Ampianaro Hanao Izay Takin’Andriamanitra ny Hafa
1 Mbola mahita olona maro tsy ‘nandre ny tenin’i Jehovah’ ka maty antoka ara-panahy, ihany isika. (Amosa 8:11). Na dia mino aza ny sasany fa misy Andriamanitra, dia tsy mahafantatra ny fikasany sy ny zavatra takiny izy ireo. Noho izany, dia mila mampianatra azy ireo ny fahamarinana momba ilay Fanjakana, izay mamonjy ain’olona, isika. Raha voaomana sy miomana tsara mba hitory isaky ny misy fahafahana isika, dia afaka mahita an’ireo izay maniry hianatra ny amin’izay takin’i Jehovah.
2 Amin’ny Aprily sy May isika dia hanely gazety Ny Tilikambo Fiambenana sy Mifohaza! izay ho tena amin’ny fotoana ilana azy. Fanampin’izany, dia vao voalohany isika izao no hanolotra ny bokikely Inona no Takin’Andriamanitra Amintsika? Ireo sary manaitra ny maso sy fanontaniana mampieritreritra ao anatiny dia mahatonga io bokikely io hanintona karazan’olona maro. Misy fanipazan-kevitra atolotra manaraka eto mba hanampiana antsika hampiasa ireo zavatra vita an-tsoratsika faran’izay tsara amin’ny fomba mandaitra.
3 Fitadiavana ireo olona: Any amin’ny faritra tsy ahatratrarana olona maro ao an-tranony rehefa mitsidika isan-trano isika, dia ahitana vokany ny fitadiavana ireo olona sy ny firesahana aminy na aiza na aiza ahitana azy ireo. Ny takelaka fanampiny tamin’ny Ny Fanompoantsika Ilay Fanjakana Septambra 1996 dia nampirisika antsika hitory ny vaovao tsara hatraiza hatraiza — eny amin’ny arabe, ny fitateram-bahoaka, ny zaridainam-bahoaka, ny parkings, ary ny toeram-pandraharahana. Nampahafantarin’izy io antsika koa fa ilaina ny mamorona fahafahana hitory tsy ara-potoana. Ohatra, ny anabavy mpisava lalana iray dia nankany amin’ny zoo (saha misy biby azo jerena), nitondra maromaro tamin’ny Mifohaza! 8 Aogositra 1996, nisy ilay lahatsoratra hoe “Karazana Tandindomin-doza — Nahoana no Manahy?” Tao anatin’ny adiny iray izy dia nahapetraka gazety 40 tamin’ny mpitia biby feno fankasitrahana! Nanao ahoana ny fahombiazana hitanao hatramin’izao tamin’ny fitoriana ny vaovao tsara hatraiza hatraiza? Ny Tilikambo Fiambenana sy ny Mifohaza! ary ny bokikely Takina dia mety indrindra amin’ny endriny rehetra amin’ny fitoriana, satria manasongadina fanazavana izay mahakasika ny fiainan’ny olona sy mandrisika ny fahaiza-misaina, izy ireo.
4 Fanombohan-dresaka: Ny pejy farany tamin’ny Ny Fanompoantsika Ilay Fanjakana Oktobra 1996, dia nanome tsipiriany momba ny fanomanana ny fomba fampisehonao ny gazety Ny Tilikambo Fiambenana sy Mifohaza! Handaitra koa ireny fanipazan-kevitra ireny rehefa manomana ny fomba fampisehonao ny bokikely Takina ianao. Afaka ny ho fohy ny tenintsika ka tsy hisy afa-tsy fehezanteny vitsivitsy, na ho lava ka hisy andinin-teny iray. Zava-dehibe ny hifidianana ireo teny voalohany amim-pitandremana, satria izy ireo no mety hamaritra raha hanohy hihaino ilay olona hatonintsika na tsia. Nisy nahita fahombiazana tamin’izao teny voalohany izao: “Namaky lahatsoratra iray izay nampahery ahy aho, ary tiako ny hampiseho azy io aminao.” Na afaka mametraka fanontaniana mahaliana iray ianao, mba hahatonga ilay olona hiresaka.
