona ireo gazetintsika: Hoy ny iray amin’ny mpanao famandrihana amintsika, izay miasa ho an’ny gazety iraisam-pirenena be mpamaky indrindra ao Nizeria, momba ny Mifohaza!: “Arahabaina ianareo noho ilay gazety mahafaoka foto-kevitra isan-karazany tsara indrindra eto an-tany.” Nanao izao fanamarihana izao ny olona iray mpamaky fatratra ireo gazetintsika: “Vatosoa mahatalanjon’ny fahendrena sarobidy re izany! Tsy misy foto-kevitra mahaliana ahy ka tsy hitako, resahina ao amin’ny pejin’ny iray amin’ireo [gazety] ireo.”
4 Mivaofy loha hevitra maro karazana ireo gazety, anisan’izany ny Baiboly, ny fisehoan-javatra maneran-tany, ireo zavatra ahin’ny fianakaviana, ny zava-manahirana ara-tsosialy, ny tantara, ny siansa, ny fiainan’ny biby sy ny zavamaniry, raha ireo monja aza no tanisaina. Azo antoka fa ny olona iray dia hirona kokoa hamaky zavatra izay mifandray amin’ny zavatra ilainy, ny toe-javatra misy azy, na ny asany. Koa satria isika miresaka amin’olona maro, izay samy manana ny zavatra tiany manokana sy ny zava-manahirana azy avy, dia tena mandaitra ny fifantenana lahatsoratra voafaritra tsara mba hanintonana ny olona hitantsika.
5 Mariho izay nitranga rehefa nanolotra ny Mifohaza! 8 Septambra 1996, tamin’ny mpanoratra an-gazety iray, ny Vavolombelona roa. Hoy ny nosoratan’izy io: “Talohan’ny nahafahako nilaza hoe tsy liana aho, dia nanampy teny toy izao ny iray taminy: ‘Misy lahatsoratra momba ireo Indiana any Amerika ato. Fantatray fa nanoratra zavatra betsaka momba io foto-kevitra io ianao.’ ” Nandray ilay gazety izy, ary nandritra ny sakafo maraina dia namaky ilay lahatsoratra momba ny Indiana, ary tatỳ aoriana dia niaiky fa “faran’izay tsara ilay izy” ary “milaza ny marina tanteraka”.
6 Inona no mahaliana ny olona ao amin’ny faritaninao? Inona no hitanao tao amin’ireo gazety tamin’ireo volana faramparany, izay mety hanintona ny mpivarotra sy ny mpiasa matihanina ao amin’ny faritaninao na ny mpiara-monina aminao, sy ny mpiara-miasa ary ny mpiara-mianatra? Inona moa no hahaliana manokana ny mpisolovava, ny mpanabe, ny mpanolo-tsaina ho an’ny fianakaviana sy ny sekoly, ny mpanolo-tsaina ny tanora, ny mpanome fanampiana ara-tsosialy, ary ny mpitsabo? Ny fieritreretanao ny olona itorianao, rehefa mamakafaka ny nomerao tsirairay ianao, dia hanome anao fomba faran’izay tsara hampielezana ny tenin’ny fahamarinana.
7 Rehefa mahita olona iray maneho fahalianana voafaritra tsara amin’ny lahatsoratra iray ao amin’ny Tilikambo Fiambenana na ny Mifohaza! ary mandray ilay gazety ianao, dia mety hilaza toy izao: “Rehefa misy lahatsoratra izay hitako fa hahaliana anao koa ao amin’ny nomerao manaraka, dia ho faly aho hitondra azy io ho anao.” Mety ho afaka hampiditra ilay olona ao amin’ny lalana fizarana gazety ataonao ianao, ka hiverina hitsidika matetika miaraka amin’ireo gazety farany. Izany dia mitovy amin’izay natao mba hahazoana fanasana hiverina hitsidika an’ireo olona izay mety ho liana indrindra amin’ny lahatsoratra sasany ao amin’ny gazetintsika.
8 Manàna zava-kendrena ara-panahy: Taona vitsivitsy lasa izay, dia nahazo gazety Mifohaza! momba ny foto-kevitra iray nahaliana azy ny lehilahy iray mpikatsaka fisondrotana eo amin’ny asany. Kanefa, io lehilahy tia fivavahana io dia namaky koa ilay Tilikambo Fiambenana niaraka taminy, izay nirakitra lahatsoratra nanosika azy handinika akaiky ny finoany ny Trinite nandritra ny fiainany manontolo. Enim-bolana tatỳ aoriana, dia natao batisa izy! Noho izany, dia aza misalasala misarika ireo mpamaky ny gazetintsika ho amin’ny resaka araka ny Soratra Masina. Afaka mampiseho ny bokikely Inona no Takin’Andriamanitra Amintsika? ianao, sy manolotra ny haka minitra vitsivitsy monja mba hiresahana lesona iray isaky ny miverina mitondra gazety vaovao ianao.
9 Asio fiheverana amim-pitandremana hoe iza amin’ireo fiverenana mitsidika ataonao sy ireo mpandraharaha iresahanao no ho azo inoana indrindra fa hankasitraka ny fananana nomerao farany amin’ny Tilikambo Fiambenana sy ny Mifohaza! Avy eo, dia manaova ezaka amim-pahatsorana mba hanatratrarana azy ireny. Manatòna olona faran’izay betsaka araka izay azonao atao, mba hizarana ireo gazety sarobidy ireo. Ary aza hadinoina na oviana na oviana fa rehefa miezaka mafy mba hanampy olona maro kokoa hamaky ny gazetintsika ianao, dia ‘manipy ny haninao eny ambonin’ny rano’. Rehefa mandeha ny fotoana, dia mety hahomby, ka hahita mpianatra ho namanao amin’ny ho avy ianao. — Mpit. 11:1, 6.