Fitoriana Amin’ny “Karazan’olona Rehetra”
1 Rehefa mahita olona samy hafa kolontsaina na fivavahana isika, dia mahatadidy fa ny sitrapon’i Jehovah dia ny “hoe tokony ho voavonjy ny karazan’olona rehetra ary ho tonga amin’ny fahalalana araka ny marina ny fahamarinana”. (1 Tim. 2:4, NW ). Ho fanampin’ireo taratasy mivalona sy bokikely nomanina manokana, isika dia manana zavatra vita an-tsoratra roa faran’izay tsara, izay azo ampiasaina amin’ny fotoana rehetra mba hanampiana ny olona izay tsy nampianatra azy ny fahamarinana momba an’Andriamanitra sy i Kristy ny fivavahany.
2 Ny boky Mpampianatra Lehibe dia mampianatra tsara ny fomba nanehoan’i Jesosy fitiavana tsy nisy fitiavan-tena tamin’ny hafa, ka nikelezany aina tamin’ny fomba rehetra mba hanampiana ny hafa hianatra momba an’i Jehovah. Etsy an-danin’izany, amin’ny fanasongadinana ny fiainan’i Jesosy Kristy, ny boky Ilay Lehilahy Niavaka Indrindra Teto An-tany dia afaka manampy olona iray hanjary hahafantatra tsara kokoa ny Zanak’Andriamanitra sy hisarika azy, toy ny olona maro tamin’ny taonjato voalohany. (Jaona 12:32). Isaky ny mety, dia mety haniry hanandrana ireto fanoloran-kevitra manaraka ireto ianao mba hampisehoana ireo boky ireo.
3 Raha heverinao fa tsara ny manolotra ny boky “Lehilahy Niavaka” amin’ny olona iray, dia ho azonao atao ny hanontany hoe:
◼ “Inona no tonga ao an-tsainao, rehefa mieritreritra ny amin’i Jesosy Kristy ianao? [Avelao izy hamaly.] Mpahay tantara maro no manaiky an’i Jesosy ho ilay lehilahy niavaka indrindra teto an-tany. [Manonòna ohatra iray avy ao amin’ny teny fampidirana ao amin’ny boky Lehilahy Niavaka.] Ny Baiboly dia mampiseho fa ny fiainan’i Jesosy dia modely tokony hotahafintsika.” Vakio ny 1 Petera 2:21 sy ny fehintsoratra voalohany eo amin’ny pejy farany amin’ilay teny fampidirana ao amin’ny boky Lehilahy Niavaka. Raha liana ny hahafantatra momba an’i Jesosy ilay tompon-trano, dia atolory ilay boky. Alohan’ny handehananao, dia vakio ny Jaona 17:3 ary manontania hoe: “Ahoana no ahafahantsika mandray io fahalalana izay mitarika ho amin’ny fiainana mandrakizay io?” Manaova fandaharana voafaritra tsara mba hiverina hamaly ilay fanontaniana.
4 Rehefa miverina mba hanazava ny fomba ahazoana fahalalana manome fiainana ianao, dia afaka milaza toy izao:
◼ “Nampanantena ny hiverina aho mba hampiseho aminao ny fomba ahafahantsika mandray ilay fahalalana izay mitarika ho amin’ny fiainana mandrakizay.” Asehoy ny boky Fahalalana, ary amin’ny fampiasana ny toko voalohany, dia asehoy ny fomba fianatra.
5 Afaka mampiasa fomba tsotra isika, rehefa manolotra ny boky Mpampianatra Lehibe. Ohatra, afaka misarika ny saina ho ao amin’ilay sary eo amin’ny pejy faha-16 isika, ary milaza hoe: “Efa mba voamarikao ve fa mambabo ny sain’ny ankizy ny zavatra noforonina? Efa mba nieritreritra ve ianao ny hampiasa izany fahafahana izany mba hampidirana tsikelikely ao amin’ireny zaza madinika ireny ny fankasitrahana an’Ilay nanao ny zavatra rehetra? Tsy isalasalana fa azo atao izany amin’ny fanontaniana hoe [vakio avy ao amin’ilay boky]: “ ‘Rehefa mahita ireny voninkazo tsara tarehy ireny isika, iza moa no hisaorantsika? (...)’ ” Hitanao ve hoe tena sarobidy mihitsy io boky io mba hampianarana ny ankizy?
6 Rehefa miresaka amin’ny ray aman-dreny ianao, dia asehoy ny mahatsara ilay boky mba hampianarana ny ankizy. Ray aman-dreny maro, ohatra, no maniry hahafantatra ny fomba ahafahany mampianatra ny zanany hivavaka sy hahafantatra ny soa entin’ny vavaka. Azo ampiasaina tsara ny sary eo amin’ny pejy faha-49, ary koa ilay fanazavana manodidina, manomboka eo amin’ilay fehintsoratra hoe: “Indray andro, dia nangataka an’i Jesosy mba hampianatra azy ireo hivavaka ny mpianatra. (...)” Raha mamela ny fotoana, rehefa voavaky ilay fehintsoratra, dia ataovy izay hanondroana hevitra ao, izany hoe, asao ilay tompon-trano haka ny Baiboliny. Raha tsy zatra mampiasa Baiboly izy, dia asehoy azy amin-katsaram-panahy ny fomba azo ampiasana ny lisitry ny boky ao amin’ny Baiboly, eo am-piandohan’ny Baiboliny, mba hijerena ny Matio toko fahenina sy ny andinin-teny hafa rehetra. Ny fanaovanao izany dia hahatonga ilay ray na ilay reny hanao toy izany amin’ny zanany koa, rehefa mamaky ny boky Mpampianatra Lehibe miaraka aminy izy.
7 Olona tso-po isan-karazany no mitady ny fahamarinana momba an’Andriamanitra sy i Kristy. Afaka manampy azy ireny amin’ny asa fanambarana ataontsika isika. Koa, aoka àry isika hanohy ‘hiasa mafy sy hikely aina, satria isika nametraka ny fanantenantsika tamin’ny Andriamanitra velona iray, izay “Mpamonjy ny karazan’olona rehetra”. — 1 Tim. 4:10, NW.