5 Raha mety eo amin’ny faritra misy anao, dia ho azonao atao ny hametraka fanontaniana toy ireto manaraka ireto ao amin’ny fomba fampiseho hampiasainao amin’itỳ volana itỳ:
◼ “Ankehitriny isika dia mahita soratsoratra sy fako ary fandotoana be dia be. Inona no hilaina mba hahadio ny tany ka hahatonga azy ho toeram-ponenana tsara kokoa?” Avelao ilay olona hamaly, ary avy eo dia lazao fa manana fanazavana izay manome toky antsika ny amin’ny fomba sy ny fotoana hahatongavan’ny tany manontolo ho zaridaina, ianao. Mampisehoa teny voafaritra tsara iray, andinin-teny fohy iray, ary sary manaitra iray ao amin’ny gazety farany, ary avy eo dia atolory hovakin’ilay olona ilay izy. Alohan’ny hamarananao ilay resaka, dia miezaha handamina fotoana hafa hanohizana azy io.
◼ “Heverinao ve fa nataon’Andriamanitra hiaina ao anatin’ny zava-manahirana toy izay atrehintsika ankehitriny isika?” Rehefa avy mamaly ilay olona, dia azonao atao ny milaza hoe: “Azo inoana fa fantatrao tsara ilay vavaka nampianarin’i Jesosy ny mpanara-dia azy, angatahana ny hahatongavan’ny Fanjakan’Andriamanitra. Efa mba noeritreretinao ve hoe inona marina io Fanjakan’Andriamanitra io?” Sokafy ny lesona faha-6 ao amin’ny bokikely Takina, ary vakio ireo fanontaniana apetraka eo am-piandohan’ilay lesona. Avy eo, rehefa mamaky ny fehintsoratra voalohany ianao, dia tondroy ny valin’ilay fanontaniana voalohany. Hazavao fa voavaly amin’ny fomba voafintina tsy misy hafa amin’izany koa ireo fanontaniana hafa rehetra. Atolory ilay bokikely, ary manolora ny hiverina indray mba hanomezana fanazavana bebe koa momba ilay Fanjakana.
◼ “Olona misaina maro no manomboka mihevitra fa ireo fivavahan’izao tontolo izao no loharano, fa tsy vahaolan’ireo zava-manahirana ny olombelona. Inona no hevitrao momba izany?” Rehefa avy mihaino ny fomba fihevitr’ilay olona ianao, dia mampisehoa zavatra ao amin’ny iray amin’ireo gazety farany, izay mety hisarika ny fahalianany momba ny tsy fahombiazan’ny fivavahan-diso na ny fianjerany mihamanatona. Anontanio raha tiany ny hamaky azy io. Aoka ianareo hifampanonona anarana, ary manolora ny hifankahita aminy indray, mba hahafahanao hanazava fa ny fivavahana marina kosa dia tsy nandiso fanantenana ny olombelona.
◼ “Noho ireo zava-manahirana maro be hitan’ny fianakaviana ankehitriny, moa ve ianao efa mba nanontany tena hoe inona no tsiambaratelo mba hahitana ny fahasambaram-pianakaviana?” Andraso ny valin-tenin’ilay olona, ary hazavao fa ao amin’ny Baiboly, Andriamanitra dia mampiharihary ny tena tsiambaratelon’ny fahasambaram-pianakaviana. Angamba ianao ho afaka hamaky ny Isaia 48:17. Avy eo dia sokafy ny lesona faha-8 ao amin’ny bokikely Takina, ary asehoy ny sasany amin’ireo andinin-teny ao amin’ny Baiboly manome tari-dalana azo ianteherana ho an’ny mpianakavy tsirairay. Vakio ireo fanontaniana eo am-piandohan’ilay lesona. Anontanio raha ho tian’ilay olona ny hamaky ny valin’izy ireo. Raha eny, dia atolory azy ilay bokikely. Manolora ny hiverina amin’ny fotoana hafa mba hampisehoana bebe kokoa momba ilay tari-dalana azo ampiharina raketin’ny Baiboly ho an’ny fiainam-pianakaviana sambatra.
6 Ny takelaka fanampiny tamin’ny Ny Fanompoantsika Ilay Fanjakana Martsa 1997 dia nampirisika antsika hisikina fahasahiana mba hanao fiverenana mitsidika. Izy io dia nanoro hevitra ny hampiasana ny bokikely Takina mba hanombohana fampianarana Baiboly, raha tsy eo amin’ny fitsidihana voalohany, dia eo amin’ny fiverenana mitsidika. Ny zavatra ilain’ny olombelona indrindra dia ny mianatra momba izay takin’Andriamanitra ary avy eo dia ny manao azy io. (Kol. 1:9, 10). Hitondra soa be dia be ho an’ny hafa isika amin’ny Aprily sy May, raha afaka manomboka mampianatra azy ireo izay fantatsika momba ny zavatra takin’i Jehovah mba hahazoana fiainana. — 1 Kor. 9:23.