Mila ny Mandre ny Vaovao Tsara ny Mpiara-belona Amintsika
1 Sitrapon’Andriamanitra ny “hoe tokony ho voavonjy ny karazan’olona rehetra ary ho tonga amin’ny fahalalana araka ny marina ny fahamarinana”. (1 Tim. 2:4, NW ). Anisan’izany “karazan’olona rehetra” izany ny mpiara-belona rehetra. Ny fitondrana ny vaovao tsara any amin’izy ireo dia mitaky fanovaovana ny fomba fampisehontsika sy fiahiana ny amin’izay mety hahaliana ny olona tsirairay hitantsika. (1 Kor. 9:19-23). Ny fandaminan’i Jehovah dia nanome fitaovana izay afaka manampy antsika hanohina ny fon’ireo izay ‘mirona araka ny mety ho amin’ny fiainana mandrakizay’. (Asa. 13:48, NW ). Aoka hojerentsika ny fomba azontsika ampiasana bokikely maro isan-karazany mandritra ny Jolay sy ny Aogositra mba hikarakarana ny zavatra ara-panahy ilain’ny mpiara-belona amintsika.
2 Bokikely asongadina: Ho hitanao voalaza eto ambany ireo fanoloran-kevitra mety hilaina rehefa manolotra bokikely sasany. Ny fanoloran-kevitra tsirairay dia mahafaoka 1) fanontaniana iray mampisaintsaina ho fanombohana ny resaka, 2) toerana izay ahitana hevitra azo resahina ao amin’ilay bokikely, ary 3) andinin-teny mifanentana izay azo vakina mandritra ny resadresaka. Azonao fenoina amin’ny fomba fiteninao manokana ilay fomba fampiseho, arakaraka ny valin-tenin’ilay olona. Ho an’ny ankamaroan’ny bokikely, dia tononina Ny Fanompoantsika Ilay Fanjakana teo aloha izay hahitanao fomba fampiseho ilay bokikely amin’ny an-tsipiriany kokoa.
Tena Miahy Antsika ve Andriamanitra?
Fanantenana inona no heverinao fa misy mba hanampiana ny olona izay nizaka fitondrana ratsy? — Pejy 27-28, fehintsoratra 23-27; Isaia 65:17, 18; km-MG 7/97 p. 4.
Inona no Zava-kendren’ny Fiainana — Ahoana no Mety Hahitana Azy Io?
Nahoana no olona maro aoka izany no toa tsy afa-po amin’ny fiainany? — Pejy 29-30, fehintsoratra 2, 25, 26; Sal. 145:16; km-MG 7/96 p. 4.
Mifalia Amin’ny Fiainana eto An-tany Mandrakizay!
Efa mba nanontany tena ve ianao hoe inona izao no ataon’i Jesosy Kristy? — Sary 41-42; Apok. 11:15; km-MG 8/96 p. 8.
Ny Fitondram-panjakana Izay Hitondra ny Paradisa.
Ho tianao ve ny hahafantatra momba ilay Fanjakana izay nampianarin’i Jesosy antsika mba hangatahina amin’ny vavaka? — Pejy 3; Matio 6:9, 10; km-MG 8/96 p. 8.
Rehefa Nody Mandry ny Olona Iray Tianao.
Efa mba nanontany tena ve ianao hoe ahoana no ampiononana olona iray izay namoy havan-tiana tao amin’ny fahafatesana? — Pejy 26, fehintsoratra 2-5; Jaona 5:28, 29; km-MG 7/97 p. 4.
Tokony Hino ny Trinite ve Ianao?
Moa ve zava-dehibe ho an’ny hoavintsika ny fahatakarana ny tena toe-tenan’Andriamanitra? — Pejy 3, fehintsoratra 3, 7-8; Jaona 17:3.
3 Misy bokikely hafa iray nomanina mba hanampiana ny olona izay mety ho nahita fianarana nefa tsy mahafantatra firy momba ny Baiboly. Natao mba hanosehana azy haniry handinika amim-pitandremana ny Tenin’Andriamanitra izy io. Rehefa mifanentana amin’ny toe-javatra, dia mety hifidy ny hanolotra izao manaraka izao ianao:
Boky Iray ho An’ny Olona Rehetra.
Ekenao ve fa ny fahazoana fampianarana feno dia mahafaoka fahazoana fahalalana sasany ny amin’izay raketin’ny Baiboly? — Pejy 3, fehintsoratra 1-3 sy pejy 30, fehintsoratra faha-2; Mpit. 12:9, 10.
4 Bokikely fampianarana Baiboly: Tokony ho ny hanomboka fampianarana Baiboly foana no ho zava-kendrentsika eo amin’ny fanompoana, na amin’ny fitsidihana voalohany izany na amin’ny fiverenana mitsidika manaraka. Mba hahatongavana amin’izany, dia manana itỳ bokikely mora ampiasaina, voalaza manaraka itỳ isika mba hanombohana sy hitarihana fampianarana Baiboly:
Inona no Takin’Andriamanitra Amintsika?
Fantatrao ve fa ao anatin’ny 30 minitra na latsaka noho izany isan-kerinandro, mandritra ny 16 herinandro monja, dia afaka mahazo fahatakarana fototra ny Baiboly ianao? — Lesona 2, fehintsoratra faha-6; 2 Tim. 3:16, 17; km-MG 3/97 p. 4.
5 Tao amin’ny fanoharana ny amin’ilay Samaritana tia ny mpiara-belona taminy, dia nahariharin’i Jesosy fa izay maneho fitiavana sy hatsaram-panahy mba hanampy ny hafa izay azom-pahoriana no tena tia ny mpiara-belona aminy. (Lioka 10:27-37). Azom-pahoriana eo amin’ny ara-panahy ny mpiara-belona amintsika. Mila ny mandre ny vaovao tsara izy ireo. Aoka isika hiantsoroka ny andraikitra hizara azy io amin’izy ireo, ka hanaporofo ny tenantsika ho tena mpianatr’i Jesosy Kristy. — Matio 24:14, Gal. 5:14.